ଚେନ୍ନାଇ,୧୩ା୪: ଋତୁରାଜ ଗାଏକ୍ୱାଡଙ୍କ ବଦଳ ଖେଳାଳି ଭାବେ ଆୟୁଷ ମହାତ୍ରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଦଳରେ ଯୋଗ ଦେବେ। ଏଲବୋରେ ଫ୍ରାଚକର ଯୋଗୁ ଗାଏକ୍ୱାଡ ଚଳିତ ଆଇପିଏଲ୍ରୁ ବାଦ ପଡ଼ିଛନ୍ତି। ତାଙ୍କ ଅନୁପସ୍ଥିତିରେ ମହେନ୍ଦ୍ର ସିଂ ଧୋନୀ ଦଳର ନେତୃତ୍ୱ ନେଉଛନ୍ତି।
ଗତ ବର୍ଷ ନଭେମ୍ବରରେ ଅନୁଷ୍ଠିତ ମେଗା ଅକ୍ସନରେ ଅନସୋଲ୍ଡ ରହିଥିବା ଯୁବ ମୁମ୍ବାଇ ଓପନରଙ୍କୁ ୩୦ ଲକ୍ଷ ଟଙ୍କାର ବେସ୍ ପ୍ରାଇସ୍ରେ ଦଳରେ ସାମିଲ କରାଯାଇଛି। ସେ ଆଗାମୀ କିଛି ଦିନ ମଧ୍ୟରେ ଦଳରେ ଯୋଗଦେବେ ବୋଲି ସିଏସ୍କେ ମ୍ୟାନେଜମେଣ୍ଟ ପକ୍ଷରୁ କୁହାଯାଇଛି।
ତେବେ ସିଏସ୍କେ ନିକଟରେ ଗାଏକ୍ୱାଡଙ୍କ ବଦଳ ଖେଳାଳି ଭାବେ ମହାତ୍ରେଙ୍କ ବ୍ୟତୀତ ଗୁଜରାଟର ଉର୍ଭିଲ ପଟେଲ, କେରଳର ସଲମାନ ନିଜାର ଓ ପୃଥ୍ବୀ ଶ’ଙ୍କ ଭଳି ବିକଳ୍ପ ଥିଲା। ଗତ ବର୍ଷ ଅକ୍ଟୋବରରେ ଫାଷ୍ଟ-କ୍ଲାସ ପଦାର୍ପଣ କରିଥିବା ୧୭ ବର୍ଷୀୟ ମହାତ୍ରେ ଏପର୍ଯ୍ୟନ୍ତ ୯ ମ୍ୟାଚରେ ଦୁଇଟି ଶତକ ଓ ୧ ଅର୍ଦ୍ଧଶତକ ସହ ୫୦୪ ରନ କରିଛନ୍ତି। ସେହିଭଳି ୭ ଲିଷ୍ଟ-ଏ ମ୍ୟାଚରେ ସେ ଦୁଇଟି ଶତକ ସହ ୪୫୮ ରନ କରିଛନ୍ତି।
