ପୁରୀ ଅଫିସ,୭ା୧୨: ବାସେଳିସାହି ଥାନା ଆଇଆଇସି ଜୀବନାନନ୍ଦ ଜେନାଙ୍କୁ ଶେଷରେ ରବିବାର ବଦଳି କରାଯାଇଛି। ଜେନାଙ୍କୁ ପୁରୀ ଜିଲା ପୋଲିସ ମୁଖ୍ୟାଳୟରେ ଅବସ୍ଥାପିତ କରାଯାଇଛି। ବହୁ ଚର୍ଚ୍ଚିତ ପୁରୀ ହାଜତ ମୃତ୍ୟୁ ଘଟଣା ନେଇ ବାସେଳିସାହି ଥାନା ଅଧିକାରୀଙ୍କୁ ବଦଳି କରିବା ଲାଗି ଦାବି ହୋଇଆସୁଥିଲା। ଜେନାଙ୍କ ସ୍ଥାନରେ ବଳଙ୍ଗା ଥାନା ଆଇଆଇସି ସଞ୍ଜୀବ କୁମାର ପ୍ରଧାନଙ୍କୁ ନିଯୁକ୍ତି ଦିଆଯାଇଛି। ସେହିପରି କୁମ୍ଭାରପଡ଼ା ଥାନା ଆଇଆଇସି କୁଳମଣି ସେଠୀଙ୍କୁ ବଦଳି କରାଯାଇ ବଳିଆପଣ୍ଡା ଥାନା ଅଧିକାରୀ ଭାବେ ଅବସ୍ଥାପିତ କରାଯାଇଛି। ବଳିଆପଣ୍ଡା ଥାନା ଆଇଆଇସି ଚିନ୍ମୟ ରାଉତଙ୍କୁ ସି-ବିଚ୍ ଥାନା ଅଧିକାରୀ ଭାବେ ନିଯୁକ୍ତି ମିଳିଛି। କୁମ୍ଭାରପଡ଼ା ଥାନା ଏସ୍ଆଇ ସମରେନ୍ଦ୍ର ପାଇକରାୟଙ୍କୁ ବଦଳି କରାଯାଇ ବଳଙ୍ଗା ଥାନା ଓଆଇସି (ଅଫିସର୍ ଇନ୍ ଚାର୍ଜ) ଭାବେ ନିଯୁକ୍ତି ଦିଆଯାଇଛି।
ସୂଚନାଯୋଗ୍ୟ, କେ.ରମେଶ ନାମକ ଜଣେ ଯୁବକ ପୋଲିସ ହେପାଜତରେ ଥିବାବେଳେ ପ୍ରାଣ ହରାଇଥିଲେ। ପୋଲିସ ମାଡ଼ରେ ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବି କରିଥିଲେ। ଏହାକୁ ନେଇ ମୃତକଙ୍କ ପରିବାର ସମେତ ବିଭିନ୍ନ ସଙ୍ଗଠନ ଓ ରାଜନୈତିକ ଦଳ ଆନ୍ଦୋଳନକୁ ଓହ୍ଲାଇଥିଲେ। ଏହି ଘଟଣାରେ ପ୍ରଥମେ ତତ୍କାଳୀନ ଏସ୍ପି ଅଖିଳେଶ ସିଂଙ୍କୁ ବଦଳି କରାଯିବା ସହ ବାସେଳିସାହି ଥାନାର ୨ଜଣ କର୍ମଚାରୀଙ୍କୁ ନିଲମ୍ବନ କରାଯାଇଥିଲା। ତେବେ ଥାନା ଆଇଆଇସିଙ୍କୁ ବଦଳି କରା ନ ଗଲେ ତଦନ୍ତ ବାଟବଣା ହେବ ବୋଲି ବିଭିନ୍ନ ସଙ୍ଗଠନ ଅଭିଯୋଗ କରିଆସୁଥିଲେ। ଅନ୍ୟପକ୍ଷରେ ଆଉ କେତେକ ଅନୁଷ୍ଠାନ ଆଇଆଇସିଙ୍କୁ ବଦଳି ନ କରିବା ନେଇ ଦାବି କରୁଥିଲେ। ହେଲେ ଶେଷରେ ଘଟଣାର ୧୬ଦିନ ପରେ ଥାନା ଅଧିକାରୀ ଜେନାଙ୍କୁ ବଦଳି କରାଯାଇଛି। ଇତିମଧ୍ୟରେ ରମେଶଙ୍କ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିସାରିଛି। ତାଙ୍କ ଶରୀରରେ ୧୬ଟି ଆଘାତ ଚିହ୍ନ ଥିବାବେଳେ ମୁଣ୍ଡରେ ରକ୍ତଜମାଟ ହୋଇଥିବା ରିପୋର୍ଟରେ ଦର୍ଶାଯାଇଛି। ଏହି ରିପୋର୍ଟ ଅନୁଯାୟୀ ଏବେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ସାଧାରଣରେ ଆଲୋଚନା ହେଉଛି।
