ଓ୍ବାଶିଂଟନ,୧୪।୩: ଏବେ ଟିଭି, କମ୍ପ୍ୟୁଟର, ମୋବାଇଲ ଆଦି ଆମ ଦୈନଦିନ ଜୀବନରେ ଗୁରୁତ୍ୱପୂର୍ଣ୍ଣ ଗ୍ରହଣ କରିଛି। ଏସବୁରେ ବ୍ୟସ୍ତ ରହି କେତେକ ନିଜର ବାସ୍ତବ ଜୀବନରେ ଜୀବନସାଥିଙ୍କ ପ୍ରତି ଅବହେଳା ପ୍ରଦର୍ଶନ କରୁଛନ୍ତି। ଫଳରେ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହେଉଥିବା ବହୁ ଘଟଣା ଘଟୁଥିବା ଲକ୍ଷ୍ୟ କରାଯାଉଛି। ତେବେ ଅଧିକ ସିରିଏଲ୍ ଦେଖିଲେ ପାରିବାରିକ ଜୀବନରେ ଅଶାନ୍ତି ସୃଷ୍ଟି ହେଉଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ବହୁ କ୍ଷେତ୍ରରେ ଏଭଳି ଅଶାନ୍ତିର ଅନ୍ତ ଛାଡ଼ପତ୍ରରେ ହିଁ ଘଟୁଛି। ସୁଖୀ ଦାମ୍ପତ୍ୟ ଜୀବନରେ ଅଯଥା କୋର୍ଟ କଚେରୀ ମାମଲାର ଅନୁପ୍ରବେଶ ହେଉଛି। ସିରିଏଲ୍ରେ ଅଭିନୟ କରୁଥିବା ଚରିତ୍ରଙ୍କ ପ୍ରତି ଦର୍ଶକ ନିଜକୁ ଅଧିକ ଜଡ଼ିତ କରି ନେଉଛନ୍ତି। ଫଳରେ ସେମାନଙ୍କ ମନରେ ନିଜ ଜୀବନସାଥୀଙ୍କ ପ୍ରତି ବେଳେବେଳେ ନକାରାତ୍ମକ ଭାବନା ସୃଷ୍ଟି ହେଉଛି। କେତେକ ସିରିଏଲ୍ରେ ବିବାହ ପରବର୍ତ୍ତୀ ଜୀବନରେ ରହୁଥିବା ସମ୍ପର୍କକୁ ପ୍ରଦର୍ଶିତ କରାଯାଉଛି। ଏହାଯୋଗୁ ଦର୍ଶକମାନେ ମଧ୍ୟ ବେଶ୍ ପ୍ରଭାବିତ ହେଉଥିବା ଏହି ସର୍ଭେ ରିପୋର୍ଟରେ ଉଲ୍ଲେଖ କରାଯାଇଛି। ଧୀରେଧୀରେ ସେମାନଙ୍କ ଜୀବନ ଧାରଣ ଶୈଳୀରେ ପରିବର୍ତ୍ତନ ମଧ୍ୟ ଆସୁଛି। ୩୯୦ ଜଣ ଦମ୍ପତିଙ୍କ ଉପରେ ହୋଇଥିବା ସର୍ଭେରୁ ଏହା ଜଣାପଡ଼ିଛି। ଆମେରିକାର ମିସିଗାନସ୍ଥିତ ଏଲବିଅନ୍ କଲେଜ ପକ୍ଷରୁ ଏହି ସର୍ଭେ କରାଯାଇଥିଲା। ଟିଭି ସିରିଏଲ୍ ଯୋଗୁ ଦାମ୍ପତ୍ୟ ଜୀବନରେ ସୃଷ୍ଟି ହେଉଥିବା ସନ୍ତୁଷ୍ଟି, ରୋମାଣ୍ଟିକ୍ ରିଲେଶନ୍ଶିପ୍, ଆଶା-ଆକାଂକ୍ଷା, ପ୍ରତିଶ୍ରୁତିବଦ୍ଧତା, ରୋମାନ୍ସ ଆଦି ଉପରେ ପ୍ରଶ୍ନ ପଚରା ଯାଇଥିଲା। ଅଧାରୁ ଅଧିକ ଦମ୍ପତି ଟିଭି ସିରିଏଲ୍ ଯୋଗୁ ଚିନ୍ତାଧାରାରେ ପରିବର୍ତ୍ତନ ଆସିବା ସହିତ ଦାମ୍ପତ୍ୟ ଜୀବନରେ ଅଧିକାଂଶ ଶୈଳୀ ନକାରାତ୍ମକ ମନେ ହେଉଥିବା ପ୍ରକାଶ କରିଥିଲେ। ଦର୍ଶକ ବାସ୍ତବତା ଭୁଲି ମିଥ୍ୟା ଆଶାରେ ବଞ୍ଚିବାକୁ ଆରମ୍ଭ କରୁଥିବା ଗବେଷକ ଡ. ଜେରେମି ଓସବୋର୍ନ ସୂଚନା ଦେଇଛନ୍ତି। ଜୀବନସାଥିଙ୍କ ତୁଳନାରେ ଅନ୍ୟ ବ୍ୟକ୍ତି ବିଶେଷ ଅଧିକ ଆକର୍ଷକ ଲାଗିଥାନ୍ତି। ଏହା ଯୋଗୁ ସାଥୀଙ୍କ ପ୍ରତି ବିଶ୍ୱାସଘାତକତା କରିବା ଆରମ୍ଭ ହୋଇଥାଏ ବୋଲି ଓସବୋର୍ନ କହିଛନ୍ତି। ତେବେ ନିଜ ଉପରେ ନିୟନ୍ତ୍ରଣ ଆଣିଲେ ଏଭଳି ସମସ୍ୟା ସହଜରେ ଦୂର ହୋଇପାରିଥାଏ।
