ନୂଆଦିଲ୍ଲୀ,୧।୪: ବାଂଲାଦେଶ ଅନ୍ତରୀଣ ସରକାରର ଉପଦେଷ୍ଟା ମହମ୍ମଦ ୟୁନୁସ୍ ବଙ୍ଗୋପସାଗର ଅଞ୍ଚଳରେ କ୍ଷମତା ବିସ୍ତାର ପାଇଁ ଚାଇନାକୁ ଆମନ୍ତ୍ରଣ କରିଛନ୍ତି, ଯାହା ପରୋକ୍ଷରେ ଭାରତର ଉତ୍ତରପୂର୍ବାଞ୍ଚଳ ରାଜ୍ୟଗୁଡ଼ିକ ପାଇଁ ବିପଦ ସୃଷ୍ଟି କରିବ। ଗତ ସପ୍ତାହରେ ୪ ଦିନିଆ ବେଜିଂ ଗସ୍ତରେ ଯାଇଥିବା ୟୁନୁସ୍ କହିଛନ୍ତି, ପଶ୍ଚିମ ପାର୍ଶ୍ୱରେ ବାଂଲାଦେଶ ଦ୍ୱାରା ୭ ଭଉଣୀ ଭାବେ ପରିଚିତ ଭାରତର ୭ ଉତ୍ତରପୂର୍ବାଞ୍ଚଳ ରାଜ୍ୟ ଅବରୋଧ ହୋଇ ରହିଛି। ସେହି ରାଜ୍ୟଗୁଡ଼ିକ ସମୁଦ୍ରରେ ପହଞ୍ଚତ୍ବାର ସୁଯୋଗ ନାହିଁ। ଉକ୍ତ ଅଞ୍ଚଳର ସମୁଦ୍ରରେ କେବଳ ବାଂଲାଦେଶ ତତ୍ତ୍ୱାବଧାରକ ହୋଇଥିବାରୁ ଚାଇନା ସେଠାରେ ଅର୍ଥନୈତିକ ଭିତ୍ତି ସ୍ଥାପନ କରିବାକୁ ୟୁନୁସ୍ ପ୍ରୋତ୍ସାହିତ କରିଛନ୍ତି। ଉକ୍ତ ଅଞ୍ଚଳରେ ବେଜିଂ ପାଇଁ ବ୍ୟାପକ ସମ୍ଭାବନା ରହିଛି, ଯେଉଁଠି ଅର୍ଥନୈତିକ ସମ୍ପ୍ରସାରଣ, ସାମଗ୍ରୀ ଉତ୍ପାଦନ, ବିପଣନ ଓ ଅନ୍ୟ ଦେଶକୁ ରପ୍ତାନି କରାଯାଇପାରିବ। ଚାଇନା କର୍ତ୍ତୃପକ୍ଷଙ୍କ ସହ ୟୁନୁସ୍ଙ୍କ ଏହି କଥାବାର୍ତ୍ତାର ଭିଡିଓ ସୋସିଆଲ ମିଡିଆରେ ବ୍ୟାପକ ପ୍ରସାର ହେବାରେ ଲାଗିଛି। ୟୁନୁସ୍ଙ୍କ ଏଭଳି ଉଦ୍ୟମ ଅପ୍ରୀତିକର ବୋଲି ପ୍ରତିରକ୍ଷା ବିଶେଷଜ୍ଞମାନେ କହିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅର୍ଥନୈତିକ ଉପଦେଷ୍ଟା ପରିଷଦ ସଦସ୍ୟ ଥିବା ସଞ୍ଜୀବ ସାନ୍ୟାଲ ଉକ୍ତ ଭିଡିଓକୁ ଏକ୍ସ’ରେ ଶେୟାର କରି ଲେଖିଛନ୍ତି, ଭାରତର ୭ ଲ୍ୟାଣ୍ଡଲକ୍ଡ ରାଜ୍ୟ ରହିଥିବାରୁ ସେଠାରେ ଅର୍ଥନୈତିକ ବେସ୍ ସ୍ଥାପନ ପାଇଁ ୟୁନୁସ୍ ଚାଇନାକୁ ଖୋଲା ଆମନ୍ତ୍ରଣ କରିବା କୌତୂହଳପ୍ରଦ। ବାଂଲାଦେଶରେ ଚାଇନା ନିବେଶ କରିବା ସ୍ବାଗତଯୋଗ୍ୟ, କିନ୍ତୁ ୭ ଭାରତୀୟ ରାଜ୍ୟ ସମ୍ପର୍କରେ ଉଲ୍ଲେଖ କରାଯିବାର ଅଭିପ୍ରାୟ କ’ଣ ବୋଲି ସେ ପ୍ରଶ୍ନ କରିଛନ୍ତି।
ଢାକା ସହ ସାମୁଦ୍ରିକ ସହଯୋଗ ବଢ଼ାଇବା ପାଇଁ ବେଜିଂ ରାଜି ହୋଇଥିବାରୁ ୟୁନୁସ୍ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗଙ୍କୁ ଧନ୍ୟବାଦ ଜଣାଇଥିଲେ। ବାଂଲାଦେଶର ମୋଙ୍ଗଲା ବନ୍ଦରର ଆଧୁନିକୀକରଣ ଏବଂ ସମ୍ପ୍ରସାରଣ ଦିଗରେ କାର୍ଯ୍ୟ କରିବା ପାଇଁ ଚାଇନିଜ୍ କମ୍ପାନୀ ଢାକା ସହ ଚୁକ୍ତି ସ୍ବାକ୍ଷର କରିଛି। ସେହିପରି ଚଟ୍ଟୋଗ୍ରାମରେ ଚାଇନା ଅର୍ଥନୈତିକ ଓ ଶିଳ୍ପାଞ୍ଚଳ ଜୋନ୍ର ବିକାଶ ଓ ସମ୍ପ୍ରସାରଣ ପାଇଁ ଦୁଇ ଦେଶ ସହମତ ହୋଇଛନ୍ତି। ଚାଇନା ମୋଙ୍ଗଲା ବନ୍ଦରର ଆଧୁନିକୀକରଣ ଓ ସମ୍ପ୍ରସାରଣରେ ୪୦୦ ନିୟୁତ ଡଲାର ବିନିଯୋଗ କରିବା ସହ ଅର୍ଥନୈତିକ ଓ ଶିଳ୍ପାଞ୍ଚଳ ଜୋନ୍ ପାଇଁ ୩୫୦ ନିୟୁତ ଡଲାର ଖର୍ଚ୍ଚ କରିବ। ବୈଷୟିକ ସହାୟତା ପାଇଁ ଅତିରିକ୍ତ ୧୫୦ ନିୟୁତ ଡଲାର ଯୋଗାଇଦେବାକୁ ବେଜିଂ ରାଜି ହୋଇଛି। ତିସ୍ତା ନଦୀ ସମେତ ଅନ୍ୟାନ୍ୟ ନଦୀଜଳ ପରିଚାଳନା କ୍ଷେତ୍ରରେ ଚାଇନା ବାଂଲାଦେଶକୁ ସହାୟତା କରିବାକୁ ୟୁନୁସ୍ ନିବେଦନ କରିଛନ୍ତି। ତିସ୍ତା ନଦୀ ଭାରତ ଦେଇ ଯାଇଛି। ବାଂଲାଦେଶର ପୂର୍ବ ସରକାର ଏନେଇ ଭାରତର ପ୍ରତ୍ୟକ୍ଷ ସହଯୋଗ ଚାହୁଁଥିବାବେଳେ ୟୁନୁସ୍ ସରକାର ବେଜିଂର ହସ୍ତକ୍ଷେପ ଚାହୁଁଛି।
