ଭୁବନେଶ୍ୱର,୯ା୫:ଏକ ହତ୍ୟା ମାମଲାରେ ଆଜୀବନ କାରାଦଣ୍ଡ ଭୋଗୁଥିବା ଜଣେ ଅଭିଯୁକ୍ତଙ୍କୁ ୨୨ବର୍ଷ ପରେ ସୁପ୍ରିମ୍କୋର୍ଟ ଜାମିନ ପ୍ରଦାନ କରିଛନ୍ତି। ଏଥିସହିତ ଏହି ମାମଲାରେ ଓଡ଼ିଶା ହାଇକୋର୍ଟ ଅଭିଯୁକ୍ତଙ୍କ ଦ୍ୱାରା ଆଗତ କ୍ରିମିନାଲ ଅପିଲ୍କୁ ବିଳମ୍ବ ଦର୍ଶାଇ ଖାରଜ କରିବା ଘଟଣାରେ ସର୍ବୋଚ୍ଚ ଅଦାଲତ ନାପସନ୍ଦ କରିଛନ୍ତି। ଏଭଳି ମାମଲା ବିଚାର କରୁଥିବାବେଳେ ହାଇକୋର୍ଟ ବାସ୍ତବବାଦୀ ଏବଂ ସହାନୁଭୂତିଶୀଳ ହେବା ଜରୁରୀ ଥିଲା। ଏପରି କି ଦୋଷୀଙ୍କ ଯୋଗ୍ୟତା ଆଧାରରେ ତାଙ୍କ ଆବେଦନର ଯୁକ୍ତି ଦର୍ଶାଇବା ପାଇଁ ସୁଯୋଗ ଦେବାକୁ ସେ କରିଥିବା ବିଳମ୍ବକୁ କ୍ଷମା କରିବା ଉଚିତ୍ ଥିଲା ବୋଲି ସୁମ୍ରିମ୍କୋର୍ଟ ବିଚାରପତି ଜେ. ବି. ପର୍ଡିଓ୍ବାଲା ଓ ଉଜ୍ଜଲ୍ ଭୂୟଁାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଦୋଷୀ ସାବ୍ୟସ୍ତ ହୋଇ ଜେଲରେ ଦଣ୍ଡ ଭୋଗୁଥିବା ଆବେଦନକାରୀଙ୍କୁ ଥରେ ମଧ୍ୟ ପାରୋଲରେ ଛଡ଼ାଯାଇ ନାହିଁ। ତେଣୁ ଯୋଗ୍ୟତା ଆଧାରରେ ଫୌଜଦାରୀ ଆବେଦନର ଶୁଣାଣି ପାଇଁ ମାମଲାକୁ ହାଇକୋର୍ଟକୁ ଫେରାଇବା ଏକ ନିରର୍ଥକ କାର୍ଯ୍ୟ ହେବ ବୋଲି ଖଣ୍ଡପୀଠ କହିଛନ୍ତି।
“ଆମେ ନିଶ୍ଚିତ ଯେ, ଏହି ମାମଲାର ତଥ୍ୟ ଏବଂ ଏକ୍ସେସ୍ପନାଲ ପରିସ୍ଥିତିରେ ଆବେଦନକାରୀଙ୍କୁ ଜାମିନରେ ମୁକ୍ତ କରିବା ଉଚିତ। ତେଣୁ ସମ୍ବିଧାନର ଧାରା ୧୪୨ ଅନୁଯାୟୀ ଅଦାଲତଙ୍କ ଅଧିକାର କ୍ଷେତ୍ର ବ୍ୟବହାର କରି, ଆମେ ଜେଲ୍ ସୁପରିଣ୍ଟେଣ୍ଡେଣ୍ଟଙ୍କ ସନ୍ତୁଷ୍ଟି ପାଇଁ ଆବେଦନକାରୀଙ୍କୁ ୧୦,୦୦୦ ଟଙ୍କାର ବ୍ୟକ୍ତିଗତ ମୁଚାଲିକାରେ ଜାମିନରେ ମୁକ୍ତ କରିବାକୁ ନିର୍ଦ୍ଦେଶ ଦେଉଛୁ,” ବୋଲି ଖଣ୍ଡପୀଠ କହିଛନ୍ତି। ପ୍ରକାଶ ଯେ, ନବରଙ୍ଗପୁର ଅତିରିକ୍ତ ଦୌରାଜଜ୍ଙ୍କ କୋର୍ଟ ଦ୍ୱାରା ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିବା ଅଭିଯୁକ୍ତ ଅର୍ଜୁନ ଜାନି ଓରଫ ଟୁଣ୍ଟୁନ୍ ଦୋଷୀ ସାବ୍ୟସ୍ତ ହେବାର ୩,୧୫୭ ଦିନ ପରେ ଉଚ୍ଚ ଅଦାଲତରେ କ୍ରିମିନାଲ ଅପିଲ୍ ରୁଜୁ କରିଥିଲେ। ହେଲେ ହାଇକୋର୍ଟ ଉକ୍ତ ଆବେଦନକୁ ବିଳମ୍ବ ଦର୍ଶାଇ ଖାରଜ କରି ଦେଇଥିଲେ। ଏହାପରେ ଆବେଦନକାରୀ ସୁପ୍ରିମ୍କୋର୍ଟଙ୍କ ଦ୍ୱାରସ୍ଥ ହୋଇଥିଲେ।