ନୂଆଦିଲ୍ଲୀ,୧୦।୨: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏକ ସାଧାରଣ ସଭାରେ ବିରୋଧୀଙ୍କୁ କଡ଼ା ଚେତାବନୀ ଦେଇଛନ୍ତି। କେବେହେଲେ ବାବ୍ରି ସଂରଚନା ପୁନଃନିର୍ମାଣ ହେବାର ପ୍ରଶ୍ନ ଉଠୁନାହିଁ ବୋଲି ବାରାବଙ୍କିଠାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗୀ ସ୍ପଷ୍ଟ କରିଛନ୍ତି ଯେ। ଯେଉଁମାନେ ଏଭଳି ସ୍ୱପ୍ନ ଦେଖୁଛନ୍ତି, ସେମାନଙ୍କ ଆଶା କେବେବି ପୂରଣ ହେବନାହିଁ।
ଯୋଗୀ କହିଛନ୍ତି ଯେ, ଭାଜପା ଯେଉଁ ପ୍ରତିଶ୍ରୁତି ଦିଏ ତାହା ପୂରଣ କରେ। “ଆମେ କହିଥିଲୁ ରାମଲାଲା ଆସିବେ ଏବଂ ସେହି ସ୍ଥାନରେ ହିଁ ମନ୍ଦିର ଗଢ଼ାହେବ, ଏଥିରେ କୌଣସି ସନ୍ଦେହ ରହିଛି କି?” ବୋଲି ସେ ପ୍ରଶ୍ନ କରିଛନ୍ତି।
ଅଯୋଧ୍ୟାରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ଗୈରିକ ପତାକା ଉତ୍ତୋଳନକୁ ସେ ସନାତନର ପ୍ରତୀକ ଭାବେ ବର୍ଣ୍ଣନା କରିଛନ୍ତି। ଭାରତୀୟ ଐତିହ୍ୟ ଓ ସନାତନ ଧର୍ମକୁ ଅପମାନିତ କରୁଥିବା ଶକ୍ତିମାନଙ୍କୁ ସେ କଡ଼ା ସମାଲୋଚନା କରିଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ, ଆଇନ ମାନୁଥିବା ବ୍ୟକ୍ତି ଉପକୃତ ହେବେ। ମାତ୍ର ଆଇନ ହାତକୁ ନେଉଥିବା ଲୋକଙ୍କ ପାଇଁ ସ୍ଥାନ କେବଳ ‘ନର୍କ’ରେ। ରାମଭକ୍ତଙ୍କ ଉପରକୁ ଗୁଳି ଚଳାଇଥିବା ଏବଂ ମନ୍ଦିର କାମରେ ବାଧା ସୃଷ୍ଟି କରୁଥିବା ଲୋକଙ୍କ ପାଇଁ ଆଉ କୌଣସି ସ୍ଥାନ ନାହିଁ।
ପୂର୍ବ ସରକାର ଅମଳରେ ରାଜ୍ୟରେ ଲାଗି ରହୁଥିବା ଦଙ୍ଗା, କର୍ଫ୍ୟୁ ଏବଂ ଅସୁରକ୍ଷିତ ମାହୋଲ ବିଷୟରେ ସେ ମନେ ପକାଇ ଦେଇଥିଲେ। ବର୍ତ୍ତମାନ ରାଜ୍ୟରେ ବ୍ୟାପାରୀ, ଝିଅ ଏବଂ ସାଧାରଣ ଜନତା ସମ୍ପୂର୍ଣ୍ଣ ସୁରକ୍ଷିତ ବୋଲି ସେ ଦାବି କରିଛନ୍ତି।
ସେ ଶେଷରେ ସତର୍କ କରାଇ ଦେଇଛନ୍ତି ଯେ, ଭାରତ ଏବଂ ସନାତନ ପରସ୍ପରର ପରିପୂରକ। ଦେଶ ଭିତରେ ଓ ବାହାରେ କିଛି ଶକ୍ତି ଷଡ଼ଯନ୍ତ୍ର କରୁଥିବାରୁ ସେ ସମସ୍ତଙ୍କୁ ସଜାଗ ରହିବାକୁ ଆହ୍ୱାନ ଦେଇଛନ୍ତି।
