ଢାକା,୧୭।୧୧:ବାଂଲାଦେଶ କ୍ରିକେଟର ଶାକିବ ଅଲ ହାସନଙ୍କୁ ଫେସବୁକରେ ହତ୍ୟା ଧମକ ଦିଆଯିବା ପରେ ସେ ସୋସିଆଲ ମିଡିଆରେ କ୍ଷମା ମାଗିଛନ୍ତି। ଶାକିବ କାଳୀ ପୂଜାରେ ସାମିଲ ହେବା ପାଇଁ କୋଲକାତା ଆସିଥିଲେ ଏବଂ ଏହି କାରଣରୁ ତାଙ୍କୁ ହତ୍ୟା ଧମକ ଦିଆଯାଇଥିବା ଜଣାପଡିଛି। ମୋହସିନ ତାଲୁକତାର ନାମକ ଜଣେ ବ୍ୟକ୍ତି ତାଙ୍କ ଫେସବୁକ ଆକାଉଣ୍ଟରେ ଲାଇଭ ଭିଡିଓ ସମୟରେ ଶାକିବଙ୍କୁ ହତ୍ୟା ଧମକ ଦେଇଥିଲେ। ବାଂଲାଦେଶର ସିଲହେଟ ସହରର ମୋହସିନ ତାଲୁକଦାର କହିଥିଲେ ଯେ ଶାକିବଙ୍କ କାର୍ଯ୍ୟକଳାପ ମୁସଲମାନମାନଙ୍କୁ ଅପମାନିତ କରିଛି। ମୋହସିନ କହିଛନ୍ତି ଯେ ଯଦି ଶାକିବଙ୍କୁ ହତ୍ୟା କରିବା ପାଇଁ ତାଙ୍କୁ ଢାକା ଆସିବାକୁ ପଡିବ ତେବେ ସେ ଆସିବେ। ଏହା ପରେ ଶାକିବ ଅଲ-ହାସନ ସୋସିଆଲ ମିଡିଆରେ ଏକ ଭିଡିଓ ଶେୟାର କରି କ୍ଷମା ମାଗିଛନ୍ତି।
ସୋସିଆଲ ମିଡିଆରେ ଭିଡିଓ ଶେୟାର କରି ଶାକିବ କହିଛନ୍ତି ଯେ ଯଦି ମୁଁ ତୁମର ଭାବନାକୁ ଆଘାତ ଦେଇଛି ତେବେ ଜଣେ ଗର୍ବିତ ମୁସଲମାନ ଭାବରେ ମୁଁ ତୁମ ସମସ୍ତଙ୍କୁ କ୍ଷମା ମାଗୁଛି। ସେ ଆହୁରି ମଧ୍ୟ କହିଛନ୍ତି ଯେ ସେ ପୂଜା କାର୍ଯ୍ୟକ୍ରମର ଉଦଘାଟନ କରି ନ ଥିଲେ, କେବଳ ସେହି କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିଲେ। ସେଠାରେ ଥିବାବେଳେ ଧର୍ମ ବିଷୟରେ କୌଣସି ଆଲୋଚନା କରାଯାଇ ନଥିଲା। ମୋର ବିଶ୍ୱାସ ଯେ ଇସଲାମ ଶାନ୍ତିର ଧର୍ମ ଅଟେ। ମୁଁ ସର୍ବଦା ଇସଲାମର ପ୍ରତ୍ୟେକ ପ୍ରଥା ଅନୁସରଣ କରିବାକୁ ଚେଷ୍ଟା କରେ। ହଁ, ଆମେ ଭୁଲ କରିଥାଉ, କିନ୍ତୁ ମୁଁ ଜଣେ ଭଲ ମୁସଲମାନ ହେବା ପାଇଁ ଶିଖିବାକୁ ଚେଷ୍ଟା କରେ। ମୁଁ କେବଳ କହିବାକୁ ଚାହେଁ ଯେପର୍ଯ୍ୟନ୍ତ ଆମେ ଏକଜୁଟ ରହିଲେ ହିଁ ଆମେ ଶକ୍ତିଶାଳୀ ହୋଇପାରିବା। ଆମେ ମୁସଲମାନମାନେ ସର୍ବଦା ଏକ ହୋଇ ରହିବୁ ବୋଲି ଶାକିବ କହିଛନ୍ତି। ସୂଚନାଯୋଗ୍ୟ, ନଭେମ୍ବର ୧୨ରେ କୋଲକାତାରେ ଏକ କାର୍ଯ୍ୟକ୍ରମ ସମୟରେ ଶାକିବ କହିଥିଲେ ଯେ, କୋଲକାତା ମୋ ଘର ପରି, ମୁଁ ଏଠାକୁ ଆସିବାର ସୁଯୋଗକୁ ହାତଛଡ଼ା କରିବାକୁ ଚାହେଁ ନାହିଁ। ଆମେ ସମସ୍ତେ ପ୍ରାର୍ଥନା କରିବା ଉଚିତ ଯେ ଉଭୟ ପକ୍ଷର ସମ୍ପର୍କ ସବୁଦିନ ପାଇଁ ମଜଭୁତ ରହୁ।
