ନୂଆଦିଲ୍ଲୀ,୨୮।୬: ଏକ କର୍ପୋରେଟ ଆପରାଧୀକ ଅଭିଯୋଗରେ ବାଙ୍ଗାଲୋର କୋର୍ଟଙ୍କ ନିର୍ଦ୍ଦେଶକୁ ଚ୍ୟାଲେଞ୍ଜ କରି ଆଇଟି କ୍ଷେତ୍ରର ଜଣାଶୁଣା ବ୍ୟକ୍ତିତ୍ୱ ଅଜୀମ ପ୍ରେମଜୀ ଏବଂ ତାଙ୍କ ସ୍ତ୍ରୀ ୟାସିନ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି। କୋର୍ଟଙ୍କ ଦ୍ୱାରା ଜାରି ସମନ ରଦ୍ଦ କରାଯାଉ ବୋଲି ପ୍ରେମଜୀ ନିବେଦନରେ କହିଛନ୍ତି। ଅଜୀମ ପ୍ରେମଜୀଙ୍କ ଦ୍ୱାରା ଅଧିକୃତ ବିଦୟା, ରିଗଲ ଏବଂ ନେପିୟନ ଭଳି ୩ କମ୍ପାନୀର ହାସିମ ଇନଭେଷ୍ଟମେଣ୍ଟ ଟ୍ରେଡିଂ ନାମକ କମ୍ପାନୀ ସହ ବିଲୟକୁ ନେଇ ବାଙ୍ଗାଲୋର କୋର୍ଟରେ ଆପରାଧିକ ମାମଲା ଦାୟର ହୋଇଥିଲା। ଏହି ଆଧାରରେ କୋର୍ଟ ପ୍ରେମଜୀ ଏବଂ ତାଙ୍କ ସ୍ତ୍ରୀଙ୍କ ବିରୋଧରେ ସମନ ଜାରି କରିଥିଲେ। ୧୯୭୪ରେ ୩ କମ୍ପାନୀକୁ ପୁନର୍ଗଠିତ କରିଥିବା ସେ ଆବେଦନରେ ଦର୍ଶାଇଛନ୍ତି। ୧୯୮୦ରେ ଏହାର ଶେୟାର ହୋଲ୍ଡିଂ ଲିଙ୍କ କରାଯାଇଥିଲା। ୩ରୁ କୌଣସି ୨ କମ୍ପାନୀ ତୃତୀୟଟିର ମାଲିକ ହେବ। ୨୦୧୫ରେ ରିଜର୍ଭ ବ୍ୟାଙ୍କ ଏହାକୁ ନୀତିଗତ ମଞ୍ଜୁରୀ ଦେଇଥିଲେ। ସେହିଭଳି କର୍ନାଟକ ହାଇକୋର୍ଟ ମଧ୍ୟ ଏହାକୁ ସବୁଜ ସଙ୍କେତ ଦେଇଥିଲେ। ଏ ସଂକ୍ରାନ୍ତ ସମ୍ପୂର୍ଣ୍ଣ ଖବର ଷ୍ଟକ ଏକ୍ସଚେଞ୍ଜ, ସେବି ଏବଂ କର୍ପୋରେଟ ବ୍ୟାପାର ମନ୍ତ୍ରଣାଳୟ ନିକଟରେ ରହିଛି। ଗୋଟିଏ କମ୍ପାନୀରେ ଏହି ୩ କମ୍ପାନୀର ବିଲୟ ବିରୋଧରେ ଚେନ୍ନାଇର ଏକ କମ୍ପାନୀ ନିମ୍ନ ଅଦାଲତରେ ମାମଲା ଦାୟର କରିଛି। ଏହା ପରେ ପ୍ରେମଜୀ ଏବଂ ତାଙ୍କ ସ୍ତ୍ରୀଙ୍କ ବିରୋଧରେ ସମନ ଜାରି ହୋଇଥିବା ଜଣାପଡିଛି।
