ଯାଜପୁର ଟାଉନ,୨୫।୧(ଡି.ଏନ.ଏ.): ଯାଜପୁର ସହରରେ ଥିବା କୁସୁମା ନିକଟରେ ରଦି ଲୁହାରେ ନିର୍ମିତ ଆଇ ଲଭ୍ ଯାଜପୁର(ସେଲ୍ଫି ଜୋନ୍) ଓ ସହରର ପ୍ରବେଶପଥରେ ହରିଣ ପ୍ରତିମୂର୍ତ୍ତି ରବିବାର ଉଦ୍ଘାଟିତ ହୋଇଯାଇଛି। ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ରବିବାର ଏହାର ଉଦ୍ଘାଟନ କରିଛନ୍ତି। ରାସ୍ତା କଡ଼ର ପରିବେଶକୁ ସୌନ୍ଦର୍ଯ୍ୟକରଣ ପାଇଁ ଏହା ନିର୍ମାଣ କରାଯାଇଛି। ଏଥିସହିତ ଜଜ୍ କଲୋନୀ ସମ୍ମୁଖରେ ନବନିର୍ମିତ ପାର୍କକୁ ବିଧାୟକ ଉଦ୍ଘାଟନ କରିଛନ୍ତି। ଯାଜପୁର ପୌର ପରିଷଦ ଅଧିକାରୀ ଅଜୟ କୁମାର ମହାନ୍ତି, ଓଏସ୍ଡି ସୁଦର୍ଶନ ମିଶ୍ର, ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ, ପୂର୍ବତନ ପୌରାଧ୍ୟକ୍ଷ ଭବପ୍ରସାଦ ଦାସ ଓ ପୂର୍ବତନ ଉପାଧ୍ୟକ୍ଷ ସନ୍ତୋଷ ମଲ୍ଲିକ ପ୍ରମୁଖ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।
