ନୂଆଦିଲ୍ଲୀ: ଚଳିତ ଆର୍ଥତ୍କ ବର୍ଷ ୪ର୍ଥ ତ୍ରୈମାସରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକୁ ସରକାର ୧୪,୫୦୦ କୋଟି ଟଙ୍କା ଯୋଗାଣ କରିପାରନ୍ତି। ଏହା ଉପରେ ଅର୍ଥ ମନ୍ତ୍ରଣାଳୟ ବିଚାର କରିପାରେ ବୋଲି ଏକ ରିପୋର୍ଟ ଆସିଛି। ଚଳିତ ଆର୍ଥତ୍କ ବର୍ଷର ପ୍ରଥମାର୍ଦ୍ଧରେ ସରକାର ବ୍ୟାଙ୍କଗୁଡିକର ଆର୍ଥତ୍କ ପରଫରମାନ୍ସ ସମୀକ୍ଷା କରିଛନ୍ତି। ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି, ମୋଟ ୧୨ ରାଷ୍ଟ୍ରାୟତ୍ତ ବ୍ୟାଙ୍କ ମଧ୍ୟରୁ ପଞ୍ଜାବ ଆଣ୍ଡ ସିନ୍ଧ ବ୍ୟାଙ୍କ ୫,୫୦୦ କୋଟି ଟଙ୍କାର ପୁଞ୍ଜି ଆବଶ୍ୟକ କରୁଛି। ନିୟାମକ ଆବଶ୍ୟକତା ପୂରଣ ଲାଗି ବ୍ୟାଙ୍କକୁ ଏଭଳି ପୁଞ୍ଜିର ଆବଶ୍ୟକତା ରହିଛି। ଏହି ବ୍ୟାଙ୍କର ଇକ୍ୱିଟି ଶେୟାରର ପ୍ରିଫରେନ୍ସିଆଲ ଆଲଟମେଣ୍ଟ ଦ୍ୱାରା ପୁଞ୍ଜି ଯୋଗାଣକୁ ଗତ ମାସରେ ସରକାର ଗୁରୁତ୍ୱ ଦେଇଛନ୍ତି। ୨୦୨୦-୨୧ ଲାଗି ପ୍ରଥମ ବ୍ୟାଚ୍ରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ଲାଗି ଅତିରିକ୍ତ ଖର୍ଚ୍ଚଦାବି ଅଧୀନରେ ପୁଞ୍ଜି ଯୋଗାଣ ପ୍ରସ୍ତାବକୁ ପାର୍ଲାମେଣ୍ଟ ମଞ୍ଜୁରୀ ପ୍ରଦାନ କରିଛି। ଏହାଦ୍ୱାରା ୨୦ ହଜାର କୋଟି ଟଙ୍କାର ପ୍ରସ୍ତାବକୁ ମଞ୍ଜୁରୀ ମିଳିଛି। ପଞ୍ଜାବ ଏବଂ ସିନ୍ଧ ବ୍ୟାଙ୍କକୁ ଏହା ମଧ୍ୟରୁ ୫,୫୦୦ କୋଟି ଟଙ୍କା ଯୋଗାଣ ହେବ।
ମୋଟ ଅର୍ଥ ମଧ୍ୟରୁ କେନ୍ଦ୍ର ସରକାରଙ୍କ ନିକଟରେ ଆଉ ୧୪,୫୦୦ କୋଟି ଟଙ୍କା ରହିଛି। କୋଭିଡ୍ ଯୋଗୁ ବ୍ୟାଙ୍କ ବିଭିନ୍ନ ସମସ୍ୟା ସାମ୍ନା କରିଛନ୍ତି। ୨୦୧୯-୨୦ରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକୁ ୭୦ ହଜାର କୋଟି ଟଙ୍କା ଯୋଗାଣ କରିବା ଲାଗି ସରକାର ପ୍ରସ୍ତାବ ଦେଇଥିଲେ। ଋଣ ଯୋଗାଣ ଦ୍ୱାରା ଅର୍ଥ ବ୍ୟବସ୍ଥାକୁ ଦୃଢ କରିବା ଦିଗରେ ସରକାରଙ୍କ ଲକ୍ଷ୍ୟ ରହିଥିଲା। ୨୦୨୦-୨୧ରେ ବ୍ୟାଙ୍କଗୁଡିକୁ ପୁଞ୍ଜି ଯୋଗାଣ ନେଇ ସରକାର ବଜେଟରେ କୌଣସି ପ୍ରସ୍ତାବ ରଖି ନାହାନ୍ତି। ବ୍ୟାଙ୍କ ବଜାରରୁ ଆବଶ୍ୟକ ମୁତାବକ ପୁଞ୍ଜି ଉଠାଇବା ନେଇ ସରକାର ଆଶା ରଖିଥିଲେ।
