କୁଚିଣ୍ଡା,୨୭ା୨(ବିରଞ୍ଚି ଦର୍କା): ରାଜ୍ୟ ସରକାର ଓଡ଼ିଶାରେ ମୋଟ ୩୫ଟି ନୂତନ ବିଜ୍ଞାପିତ ଅଞ୍ଚଳ ପରିଷଦ ଘୋଷଣା କରିଛନ୍ତି। ହେଲେ ପୂର୍ବ ଦାବି ଅନୁଯାୟୀ ସମ୍ବଲପୁର ଜିଲାର ବାମରା ଏଥିରୁ ବାଦ୍ ପଡିଛି। ଏଥିସହ ରେଳ ସମସ୍ୟା ନେଇ ଦୀର୍ଘ ଦିନରୁ ରହିଥିବା ଦାବି ଉପରେ ମଧ୍ୟ ପଦକ୍ଷେପ ନିଆଯାଉ ନାହିଁ। ଏହାର ପ୍ରତିବାଦରେ ୨୮ରେ ବାମରାରେ ୧୨ଘଣ୍ଟିଆ ବନ୍ଦ ପାଳନ ସହ ଆଗାମୀ ନିର୍ବାଚନରେ ଅଞ୍ଚଳବାସୀଙ୍କ ପକ୍ଷରୁ ଭୋଟ ବର୍ଜନ ଚେତାବନୀ ଦିଆଯାଇଛି। ନାଗରିକ କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି।
ବାମରା ନାଗରିକ କମିଟି ସଭାପତି ଦୁର୍ଗାପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ପୂର୍ତ୍ତବିଭାଗ ବଙ୍ଗଳାରେ ଅନୁଷ୍ଠିତ ବୈଠକରେ ହୋଇଥିବା ଆଲୋଚନା ମୁତାବକ ଆସନ୍ତା୨୮ ତାରିଖ ସକାଳ ୬ରୁ ସା ୬ଟା ପର୍ଯ୍ୟନ୍ତ ବାମରା ବନ୍ଦ କରାଯିବ। ଦୀର୍ଘ ଏକ ଦଶନ୍ଧିରୁ ଊଦ୍ଧର୍ବ ସମୟ ଧରି ସରକାରଙ୍କଠାରେ ବାମରାକୁ ଏନ୍ଏସି କରାଯିବାକୁ ପ୍ରସ୍ତାବ ଦିଆଯାଇଆସୁଛି। ଆବଶ୍ୟକ ହେଉଥିବା ସମସ୍ତ ମାନଦଣ୍ଡ ପୂରଣ ହେଉଥିଲେ ସୁଦ୍ଧା ରାଜ୍ୟ ସରକାର ବାମରାକୁ ଉପେକ୍ଷା କରିଥିବାରୁ ବୈଠକରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଏହାଛଡା ପ୍ରସ୍ତାବିତ ବାରକୋଟ-ଦେବଗଡ ନୂତନ ରେଳ ଲାଇନକୁ କୁଚିଣ୍ଡା-କେଶାଇବାହାଲ ବାମରା ରେଳ ଲାଇନ ସହ ସଂଯୋଗ କରିବା, ପୂର୍ବରୁ ବାମରାରେ ଉଚ୍ଛେଦ ହୋଇଥିବା ଟ୍ରେନ ରହଣିକୁ ପୁନଃ କାର୍ଯ୍ୟକ୍ଷମ କରିବା, ବାମରା ଷ୍ଟେଶନର ଉଭୟ ପାର୍ଶ୍ୱରେ ଅଣ୍ଡର ପାସ ନିର୍ମାଣ ଆଦି ଦାବି ଉପରେ ବୈଠକରେ ଆଲୋଚନା ହୋଇଛି।
ଉକ୍ତ ଦିନ ସ୍କୁଲ, କଲେଜ, ସରକାରୀ ବେସରକାରୀ ଅଫିସ, ବ୍ୟାଙ୍କ, ପୋଷ୍ଟ ଅଫିସ, ଦୋକାନ ବଜାର, ଯାନ ବାହନ ଚଳାଚଳ ବନ୍ଦ କରାଯିବାକୁ ନିଷ୍ପତ୍ତି ହୋଇଛି। ବୈଠକରେ ନାଗରିକ କମିଟି ଉପସଭାପତି ମନମୋହନ ସାହୁ, ସମ୍ପାଦକ ଜ୍ୟୋତି କୁମାର ଲାଠ, କଂଗ୍ରେସ ସଭାପତି ପ୍ରଶାନ୍ତ କୁମାର ଶତପଥି, ବ୍ୟବସାୟୀ ସଂଘ ସଭାପତି ମନୋଜ ଚୌଧୁରୀ, ପ୍ରମୋଦ ପାଲ, ପୂର୍ବତନ ବ୍ଲକ ଅଧ୍ୟକ୍ଷ ପ୍ରଦୀପ କୁମାର ମିଶ୍ର, ବିଜେଡି ବ୍ଲକ ସଭାପତି ଅରବିନ୍ଦ ସାହୁ, ସନ୍ଦୀପ ଖଣ୍ଡେଲୱାଲ, ଖବରଦାତା ମନୋଜ ରାଜ ଓ ସନ୍ତୋଷ ଶୁକ୍ଳା, ସୁଶିଳ ପ୍ରସାଦ, ରମେଶ ଶର୍ମାଙ୍କ ସମେତ ବିଭିନ୍ନ ଅନୁଷ୍ଠାନର କର୍ମକର୍ତ୍ତା ସାମିଲ ହୋଇଥିଲେ।
