ମୁମ୍ବାଇ,୨୭।୩: ସର୍ବାଧିକ ୫ ଥର ଆଇପିଏଲ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଏଥର ବି ବିଜୟ ସହ ଆଇପିଏଲ ସିଜନ୍ ଆରମ୍ଭ କରିପାରିନାହିଁ। ୧୭୮ ରନ୍ର ଚ୍ୟାଲେଞ୍ଜିଂ ଟାର୍ଗେଟ ଛିଡ଼ା କରିବା ପରେ ଦିଲ୍ଲୀ କ୍ୟାପିଟାଲ୍ସର ଅଧା ଦଳକୁ ୭୨ ରନ୍ ମଧ୍ୟରେ ପ୍ୟାଭିଲିଅନ ପଠାଇଥିଲା ମୁମ୍ବାଇ। କିନ୍ତୁ ମ୍ୟାଚ୍ ବଦଳାଇ ଦେଇଥିଲା ଅକ୍ଷର ପଟେଲ (୩୮ ରନ୍, ୨ ଚୌକା ଓ ୩ ଛକା) ଏବଂ ଲଲିତ ଯାଦବ(୪୮ ରନ୍, ୪ ଚୌକା ଓ ୨ ଛକା)ଙ୍କ ଯୋଡ଼ି। ଦଳର ବିଜୟ ଆଶା ନ ଥିଲା ବେଳେ ଦୁହେଁ ୭ମ ଉଇକେଟ ପାଇଁ ୭୫ ରନ୍ ଯୋଡ଼ି ଥିଲେ। ତାହା ପୁଣି ୩୦ ବଲରେ। ଦୁହିଁଙ୍କ ଯୋଗୁ ଦିଲ୍ଲୀ ମ୍ୟାଚ୍କୁ ୧୮.୨ ଓଭରରେ ଜିତି ନେଇଥିଲା। ଏହାକୁ ମିଶାଇ ରୋହିତଙ୍କ ମୁମ୍ବାଇ ଇଣ୍ଡିଆନ୍ସ ଗତ ୧୦ ସିଜନର ପ୍ରଥମ ମ୍ୟାଚ୍ରେ ପରାଜୟ ସ୍ବାଦ ଚାଖିବାକୁ ପଡ଼ିଛି।
ରବିବାର ଅପରାହ୍ନରେ ଖେଳାଯାଇଥିବା ମ୍ୟାଚ୍ରେ ଇଶାନ କିଷନ(୮୧ ରନ୍, ୧୧ ଚୌକା ଓ ୨ ଛକା)ଙ୍କ ଅର୍ଦ୍ଧଶତକ ବଳରେ ମୁମ୍ବାଇ ପ୍ରଥମେ ବ୍ୟାଟିଂ କରି ଛିଡ଼ା କରିଥିଲା ୧୭୮ ରନ୍ର ଟାର୍ଗେଟ। ଜବାବରେ ଦୁଇ ଓପନର ପୃଥ୍ବୀ ଶ’ (୩୮) ଓ ଟିମ୍ ସେଫର୍ଟ (୨୧) ଦିଲ୍ଲୀକୁ ଭଲ ଆରମ୍ଭ ଦେଇଥିଲେ। ଦୁହେଁ ୩ ଓଭରରେ ୩୦ ରନ୍ ଯୋଡ଼ିଥିଲେ। କିନ୍ତୁ ଚତୁର୍ଥ ଓଭରରେ ଦୁଇ ଉଇକେଟ ନେଇ ମ୍ୟାଚ୍ ବଦଳାଇ ଦେଇଥିଲେ ମୁରୁଗନ ଅଶ୍ୱିନ। ତା’ ପରେ ଅଧିନାୟକ ରଷଭ ପନ୍ତ (୧) ଓ ରବମାନ ପାଓ୍ବେଲ (୦) ମଧ୍ୟ ବିଫଳ ହୋଇଥିଲେ। ଦଳ ୧୩.୨ ଓଭରରେ ୧୦୪ ରନ୍ରେ ୬ ଉଇକେଟ ହରାଇ ସାରିଥିଲା। ତା’ ପରେ ୧୧ ବଲରେ ୨୨ (୪ ଚୌକା) ରନ୍ର ଛୋଟ ବିସ୍ଫୋରକ ପାଳି ଖେଳିଥିଲେ ଶାର୍ଦ୍ଦୁଳ ଠାକୁର।
