ଲୋଇସିଂହା,୧୧।୮(ଡି.ଏନ.ଏ): ବଲାଙ୍ଗୀର ଶାନ୍ତିପଡା ନିବାସୀ ତଥା ବରଗଡ଼ ଜିଲା ବରପାଲିସ୍ଥିତ ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି)ର ଏଗ୍ରିକଲଚର ଅଧିକାରୀ ଦିବ୍ୟରଞ୍ଜନ ମିଶ୍ର(୩୮) ବୁଧବାର ରାତିରୁ ନିଖୋଜ ହୋଇଯାଇଛନ୍ତି। ତାଙ୍କ ବାଇକକୁ ଲୋଇସିଂହା ପୋଲିସ ସାଲେଭଟା ଅଙ୍ଗନଦୀ ପୋଲ ଉପରୁ ଉଦ୍ଧାର କରିଛି। ଦିବ୍ୟରଞ୍ଜନ ନଦୀକୁ ଡେଇଁଥିବା ସନ୍ଦେହରେ ଗୁରୁବାର ସକାଳୁ ସୁବର୍ଣ୍ଣପୁର ଜିଲା ଡୁଙ୍ଗରିପାଲି ଅଗ୍ନିଶମ ବିଭାଗ ନଦୀରେ ଖୋଜାଖୋଜି ଚଳାଇଛି। ହେଲେ ସନ୍ଧ୍ୟା ସୁଦ୍ଧା ତାଙ୍କର କୌଣସି ଖୋଜଖବର ମିଳିନାହିଁ। ଦିବ୍ୟରଞ୍ଜନ ନଦୀକୁ ଡେଇଁ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ଅପହରଣ କରି ନେଇଛି ତାହାକୁ ନେଇ ପୋଲିସ ତନାଘନା ଚଳାଇଛି।
ବୁଧବାର ଦିବ୍ୟରଞ୍ଜନ କ୍ଷେତ୍ର ଅଧୀନ ସୁବର୍ଣ୍ଣପୁର ଜିଲା ବିନକାକୁ ଯାଇ ସନ୍ଧ୍ୟାରେ ଘରକୁ ଫେରୁଥିବା ନେଇ ପରିବାର ଲୋକଙ୍କୁ ଫୋନ କରି ଜଣାଇଥିଲେ। ଫେରିବାରେ ବିଳମ୍ବ ହେବାରୁ ପରିବାର ଲୋକେ ତାଙ୍କ ମୋବାଇଲ ଫୋନକୁ ଯୋଗାଯୋଗ କରିବାରୁ ସୁଇଚ ଅଫ ରହିଥିଲା। ଅପରପକ୍ଷେ ବଲାଙ୍ଗୀର-ବରଗଡ଼ ୨୬ ନମ୍ବର ଜାତୀୟ ରାଜପଥ ସାଲେଭଟା ଅଙ୍ଗନଦୀ ପୋଲ ଉପରେ କେହି ଜଣେ ବାଇକ ରଖି କେହି ନଦୀକୁ ଡିଆଁ ମାରିଥିବା କେତେକ ଲୋକେ ସେହି ରାତିରେ ସାଲେଭାଟ ପୋଲିସକୁ ସୂଚନା ଦେଇଥିଲେ।
ସାଲେଭଟା ପୋଲିସ ଓ ଡୁଙ୍ଗରିପାଲି ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ କରିଥିଲେ ହେଁ କୌଣସି ସନ୍ଧାନ ପାଇ ନ ଥିଲେ। ଗୁରୁବାର ସକାଳେ ଓଡ୍ରାଫ ଟିମ୍ ଘଟଣାସ୍ଥଳରୁ ନଦୀର ଦିଗଶିରା ଯାଏ ଖୋଜାଖୋଜି କରିଥିଲେ। ନଦୀରେ ପାଣିସ୍ରୋତ ଅଧିକ ଥିବା ଯୋଗୁ ଖୋଜିବାରେ ସମସ୍ୟା ହେଉଥିବା ଓଡ୍ରାଫ ଦଳ କହିଛି। ସାଲେଭଟା ଫାଣ୍ଡି ଅଧିକାରୀ ସୁଶାନ୍ତ ଭୋଇ କହିଛନ୍ତି, ରାତି ପ୍ରାୟ ୧୧ଟାରେ କେହି ଜଣେ ନଦୀକୁ ଡେଉଁଥିବା ବରଗଡ଼ ଅମ୍ବାପାଲି ଅଞ୍ଚଳର ଜନୈକ ବ୍ୟକ୍ତି ଦେଖିଥିବା ପୋଲିସକୁ ସୂଚନା ଦେଇଥିଲେ। ତେବେ ଦିବ୍ୟରଞ୍ଜନଙ୍କ ବିନିକାସ୍ଥିତ ପିଏନ୍ବିର ଷ୍ଟାଫ ବିନିକା ଥାନାରେ ନିଖୋଜ ଅଭିଯୋଗ କରିଛନ୍ତି। ଅପରପକ୍ଷରେ ଦିବ୍ୟରଞ୍ଜନଙ୍କର କାହାରି ସହ ଶତ୍ରୁତା ନ ଥିଲା। ଏପରିକି ସେ ଆମତ୍ହତ୍ୟା କଲା ଭଳି ଲୋକ ନୁହନ୍ତି। ତାଙ୍କୁ ଅପହରଣ କରାଯାଇ ଥାଇ ପାରେ ବୋଲି ତାଙ୍କ ପରିବାର ଲୋକେ କହିଛନ୍ତି।
