ସୋନପୁର,୩।୨: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସୁବର୍ଣ୍ଣପୁର ଜିଲା ବିନିକା ବନପାଳ ଜଗବନ୍ଧୁ ବାରିକଙ୍କ ବାସଭବନ ଓ ଅଫିସରେ ଭିଜିଲାନ୍ସ ପକ୍ଷରୁ ବୁଧବାର ଚଢାଉ କରାଯାଇଛି। ଭିଜିଲାନ୍ସ ଟିମ୍ ଜଗବନ୍ଧୁଙ୍କ ସୋନପୁର ସହର ଶାନ୍ତିନଗରସ୍ଥିତ ଦ୍ୱିତଳ କୋଠା, ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ନିର୍ମାଣାଧୀନ ଦୁଇ ମହଲା କୋଠା ଓ ବିନିକା ବନପାଳଙ୍କ କାର୍ଯ୍ୟାଳୟରେ ଏକକାଳୀନ ଚଢାଉ କରିଥିଲେ । ତନଖି ସମୟରେ ବନପାଳ ଓ ସମ୍ପର୍କୀୟଙ୍କ ନାମରେ ଥିବା ୧ କୋଟି ୪୧ ଲକ୍ଷ ୬୮ ହଜାର ଟଙ୍କାର ସମ୍ପତ୍ତି ଠାବ ହୋଇଛି ।
ପ୍ରକାଶ ଯେ, ୨୨ ବର୍ଷ ପୂର୍ବରୁ ଜଗବନ୍ଧୁ ଚାକିରି ଜୀବନ ଆରମ୍ଭ କରିଥିଲେ। କନ୍ଧମାଳ ଓ ସୁବର୍ଣ୍ଣପୁର ଜିଲାର ବିଭିନ୍ନ ଫରେଷ୍ଟ ସେକ୍ସନରେ ଚାକିରି ପରେ ଏବେ ବିନିକାରେ କାର୍ଯ୍ୟରତ ଅଛନ୍ତି । ସେ ବେଆଇନ ଭାବେ ଆୟ ବର୍ହିଭୂତ ସମ୍ପତ୍ତି ଠୁଳ କରିଥିବା ନେଇ ସମ୍ବଲପୁର ଭିଜିଲାନ୍ସ ଏସ୍ପିଙ୍କ ନିକଟରେ ଅଭିଯୋଗ ହୋଇଥିଲା । ଏସ୍ପି ସାରା ଶର୍ମାଙ୍କ ନିର୍ଦ୍ଦେଶ କ୍ରମେ ସମ୍ବଲପୁର ଭିଜିଲାନ୍ସ ଡିଏସ୍ପି ମାରିୟାନ୍ସ ମିଞ୍ଜ୍, ସୁଜାତା ପଣ୍ଡାଙ୍କ ନେତୃତ୍ୱରେ ଏକ ଟିମ୍ ଏକକାଳୀନ ସମ୍ପତ୍ତିର ଯାଞ୍ଚ କରିଥିଲେ।
ବିଭାଗ ପକ୍ଷରୁ ପ୍ରଦତ୍ତ ସମ୍ପତ୍ତି ତାଲିକା ଅନୁଯାୟୀ ଜଗବନ୍ଧୁଙ୍କ ସୋନପୁର ଟାଉନରେ ଥିବା ଦୁଇଟି କୋଠାର ମୂଲ୍ୟ ୧ କୋଟିରୁ ଊର୍ଦ୍ଧ୍ୱ ହେବ । ତାଙ୍କ ନାମରେ ବୌଦ୍ଧରେ ୫ଟି ଓ ସୋନପୁରରେ ୨ଟି ପ୍ଲଟ ରହିଛି । ଏହାଛଡା ଅନ୍ୟାନ୍ୟ ସମ୍ପତ୍ତି ମଧ୍ୟ ଠାବ ହୋଇଛି। ଜଗବନ୍ଧୁ କେଉଁ ଉତ୍ସରୁ ଏହି ସମ୍ପତ୍ତିର ଅଧିକାରୀ ହୋଇଛନ୍ତି ବିଭାଗ ପକ୍ଷରୁ ତାହାର ତଦନ୍ତ ଚାଲିଛି ।
