ଶାରଜା,୩୧।୧୦(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୫୨ତମ ମ୍ୟାଚ୍ରେ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଓ ଡେଭିଡ୍ ଓ୍ବାର୍ନରଙ୍କ ନେତୃତ୍ୱାଧୀନ ସନ ରାଇଜର୍ସ ହାଇଦ୍ରାବାଦ୍ ମୁହଁାମୁହିଁ ହେବେ। ଶନିବାର ସ୍ଥାନୀୟ ଶାରଜା କ୍ରିକେଟ ଗ୍ରାଉଣ୍ଡରେ ଖେଳାଯିବାକୁ ଥିବା ଏହି ଦ୍ୱିତୀୟ ମ୍ୟାଚ୍ରେ ବିଜୟୀ ହୋଇ ବାଙ୍ଗାଲୋର ପ୍ଲେ- ଅଫ୍ ସ୍ଥାନ ହାସଲ ଲକ୍ଷ୍ୟରେ ରହିଛି। ବାଙ୍ଗାଲୋର ଏପର୍ଯ୍ୟନ୍ତ ୧୨ଟି ମ୍ୟାଚ୍ ଖେଳି ୭ ବିଜୟ ୫ ପରାଜୟ ସହ ୧୪ ପଏଣ୍ଟ ହାସଲ କରି ତାଲିକାର ଦ୍ୱିତୀୟ ସ୍ଥାନରେ ରହିଛି। କ୍ରମାଗତ ଦୁଇଟି ମ୍ୟାଚ୍ରେ ପରାସ୍ତ ହୋଇ ବାଙ୍ଗାଲୋର ତା’ର ପ୍ରଶଂସକଙ୍କୁ ନିରାଶ କରିଛି। ଅନ୍ୟପଟେ ହାଇଦ୍ରାବାଦ୍ ଦମ୍ଦାର ପ୍ରଦର୍ଶନ କରି ଦିଲ୍ଲୀ କ୍ୟାପିଟାଲ୍ସକୁ ହରାଇବା ପରେ ଆତ୍ମବିଶ୍ୱାସ ଦୃଢ କରିଛି। ବାକିଥିବା ୨ଟି ମ୍ୟାଚ୍ରୁ ଗୋଟିଏରେ ବିଜୟୀ ହେଲେ ବାଙ୍ଗାଲୋର ପ୍ଲେ- ଅଫ୍ରେ ସ୍ଥାନ ହାସଲ କରିବ।
ପ୍ଲେ- ଅଫ୍ ଦୌଡ଼ରୁ ଏକମାତ୍ର ଦଳ ଭାବେ ଚେନ୍ନାଇ ସୁପର କିଙ୍ଗ୍ସ ବାଦ୍ ପଡିଛି। ତେବେ ଗତ ମ୍ୟାଚ୍ରେ କୋଲକାତା ନାଇଟ ରାଇଡର୍ସକୁ ହରାଇ ଚେନ୍ନାଇ ପ୍ଲେ- ଅଫ୍ ରେସ୍କୁ ଆହୁରି ରୋମାଞ୍ଚିତ କରିଛି। ବାଙ୍ଗାଲୋର ବାକି ଦୁଇଟି ମ୍ୟାଚ୍ରେ ପରାସ୍ତ ହେଲେ ମଧ୍ୟ କ୍ୱାଲିଫାଏ କରିପାରିବ। ତେବେ ସେଥିପାଇଁ ତାକୁ ଅନ୍ୟ ମ୍ୟାଚ୍ଗୁଡିକ ଫଳାଫଳ ଉପରେ ନିର୍ଭର କରିବାକୁ ପଡିବ। ଅବଶ୍ୟ ଗତ ଦୁଇଟି ମ୍ୟାଚ୍ରେ ପରାସ୍ତ ହୋଇଥିବାରୁ ଆର୍ସିବିର ନେଟ୍ ରନ ରେଟ୍ (ଏନ୍ଆରଆର) ପ୍ରଭାବିତ ହୋଇଛି।
ଅପରପକ୍ଷରେ ହାଇଦ୍ରାବାଦ ଏପର୍ଯ୍ୟନ୍ତ ୧୨ଟି ମ୍ୟାଚ୍ ଖେଳି ୫ ବିଜୟ, ୭ ପରାଜୟ ସହ ୧୦ ପଏଣ୍ଟ ହାସଲ କରି ତାଲିକାର ଷଷ୍ଠ ସ୍ଥାନରେ ରହିଛି। ତେଣୁ ପ୍ଲେ- ଅଫ୍ ଦୌଡ଼ରେ ସାମିଲ ରହିବା ପାଇଁ ହାଇଦ୍ରାବାଦ୍କୁ ବାକିଥିବା ଦୁଇଟି ମ୍ୟାଚ୍ରେ ଆର୍ସିବି ଓ ମୁମ୍ବାଇକୁ ହରାଇବା ଅପରିହାର୍ଯ୍ୟ ହୋଇପଡିଛି। ଦୁଇଟି ମ୍ୟାଚ୍ରେ ବିଜୟୀ ହେବା ମଧ୍ୟ ଯଥେଷ୍ଟ ନୁହେଁ। ଆର୍ସିବି (୧୪ ପଏଣ୍ଟ) ଓ କିଙ୍ଗ୍ସ ଇଲେଭେନ୍ ପଞ୍ଜାବ (୧୨ ପଏଣ୍ଟ) ମ୍ୟାଜିକ୍ ସଂଖ୍ୟା ୧୬ରେ ନ ପହଞ୍ଚିବା ଦରକାର। ଯଦି ଏହା ହୁଏ ଓ ୩ଟି ଯାକ ଦଳ ୧୪ ପଏଣ୍ଟରେ ସୀମିତ ରୁହନ୍ତି ତେବେ ଭଲ ଏନ୍ଆରଆର ସହିତ ହାଇଦ୍ରାବାଦ୍ ପ୍ଲେ- ଅଫ୍କୁ ଉଠିବ। ଆରସିବି ତା’ର ଆତ୍ମବିଶ୍ୱାସ ଫେରିପାଇବା ଦରକାର। ବୋଲିଂ, ବ୍ୟାଟିଂରେ ଉଭୟ ଦଳରେ କିଛିଟା ତ୍ରୁଟି ରହିଛି। ତେବେ ଦଳଗତ ଭାବେ ଉଭୟ ଦଳ ଭଲ ପ୍ରଦର୍ଶନ କରିବାର କ୍ଷମତା ରଖୁଛନ୍ତି। ତେଣୁ ଏହି ମ୍ୟାଚ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।
