ଭୁବନେଶ୍ୱର,୨୭।୯(ବ୍ୟୁରୋ):ରାଜଧାନୀର ଭୁବନେଶ୍ୱରରେ ମା’ ଜଗତ୍ଜନନୀଙ୍କ ଆଗମନ ପାଇଁ ପ୍ରସ୍ତୁତି ଏକ ପ୍ରକାର ଶେଷ ହେବାକୁ ବସିଲାଣି। ସଜେଇ ହେଲାଣି ପୂଜା ମଣ୍ଡପ। ମା’ଙ୍କ କରୁଣା ଓ ଭକ୍ତମାନଙ୍କ ଶ୍ରଦ୍ଧା ବଳରେ ଅନ୍ୟବର୍ଷ ଭଳି ଏ ବର୍ଷ ଯଥାଶକ୍ତି ଦଶହରା ଉତ୍ସବ ପାଳନ କରିବାକୁ ପ୍ରୟାସ କରିଛି ଶହୀଦନଗର ଦୁର୍ଗାପୂଜା ସମିିତି। ଉତ୍ସବକୁ ମନମୁଗ୍ଧ କରିବା ପାଇଁ ମା’ଙ୍କ ରୁପା ମେଢ, ସୁନା ମୁକୁଟ ସହ ସୁନ୍ଦର ତୋରଣ ମଧ୍ୟ କରାଯାଉଛି। ଚଳିତ ବର୍ଷ ଶୋଭା ପାଇବ ଅଯୋଧ୍ୟାର ରାମ ମନ୍ଦିର। ତୋରଣର ଉଚ୍ଚତା ୮୫ଫୁଟ ଥିବା ବେଳେ ଓସାର ୧୧୦ଫୁଟ ରହିବ। କୋଲକାତାରୁ କାରିଗରମାନେ ଆସି ମୂର୍ତ୍ତି ଓ ତୋରଣ ନିର୍ମାଣ କରୁଛନ୍ତି। ସବୁ ବର୍ଷ ପରି ଏଥର ମଧ୍ୟ କ୍ରୀଡ଼ା କ୍ଷେତ୍ରରେ ଓଡ଼ିଶାରେ ସଫଳତା ହାସଲ କରିଥିବା କ୍ରୀଡ଼ବିତ୍ଙ୍କୁ ମହାସମପ୍ତମୀରୁ ବିଜୟାଦଶମୀ ପର୍ଯ୍ୟନ୍ତ ପ୍ରତ୍ୟେକ ଦିନ ସମ୍ବର୍ଦ୍ଧିତ କରାଯିବ। ଚଳିତ ବର୍ଷ ଆନ୍ତର୍ଜାତିକ ବାସ୍କେଟ୍ ବଲ ଖେଳାଳି ସେକ୍ ଫଏଜ୍, ଜାତୀୟ ଫୁଟବଲ ମହିଳା ତାରକା ପୂର୍ଣ୍ଣିମା ମଲ୍ଲିକ, ଜାତୀୟ ରଗବି ତାରକା ସାହାନାୱାଜ୍ ଅହମ୍ମଦ, ଲନ ଟେନିସ୍ ମହିଳା ତାରକା ଆହାନା (୧୨ବର୍ଷରୁ କମ୍)ଙ୍କୁ ସମ୍ବର୍ଦ୍ଧିତ କରାଯିବ ବୋଲି ସୋମବାର ସମିତି ପକ୍ଷରୁ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି। ଏହି ସମ୍ମିଳନୀରେ ସଭାପତି ହେମନ୍ତ କୁମାର ପରିଡ଼ା, ସମ୍ପାଦକ ସଚ୍ଚିନନ୍ଦନ ନାୟକ, କର୍ପୋରେଟର ରାଜକିଶୋର ଦାସ, ବରିଷ୍ଠ ଉପଦେଷ୍ଟା ମନୋରଞ୍ଜନ ଦାସ , ଉପ ସଭାପତି ସରୋଜ କୁମାର ପାତ୍ର ପ୍ରମୁଖ ଉପସ୍ଥିତ ଥିଲେ।
