ମୁମ୍ବାଇ: ସୋସିଆଲ ମିଡିଆରେ ଭାଇରାଲ ହୋଇଥିବା ‘ବଚପନ କା ପ୍ୟାର’ ଗୀତର ପପୁଲାରିଟି ଏବେ ଆକାଶ ଛୁଇଁଛି। ଯାହାକୁ ଦେଖିଲେ ଏହି ଗୀତ ଗୁଣୁଗୁଣଉଥିବାର ଦେଖିବାକୁ ମିଳେ। ସମସ୍ତଙ୍କ ମୁହଁରେ ଗୋଟିଏ ଗୀତ, ‘ବଚପନ କା ପ୍ୟାର’। ଛତିଶଗଡ଼ର ସହଦେବ ଡିରଡୋଙ୍କ ସ୍ବରରେ ଭାଇରାଲ ହୋଇଥିବା ଏହି ଗୀତ ଏବେ ବେଶ୍ ଲୋକପ୍ରିୟ ହୋଇପାରିଥିବା ବେଳେ ଏହାକୁ ଶୁଣିଲେ ଯେକେହିବି ଝୁମିବାକୁ ଲାଗିବେ। ଇତିମଧ୍ୟରେ ଲୋକପ୍ରିୟ ରାପର ଗାୟକ ବାଦଶାହ ସହଦେବଙ୍କ ମିଳିତ ସହଯୋଗରେ ଏହି ଗୀତକୁ ନିଜ ଷ୍ଟାଇଲ୍ରେ ପୁନଃନିର୍ମାଣ କରିଛନ୍ତି। ବୁଧବାର ଏହି ଗୀତ ରିଲିଜ୍ ହୋଇଛି। ୧୦ବର୍ଷ ବୟସରେ ଇଣ୍ଟରନେଟ ସେନସେସନ୍ ପାଲଟିଥିବା ସହଦେବ ବାଦଶାହଙ୍କ ସହ ଏହି ଗୀତ ଗାଇଛନ୍ତି। ବାଦଶାହ ଓ ସହଦେବଙ୍କ ବ୍ୟତୀତ ରିକୋ ଏବଂ ଆସ୍ଥା ଗିଲ ଏହି ଗୀତରେ ସ୍ବର ଦେଇଛନ୍ତି। ବାଦଶାହଙ୍କ ଗୀତ ବଚପନ କା ପ୍ୟାର ରିଲିଜ ହେବା ମାତ୍ରେ ହିଁ ସୋସିଆଲ ମିଡିଆରେ ଭାଇରାଲ ହୋଇଛି। ଗୀତଟି ରିଲିଜ ହେବାର କିଛି ଘଣ୍ଟା ମଧ୍ୟରେ ହିଁ ଏହାକୁ ୪ଲକ୍ଷରୁ ଅଧିକ ଲୋକ ଦେଖିସାରିଲେଣି। ଏହି ଗୀତରେ ସହଦେବ କୁଲ୍ ଏବଂ ଡାସିଂ ଲୁକ୍ରେ ନଗର ଆସିଛନ୍ତି। ଏଥିରେ ସେ କୌଣସି ରକ୍ଷ୍ଟାରଠାରୁ କମ୍ ଅଭିନୟ କରିନାହାନ୍ତି। ବଚପନ କା ପ୍ୟାର ଗୀତରେ ସହଦେବ ତାଙ୍କର ଭାଇରାଲ ଲାଇନ୍ ମଧ୍ୟ ଗାଇଥିବା ଜଣାପଡ଼ିଛି। ଏହି ଗୀତର ଗୀତିକାର ରାପର ବାଦଶାହ ହୋଇଥିବା ବେଳେ ହିତେନ ସଙ୍ଗୀତ ନିର୍ଦ୍ଦେଶକ ଭାର ତୁଳାଇଛନ୍ତି। ଏହି ଗୀତର ବିଶେଷତଃ ହେଲା ଏଥିରେ ସହଦେବଙ୍କ ଏକ ସୁନ୍ଦର ପ୍ରେମ କାହାଣୀକୁ ପ୍ରଦର୍ଶିତ କରାଯାଇଛି। ବାଦଶାହଙ୍କ ଏହି ଭର୍ସନକୁ ଲୋକମାନେ ବେଶ୍ ପସନ୍ଦ କରିଛନ୍ତି। ଏଥିସହ ପ୍ରଶଂସକ ତାଙ୍କର ପ୍ରଶଂସା କରି କହିଛନ୍ତି, ବାଦଶାହ ସହଦେବଙ୍କୁ ଭବିଷ୍ୟତକୁ ସୁରକ୍ଷିତ କରିଦେଇଛନ୍ତି। ସୂଚନାଯୋଗ୍ୟ, ଛତିଶଗଡ଼ ସୁକମାରେ ରହୁଥିବା ସହଦେବ ଡିରଡୋ ସପ୍ତମ ଶ୍ରେଣୀରେ ପଢ଼ନ୍ତି। ତାଙ୍କ ପରିବାର ଚାଷ କାର୍ଯ୍ୟ କରନ୍ତି। ତେବେ ଶିକ୍ଷକଙ୍କ ଡିମାଣ୍ଡରେ ଗାଇଥିବା ଏହି ଗୀତ ସେବେଠାରୁ ଲୋକପ୍ରିୟ ହେବା ସହ ଭାଇରାଲ ହୋଇଥିଲା। ନିକଟରେ ସହଦେବ ଇଣ୍ଡିଆନ ଆଇଡଲ-୧୨ରେ ବି ପହଞ୍ଚିଥିବା ଜଣାପଡ଼ିଛି।
