ବାରିପଦା ଅଫିସ,୧୯।୮- ଋତୁ ଅନୁଯାୟୀ ମୟୂରଭଞ୍ଜ ଜିଲାରେ ଭରପୁର ଥିବା ସବୁଜ ସୁନ୍ଦର ଓ ପ୍ରାକୃତିକ ଶୋଭା ଅନେକ ପର୍ଯ୍ୟଟକଙ୍କୁୁ ଆକର୍ଷିତ କରିଥାଏ। ବର୍ଷାଋତୁରେ ପର୍ଯ୍ୟଟକଙ୍କ ଗହଳି ଲାଗି ରହୁଥିବା ଜିଲାର ଏକ ମନୋରମ ସ୍ଥାନ ହେଲା ବାରିପଦା ସହରଠାରୁ ୧୭ କି.ମି. ଦୂର ଶାମାଖୁଣ୍ଟା ବ୍ଲକ ଅନ୍ତର୍ଗତ ବାଲିଡ଼ିହା ଡ୍ୟାମ୍। ଏଠାକାର ବିଶାଳ ଜଳାଶ୍ରୟରୁ ନିର୍ଗତ ଜଳରାଶିର ସୌନ୍ଦର୍ଯ୍ୟକୁ ନିଜ ମୋବାଇଲରେ ସାଇତି ରଖିବା ପାଇଁ ପ୍ରକୃତି ପ୍ରେମୀମାନେ ଭିଡ଼ ଜମାଉଛନ୍ତି। ସେଲ୍ଫି ଉଠାଇ ମଜା ନେଉଛନ୍ତି। ଜଳକ୍ରୀଡ଼ା, ସେଲ୍ଫିଜୋନ, ଆଲ୍ବମ ଓ ଫିଲ୍ମ ସୁଟିଂର ଆକର୍ଷଣ କେନ୍ଦ୍ର ପାଲଟିଛି ଏହି ଡ୍ୟାମ୍। ରାଜାରାଜୁଡ଼ା ଅମଳରେ ନିର୍ମାଣ ହୋଇଥିବା ଏହି ଡ୍ୟାମ୍ ଅଞ୍ଚଳକୁ ଜିଲା ତଥା ପଡ଼ୋଶୀ ବାଲେଶ୍ୱର, ଭଦ୍ରକ, କେନ୍ଦୁଝର ସମେତ ପଶ୍ଚିମବଙ୍ଗ ଓ ଝାଡ଼ଖଣ୍ଡ ରାଜ୍ୟର ଲୋକେ ବୁଲିବାକୁ ଆସିଥାନ୍ତି। ତେବେ ଡ୍ୟାମ୍ ପରିସରରେ ଆବଶ୍ୟକ ବ୍ୟବସ୍ଥା ଗ୍ରହଣ କରାଯାଉ ନ ଥିବାରୁ ପର୍ଯ୍ୟଟକମାନେ ଅସନ୍ତୋଷ ପ୍ରକାଶ କରୁଛନ୍ତି।
ଶିମିଳିପାଳର ପାହାଡ଼ ଚିରି ବୋହିଯାଉଥିବା ପଳପଳା ନଦୀରେ ୧୯୧୨ରେ ମୟୂରଭଞ୍ଜ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ଦ୍ୱାରା ବାଲିଡିହା ଡ୍ୟାମ୍ ନିର୍ମାଣ କରାଯାଇଥିଲା। କାମ ବଦଳରେ ଲୋକଙ୍କୁ ଖାଦ୍ୟ ଏବଂ ଚାଷୀଙ୍କୁ ପାଣି ଯୋଗାଇବା ଉଦ୍ଦେଶ୍ୟରେ ବିଦେଶୀ ଇଞ୍ଜିନିୟରଙ୍କ ଡିଜାଇନରେ ଏହାର ପରିକଳ୍ପନା କରାଯାଇଥିଲା। ବର୍ଷା ଦିନର ସଂରକ୍ଷିତ ଜଳକୁ ନିୟନ୍ତ୍ରିତ କରି ଚାଷଜମିକୁ ଜଳସେଚନ କରିବାର ବ୍ୟବସ୍ଥା ହୋଇଥିଲା। ତେବେ ଏଠାକାର ବନ୍ଧ ପୋତି ହୋଇଯାଇଥିବାରୁ ବର୍ଷର ଜୁଲାଇ, ଅଗଷ୍ଟ ଓ ସେପ୍ଟେମ୍ବର ମାସରେ ଉଦ୍ବୃତ୍ତ ଜଳରାଶି ତଳକୁ ଥିବା ଥାକଥାକ ପାହାଚରେ ପଡ଼ି ବୋହିଯିବା ଦୃଶ୍ୟ ସମସ୍ତଙ୍କୁ ଆକର୍ଷିତ କରେ। ଜଳରାଶିର ସ୍ରୋତ ପ୍ରଖର ନ ଥିବାରୁ ଛୋଟବଡ଼ ସମସ୍ତେ ଏହାର ମଜା ନେଇଥାନ୍ତି। ଶିମିଳିପାଳର ସବୁଜ ବନାନୀ ସାଙ୍ଗକୁ ବିଶାଳ ଜଳରାଶି ଓ ନୀଳ ଆକଶ ତଳେ ବୁଲିବାର ମଜା ଏଠାରେ ନିଆରା ା ଆକାଶରେ ବର୍ଷା ଉଠିଲେ ବାଲିଡ଼ିହା ଡ୍ୟାମକୁ ପ୍ରକୃତି ରାଣୀ ସୁନ୍ଦର ମୁକୁଟ ପିନ୍ଧାଇ ଦେଉଥିତ୍ବା ଦୃଶ୍ୟମାନ ହୁଏ ବୋଲି ଡ୍ୟାମ୍ ବୁଲିବାକୁ ଆସିଥିବା ସରସ୍ବତୀ ନାୟକ, ସୁଚେତା ମହାନ୍ତି ଓ ଆନନ୍ଦି ପାଣି କହିିଛନ୍ତି। ସେହିପରି ଅପରାହ୍ନରେ ଅସ୍ତଗାମୀ ସୂର୍ଯ୍ୟଙ୍କ ସୁନେଲୀ କିରଣ ଜଳରାଶିରେ ପଡ଼ିବା ଦୃଶ୍ୟ ମନ ମୋହିଥାଏ ବୋଲି ସେମାନେ ପ୍ରକାଶ କରିଛନ୍ତି।
ଏହି ସ୍ଥାନରେ ପର୍ଯ୍ୟଟକଙ୍କ ପାଇଁ ସୁରକ୍ଷା ବ୍ୟବସ୍ଥା, ବସିବା ଓ ରହିବା ପାଇଁ ସ୍ଥାନ ଓ ପିଇବା ପାଣିର ଆବଶ୍ୟକତା ରହିଛି ବୋଲି ସରୋଜ ନାୟକ, ଡେଜି ବାରିକ, ପୂଜା ପଟ୍ଟନାୟକ, ରତ୍ନମଞ୍ଜରୀ ବଳା ପ୍ରମୁଖ ପର୍ଯ୍ୟଟକ କହିଛନ୍ତି। କେବଳ ବର୍ଷା ଦିନ ନୁହେଁ ବର୍ଷ ତମାମ ଯେପରି ପର୍ଯ୍ୟଟକମାନେ ଏଠାକୁ ଆକର୍ଷିତ ହୋଇ ଆସିବେ ସେଥିନେଇ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରିବା ପାଇଁ ମତପ୍ରକାଶ ପାଉଛି। ଡ୍ୟାମ୍ର ପୁନରୁଦ୍ଧାର ଓ ପରିବେଶ ସ୍ବଚ୍ଛ ରଖିବା ସହିତ ପାର୍କ ନିର୍ମାଣ କରି ପର୍ଯ୍ୟଟନସ୍ଥଳୀର ମାନ୍ୟତା ପ୍ରଦାନ କଲେ ଆଗନ୍ତୁକଙ୍କ ସଂଖ୍ୟା ବୃଦ୍ଧି ପାଆନ୍ତା ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି।
