ମାଞ୍ଚେଷ୍ଟର, ୫ା୭ (ପି.ଟି.)-ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ କ୍ରିକେଟ ଟେଷ୍ଟ ପାଇଁ ଶନିବାର ୧୩ ଜଣିଆ ଇଂଲଣ୍ଡ କ୍ରିକେଟ ଦଳ ଘୋଷଣା କରାଯାଇଛି। ଏଥିରେ ଉଇକେଟକିପର ଜନି ବେୟାରଷ୍ଟୋ ଏବଂ ସ୍ପିନ ବୋଲିଂ ଅଲ୍ରାଉଣ୍ଡର ମୋଇନ୍ ଅଲିଙ୍କୁ ସ୍ଥାନ ମିଳିନାହିଁ। ଏହି ପ୍ରଥମ ‘ଜୈବ ସୁରକ୍ଷିତ’ ଟେଷ୍ଟ ମ୍ୟାଚ ଜୁଲାଇ ୮ରୁ ଖେଳାଯିବ। ନିୟମିତ ଅଧିନାୟକ ଜୋ ରୁଟ୍ଙ୍କ ଅନୁପସ୍ଥିତିରେ ବେନ୍ ଷ୍ଟୋକ୍ସ ଇଂଲଣ୍ଡ ଦଳର ନେତୃତ୍ୱ ନେବେ। ରୁଟ୍ଙ୍କ ସ୍ତ୍ରୀ ଦ୍ୱିତୀୟ ସନ୍ତାନର ମା ହେବାକୁ ଯାଉଥିବାରୁ ସେ ଛୁଟିରେ ଅଛନ୍ତି। ଦଳରେ ଅଲ୍ରାଉଣ୍ଡର ଷ୍ଟୋକ୍ସ ଏବଂ କ୍ରିସ୍ ଓକ୍ସଙ୍କ ବ୍ୟତୀତ ପେସ୍ବୋଲର ଜେମ୍ସ ଆଣ୍ଡରସନ, ଷ୍ଟୁଆର୍ଟ ବ୍ରଡ୍, ଜୋଫ୍ରା ଆର୍ଚର ଏବଂ ମାର୍କ ଉଡ୍ଙ୍କୁ ନିଆଯାଇଛି। ସ୍ପିନ୍ ବିଭାଗରେ ଇଂଲଣ୍ଡ ଡୋମିନିକ୍ ବିସ୍ଙ୍କୁ ନେଇଛି। ଜ୍ୟାକ୍ ଲିଚ୍ ମୁଖ୍ୟ ଦଳରୁ ବାଦ୍ ପଡ଼ିଛନ୍ତି, ହେଲେ ସେ ରିଜର୍ସ ଖେଳାଳିଙ୍କ ମଧ୍ୟରେ ରହିଛନ୍ତି। ସବୁଠାରୁ ଉଲ୍ଲେଖନୀୟ ବିଷୟ ହେଲା ଟେଷ୍ଟ ଦଳରୁ ବେୟାରଷ୍ଟୋ ଏବଂ ମୋଇନ ବାଦ ପଡ଼ିବା। ଖରାପ ଫର୍ମ ଯୋଗୁ ବେୟାରଷ୍ଟୋ ଇଂଲଣ୍ଡ ଦଳର ନ୍ୟୁଜିଲାଣ୍ଡ ଟୁର୍ରୁ ପ୍ରଥମେ ବାଦ୍ ପଡ଼ିଥିଲେ। କିନ୍ତୁ ଜୋ ଡେନ୍ଲିଙ୍କ ଇଞ୍ଜୁରୀ ଯୋଗୁ ସେ ଦଳରେ ସ୍ଥାନ ପାଇବାରେ ସମର୍ଥ ହୋଇଥିଲେ। ପରେ ସେ ଦକ୍ଷିଣ ଆଫ୍ରିକା ଟୁର୍ ପାଇଁ ଦଳରେ ସ୍ଥାନ ପାଇଥିଲେ। ମାତ୍ର ସେ ଖେଳିଥିବା ଗୋଟିଏ ଟେଷ୍ଟ ମ୍ୟାଚର ଦୁଇଟି ଇନିଂସରେ ମାତ୍ର ୧୦ ରନ ସ୍କୋର କରିପାରିଥିଲେ। ୨୦୧୯ରେ ସେ ୧୮.୫୫ ଆଭରେଜରେ ମୋଟ ୩୩୪ ରନ ସଂଗ୍ରହ କରିଥିଲେ। ଅନ୍ୟପରେ ଆଶେସ ସିରିଜ ମଝିରୁ ବାଦ୍ ପଡ଼ିବା ପରେ ମୋଇନ ରେଡ୍ ବଲ୍ କ୍ରିକେଟରୁ ସାମୟିକ ଦୂରେଇ ରହିଥିଲେ। ଓ୍ବାର୍ମଅପ୍ ମ୍ୟାଚର ପ୍ରଥମ ବୋଲିଂ ଇନିଂସରେ ସେ ଗୋଟିଏ ହେଲେ ଉଇକେଟ ନେଇ ପାରି ନ ଥିଲେ। ଦ୍ୱିତୀୟ ଇନିଂସରେ ସେ ୨ଟି ଉଇକେଟ ଅକ୍ତିଆର କରିଥିଲେ। କିନ୍ତୁ ବିସ୍ ଓ ଲିଚ୍ ଉଭୟେ ଅଧିକ ସଂଖାରେ ଉଇକେଟ ହାସଲ କରିଥିଲେ।
ଇଂଲଣ୍ଡ ଦଳ: ବେନ୍ ଷ୍ଟୋକ୍ସ (ଅଧିନାୟକ), ଜେମ୍ସ ଆଣ୍ଡରସନ, ଜୋଫ୍ରା ଆର୍ଚର, ଡୋମିନିକ୍ ବିସ୍, ଟେୁଆର୍ଟ ବ୍ରଡ୍, ରୋରି ବର୍ନ୍ନସ, ଜୋସ୍ ବଟଲର (ଉଇକେଟକିପର), ଜାକ୍ କ୍ରଲି, ଜୋ ଡେନ୍ଲି, ଓଲି ପୋପ୍, ଡମ୍ ସିବ୍ଲି, ଖ୍ରିସ୍ ଓକ୍ସ ଓ ମାର୍କ ଉଡ୍।
ରିଜର୍ଭ ଖେଳାଳି: ଜେମ୍ସ ବ୍ରାସି, ସାମ୍ କୁରାନ୍, ବେନ୍ ଫୋକ୍ସ, ଡାନ୍ ଲରେନ୍ସ, ଜ୍ୟାକ୍ ଲିଚ୍, ସାକିବ୍ ମେହେମୁଦ, କ୍ରେଗ୍ ଓଭରଟନ୍, ଓଲି ରବିନ୍ସନ ଏବଂ ଓଲି ଷ୍ଟୋନ୍।
