ବାଲେଶ୍ୱର ଅଫିସ, ୧୭।୩: ବାଲେଶ୍ୱର ସଦର ବ୍ଲକ କଷାଫଳ ପଞ୍ଚାୟତ ନିକଟସ୍ଥ ସମୁଦ୍ର ତଟରେ ଆସନ୍ତା ୧୯ତାରିଖରେ ବାରୁଣୀ ସ୍ନାନ ଅନୁଷ୍ଠିତ ହେବ। ବାରୁଣୀ ସ୍ନାନ ଆମ ଓଡ଼ିଆ ସଂସ୍କୃତିରେ ଏକ ସ୍ବତନ୍ତ୍ର ସ୍ଥାନ ଗ୍ରହଣ କରିଛି। କଷାଫଳ ପଞ୍ଚାୟତ ନିକଟସ୍ଥ ସମୁଦ୍ର ତଟରେ ଆୟୋଜିତ ବାରୁଣୀ ମେଳାରେ ହଜାର ହଜାର ଶ୍ରଦ୍ଧାଳୁ ଆସି ବୁଡ଼ ପକାଇବାର ପରମ୍ପରା କାହିଁ କାଳରୁ ରହିଆସିଛି। ଏହି ପରିପ୍ରେକ୍ଷୀରେ ଶୁକ୍ରବାର ବାଲେଶ୍ୱର ଜିଲା ପରିଷଦ ଅଧ୍ୟକ୍ଷ ନାରାୟଣ ପ୍ରଧାନ ଏବଂ ସଦର ପଞ୍ଚାୟତ ସମିତି ଅଧ୍ୟକ୍ଷା ସୁନୀତା ବେହେରା ବାରୁଣୀ ଘାଟର ସ୍ଥିତି ଅନୁଧ୍ୟାନ କରିଛନ୍ତି। ମେଳାକୁ ଆସିବାକୁ ଥିବା ଶ୍ରଦ୍ଧାଳୁଙ୍କ ପାଇଁ ଆଇନଶୃଙ୍ଖଳା ନିୟନ୍ତ୍ରଣଠାରୁ ଆରମ୍ଭ କରି ପାନୀୟ ଜଳ ବ୍ୟବସ୍ଥା, ପୋଲିସ ଫୋର୍ସ ମୁତୟନ ରହି ଟ୍ରାଫିକ୍ ନିୟନ୍ତ୍ରଣ ପାଇଁ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ। ଏହି ମେଳା ନିୟନ୍ତ୍ରଣରେ ସହଯୋଗ କରିବା ପାଇଁ ବିଭିନ୍ନ ସ୍ବେଚ୍ଛାସେବୀ ସଂସ୍ଥା, ସ୍ଥାନୀୟ ଜନ ପ୍ରତିନିଧି, ଏବଂ ସାମାଜିକ କର୍ମୀମାନଙ୍କୁ ସାମିଲ କରିବା ପାଇଁ ପ୍ରଧାନ ଗୁରୁତ୍ୱ ଦେଇଥିଲେ। ସ୍ଥିତି ଅନୁଧ୍ୟାନ ସମୟରେ କଷାଫଳ ପଞ୍ଚାୟତର ଜନସାଧାରଣଙ୍କ ସମେତ ମାଧବ ମଣ୍ଡଳ, ବୈଦ୍ୟନାଥ ମାନ୍ନା, ସଞ୍ଜୟ ସରେନ, ପୂର୍ଣ୍ଣଚନ୍ଦ୍ର ବଡୁ, ସୁନିଲ ମଣ୍ଡଳ, ବିଧାନ ଚନ୍ଦ୍ର ଦାସ, ଶିବାନନ୍ଦ ପାତ୍ର, କାର୍ତ୍ତିକ ମାନ୍ନା, ବୈକୁଣ୍ଠ ଦଳାଇ ପ୍ରମୁଖ ଉପସ୍ଥିତ ରହିଥିଲେ।
