ଅଲ ଅମରାଟ୍,୧୯।୧୦: ଚଳିତ ଟି୨୦ ବିଶ୍ୱକପ୍ ଲାଗି ଚାଲିଥିବା ଯୋଗ୍ୟତା ପର୍ଯ୍ୟାୟ ଇଭେଣ୍ଟରେ ଓମାନକୁ ୨୬ ରନ୍ରେ ହରାଇ ଦେଇଛି ବାଂଲାଦେଶ। ବିଶ୍ୱ ଟି୨୦ ଦଳଗତ ମାନ୍ୟତାରେ ୬ଷ୍ଠ ସ୍ଥାନରେ ଥିବା ବାଂଲାଦେଶ ପାଇଁ ଏହା ବଡ଼ କଥା ନୁହେଁ। କିନ୍ତୁ ମ୍ୟାଚ୍ରେ ଏକଦା ଏଭଳି ସ୍ଥିତି ସୃଷ୍ଟି ହୋଇଥିଲା, ଯେଉଁଠାରେ ଓମାନ ଶକ୍ତିଶାଳୀ ବାଂଲାଦେଶଠାରୁ ଖୁବ୍ ଆଗରେ ମନେ ହେଉଥିଲା।
ପ୍ରଥମେ ବ୍ୟାଟିଂ କରିଥିବା ବାଂଲାଦେଶ ୧୩ ଓଭରରେ ୨ ଉଇକେଟ ହରାଇ ୧୦୧ ରନ୍ କରିଥିଲା। କ୍ରିଜ୍ରେ ଶାକିବ ଅଲ ହାସନ (୪୨) ଓ ମହମ୍ମଦ ନଇମ (୬୪)ଙ୍କ ଭଳି ସେଟ୍ ବ୍ୟାଟ୍ସମ୍ୟାନ ଥିଲେ। କିନ୍ତୁ ଓମାନର ବିଲାଲ ଖାନ ଓ ଫ୍ୟାଜ ବଟ ମିଳିତ ଭାବେ ୬ ଉଇକେଟ ନେଇ ବାଂଲାଦେଶକୁ ରୋକି ଦେଇଥିଲେ ୧୫୩ ରନ୍ରେ।
ଆରମ୍ଭରୁ ଓମାନ ପାଇଁ ବିସ୍ଫୋରକ ବ୍ୟାଟିଂ କରିଥିଲେ ଜତିନ୍ଦର ସିଂ। ସେ ଆଉଟ୍ ହେବା ପୂର୍ବରୁ ୪ ଚୌକା ଓ ୧ ଛକା ବଳରେ ୪୦ ରନ୍ କରିଥିଲେ। ତାଙ୍କ ସହ କାଶ୍ୟପ ପ୍ରଜାପତି (୨୧) ମିଶି ବାଂଲାଦେଶର ବୋଲରଙ୍କୁ ପାଓ୍ବରପ୍ଲେରେ ପାଣି ପିଆଇ ଦେଇଥିଲେ। କିନ୍ତୁ ମୁସ୍ତାଫିଜୁର ରେହମାନ ୪ ଓ ଶାକିବ ୩ ଉଇକେଟ ନେଇ ବଦଳି ଦେଇଥିଲେ ମ୍ୟାଚ୍ର ଭାଗ୍ୟ। ଶେଷ ପର୍ଯ୍ୟନ୍ତ ଖେଳିଥିବା ଓମାନ ୯ ଉଇକେଟ ହରାଇ ୧୨୭ ରନ୍ କରିବାକୁ ସକ୍ଷମ ହୋଇଥିଲା।
