କୁଆମରା,୧୨।୭(ଡି.ଏନ.ଏ.) ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଅଧୀନ ଶିଳଘାଟୀ ପଞ୍ଚାୟତରେ ସ୍ଥାପିତ ବାଲିଯୋଡ଼ା ସ୍ବାସ୍ଥ୍ୟଉପକେନ୍ଦ୍ର ରକ୍ଷଣାବେକ୍ଷଣ ଅଭାବରୁ ଭୂତକୋଠି ପାଲଟିଛି। ଖୁଣ୍ଟା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଏହି ଉପକେନ୍ଦ୍ର କାର୍ଯ୍ୟ କରୁଛି। ବାଲିଯୋଡ଼ା, ଗୁରଡିହା, ଅତାନଟୀ, ଖଡିଆବସା, କେନ୍ଦୁଆମୁଣ୍ଡି, ନବକିଶୋରପୁର ଓ ଡାହାଣୀବୁଡା ଆଦି ମୋଟ ୭ଟି ଗ୍ରାମର ୪ହଜାର ୮ଶହ ୩୫ ଲୋକ ଏହି ଉପକେନ୍ଦ୍ର ଉପରେ ନିର୍ଭର କରନ୍ତି।
ଏହି ୭ଟି ଗ୍ରାମର ନବେ ପ୍ରତିଶତ ଆଦିବାସୀ ସମ୍ପ୍ରଦାୟର ଲୋକଙ୍କୁ ଉପଯୁକ୍ତ ସ୍ବାସ୍ଥ୍ୟସେବା ଯୋଗାଇ ଦେବା ନିମନ୍ତେ ୧୯୭୦ରେ ସ୍ଥାପନ ହୋଇଥିଲା ଉପକେନ୍ଦ୍ର। ହେଲେ ଲକ୍ଷ୍ୟ ବାସ୍ତବତାଠାରୁ ବହୁ ଦୂରରେ ରହିଛି। ସତେବେଳେ ଉକ୍ତ ଘର ମାଟି କାନ୍ଥ ଓ ଆଜବେଷ୍ଟସ୍ରେ ତିଆରି ହୋଇଥିଲା। ମାତ୍ର ୧୦ବର୍ଷ ମଧ୍ୟରେ ଘର ଅବସ୍ଥା ଦୁର୍ବଳ ହୋଇପଡିଥିବା ବେଳେ କାନ୍ଥ ଓ ଆଜବେଷ୍ଟସ ଫାଟି ଆଁ କରିଛି। ବର୍ଷାଦିନେ ଘର ମଧ୍ୟରେ ବର୍ଷାପାଣି ଲହଡ଼ି ମାରୁଛି। ଭିତରେ କାନ୍ଥ ଖଣ୍ଡ ଖଣ୍ଡ ଖସୁଛି। ସମସ୍ତ କବାଟ, ଝରକା ନଷ୍ଟ ହୋଇଯାଇଛି। ବିପଦସଙ୍କୁଳ ଘର ମଧ୍ୟରେ ସ୍ବାସ୍ଥ୍ୟକର୍ମୀ ସୁମନପ୍ରଭା ପରିଡା ସ୍ବାସ୍ଥ୍ୟସେବା ଯୋଗାଇ ଦେବାକୁ ଉଚିତ ନ ମଣି ବାରଣ୍ଡାରେ ବସି ସ୍ବାସ୍ଥ୍ୟସେବା ଯୋଗାଉଥିବା ଦେଖିବାକୁ ମିଳୁଛି। ପରବର୍ତ୍ତୀ ସମୟରେ ପାଚେରି ବି ନଷ୍ଟ ହୋଇଯାଇଛି। ଏଠାରେ ଅନୁଷ୍ଠିତ ହେଉଥିବା ମାସିକ ବୈଠକରେ ଅଙ୍ଗନଓ୍ବାଡି କର୍ମୀମାନେ ବସିବାକୁ ବାଧ୍ୟ ହେଉଛନ୍ତି। ଏହାର ପୁନଃ ନିର୍ମାଣ କରିବା ପାଇଁ ପୂର୍ବତନ ସରପଞ୍ଚ ଭାଦ ହଁାସଦା ଅନେକବାର ସ୍ବାସ୍ଥ୍ୟ ବିଭାଗକୁ ଜଣାଇଥିଲେ ମଧ୍ୟ ଆଜି ପର୍ଯ୍ୟନ୍ତ ଏ ଦିଗରେ କର୍ତ୍ତୃପକ୍ଷ ଦୃଷ୍ଟି ନ ଦେବା ପରିତାପର ବିଷୟ। ତେବେ ଖୁଣ୍ଟା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ବିପିଏମ୍ ଅନୁଭବ ପଟ୍ଟନାୟକ କହିଛନ୍ତି, ଜିଲା ମୁଖ୍ୟ କାର୍ଯ୍ୟାଳୟକୁ ପ୍ରସ୍ତାବ ପଠାଯାଇଛି। ତେବେ ଏ ଦିଗରେ କର୍ତ୍ତୃପକ୍ଷ ଦୃଷ୍ଟି ନ ଦେଲେ ଆଗାମୀ ଦିନରେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
