ଯେକୌଣସି ଶାରୀରିକ ସମସ୍ୟା କ୍ଷେତ୍ରରେ ସଚେତନତା ହିଁ ପ୍ରକୃତ ଚିକିତ୍ସା ସାବ୍ୟସ୍ତ ହୋଇଥାଏ। ଏହାଦ୍ୱାରା ବହୁ ପୂର୍ବରୁ ଶାରୀରିକ ସମସ୍ୟା ସମ୍ପର୍କରେ ଜଣାପଡ଼ିଥାଏ। ଫଳରେ ଆବଶ୍ୟକ ଚିକିତ୍ସା ବ୍ୟବସ୍ଥା ଗ୍ରହଣ କରିବା ସହଜ ହୋଇଥାଏ।
ସଚେତନତା ସୃଷ୍ଟି ଲାଗି ପ୍ରତିବର୍ଷ ନଭେମ୍ବର ୧୨ରେ ବିଶ୍ୱ ନିମୋନିଆ ଦିବସ ପାଳିତ ହୋଇଥାଏ।
ନିମୋନିଆ ବିରୋଧରେ ବିଶ୍ୱସ୍ତରରେ ଏକଜୁଟ ହେବା ଏହି ଦବସର ମୁଖ୍ୟ ଲକ୍ଷ୍ୟ। ୨୦୦୯ରେ ୧୦୦ରୁ ଅଧିକ ସଂଗଠନ ନଭେମ୍ବର ୨ରେ ପ୍ରଥମ ବିଶ୍ୱ ନିମୋନିଆ ଦିବସ ପାଳନ କରିବା ପାଇଁ ଶିଶୁ ନିମୋନିଆ ବିରୋଧରେ ଗ୍ଲୋବାଲ କୋଅଲିସନ ଭାବରେ ଏକତ୍ରିତ ହୋଇଥିଲେ। ନିମୋଡିଆପି, ହେଜ ପାଣ୍ଠିର ଲାନ୍ସ ଲାଇଫର୍ ମ୍ୟାଲେରିଆ ଏବଂ ନିମୋନିଆ, ଗ୍ଲୋବାଲ ହେଲଥ କାଉନସିଲ, ଗାଭି ଆଲାଇନ୍ସ ଏବଂ ସାବିନ ଭ୍ୟାକ୍ସିନ ଇନଷ୍ଟିଚ୍ୟୁଟ ଏକତ୍ରିତ ହୋଇ ଲୋକଙ୍କୁ ନଭେମ୍ବର ୨ରେ ବିଶ୍ୱ ନିମୋନିଆ ଦିବସରେ ଭାଗ ନେବାକୁ ପରାମର୍ଶ ଦେଇଥିଲେ। ତେବେ ପରବର୍ତ୍ତୀ ସମୟରେ ୨୦୧୦ଠାରୁ ଏହି ଦିନଟିକୁ ନଭେମ୍ବର ୧୨ରେ ପାଳିତ ହୋଇ ଆସୁଛି।
ନିମୋନିଆ ହେଉଛି ଏକ ପ୍ରତିରୋଧକ ତଥା ଚିକିତ୍ସା ଯୋଗ୍ୟ ଶାରୀରିକ ସମସ୍ୟା। ଏହା ପ୍ରତିବର୍ଷ ପୃଥିବୀର ୫ ବର୍ଷରୁ କମ ୧୫୫ ନିୟୁତ ପିଲାଙ୍କୁ ଅସୁସ୍ଥ କରିଥାଏ ଏବଂ ପ୍ରତିବର୍ଷ ଏଥିରେ ଆକ୍ରାନ୍ତ ହୋଇ ୧.୬ ନିୟୁତ ଲୋକଙ୍କର ମୃତ୍ୟୁ ଘଟିଥାଏ।
ଏଡସ, ମ୍ୟାଲେରିଆ ଏବଂ ମିଳିମିଳା ତୁଳନାରେ ଏହା ଯୋଗୁ ଅଧିକଙ୍କର ମୃତ୍ୟୁ ଘଟିଥାଏ। ମାରାତ୍ମକ ନିମୋନିଆ ହେମୋଫିଲସ ଇନଫ୍ଲୁଏଞ୍ଜା ଟାଇପ ବି ଏବଂ ଷ୍ଟ୍ରେପଟୋକୋକସ ନିମୋନିଆ ଯୋଗୁ ସଂକ୍ରମଣ ହୋଇଥାଏ। ତେବେ ଏହାର ପ୍ରତିରୋଧ ପାଇଁ ପ୍ରଭାବଶାଳୀ ଟିକା ଅଛି। ତେଣୁ ସଚେତନତା ଦ୍ୱାରା ନିମୋନିଆରୁ ଦୂରେଇ ରହିବା ସମ୍ଭବ ହୋଇ ପାରିବ।
ଏହି ଦିବସ ଅବସରରେ ଏନେଇ ସଚେତନତା ସୃଷ୍ଟି କରାଯାଇଥାଏ। ନିମୋନିଆର ଲକ୍ଷଣ ପ୍ରକାଶ ପାଇଲେ କିଭଳି ପଦକ୍ଷେପ ଗ୍ରହଣ କରିବାକୁ ହେବ ସେନେଇ ଲୋକଙ୍କୁ ପରାମର୍ଶ ଦିଆଯାଇଥାଏ।
