ନୂଆଦିଲ୍ଲୀ,୧୭।୨: ଅନ୍ତର୍ଜାତୀୟ ବଜାରରେ କ୍ରମାଗତ ବୃଦ୍ଧି ପାଉଥିବା ଅଶୋଧିତ ତୈଳ ଦରର ପ୍ରଭାବ ବର୍ତ୍ତମାନ ଭାରତ ବଜାରରେ ପଡ଼ିଛି। ଫଳରେ ବିମାନ ଇନ୍ଧନ ମୂଲ୍ୟ ପୁଣି ଥରେ ବଢ଼ିଛି। ବୁଧବାର ଏହାର ମୂଲ୍ୟ ୫.୨% ବୃଦ୍ଧି ଘଟି ୯୦,୫୧୯.୭୯ ଟଙ୍କାକୁ ଛୁଇଁଥିବା ସୂଚନା ମିଳିଛି। ଫଳରେ ଦେଶରେ ଜେଟ୍ ଫୁଏଲ ଦର ତା’ର ସର୍ବକାଳୀନ ଉଚ୍ଚତମ ସ୍ତରକୁ ପହଞ୍ଚତ୍ୟାଇଛି ବୋଲି କୁହାଯାଉଛି। ଏଥରକୁ ମିଶାଇ ୨ ମାସରେ ବିମାନ ଇନ୍ଧନ ମୂଲ୍ୟ ୪ ଥର ବଢ଼ିଥିବା ସୂଚନା ମିଳିଛି।
ଦେଶର ପ୍ରମୁଖ ତୈଳ ବିପଣନ କମ୍ପାନୀଙ୍କ ସୂଚନା ଅନୁସାରେ ଦିଲ୍ଲୀରେ ଆଭିଏଶନ ଟର୍ବାଇନ ଫୁଏଲ (ଏଟିଏଫ୍) ମୂଲ୍ୟ କିଲୋଲିଟର ପିଛା ୪,୪୮୧.୬୩ ଟଙ୍କା ବୃଦ୍ଧି ଘଟି ୯୦,୫୧୯.୭୯ ଟଙ୍କାରେ ପହଞ୍ଚତ୍ଛି। ୨୦୦୮ ଅଗଷ୍ଟରେ ପ୍ରତି କିଲୋଲିଟର ଏଟିଏଫ୍ ମୂଲ୍ୟ ୭୧,୦୨୮. ୨୬ ଟଙ୍କା ରହିଥିଲା। ସବୁଠାରୁ ଆଶ୍ଚର୍ଯ୍ୟର ଘଟଣା, ସେତେବେଳେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ବ୍ୟାରେଲ ପିଛା ୧୪୭ ଡଲାରରେ କାରବାର ହେଉଥିବା ସୂଚନା ମିଳିଛି। ଏବେ ଅଶୋଧିତ ତୈଳ ବ୍ୟାରେଲ ମୂଲ୍ୟ ୨୦୦୮ ତୁଳନାରେ ବହୁ କମ୍ ଥିଲେ ମଧ୍ୟ ଏଟିଏଫ୍ କିଲୋଲିଟର ପିଛା ୯୦, ୫୧୯.୭୯ ଟଙ୍କାକୁ ଛୁଇଁ ସର୍ବକାଳୀନ ଉଚ୍ଚ ସ୍ତରରେ କାରବାର କରୁଛି ବୋଲି କୁହାଯାଉଛି। ସୂଚନାଯୋଗ୍ୟ, ଚଳିତ ବର୍ଷ ଜାନୁୟାରୀ ୧ରେ ଏହାର ମୂଲ୍ୟ ୨,୦୩୯.୬୩ (୨.୭୫%) ଟଙ୍କା ବୃଦ୍ଧି ପାଇ ୭୬,୦୬୨.୦୪ ଟଙ୍କାରେ ରହିଥିଲା। ସେହିଭଳି ଜାନୁୟାରୀ ୧୬ରେ ଏହାର ମୂଲ୍ୟ ୩,୨୩୨.୮୭ (୪.୨୫%) ଟଙ୍କା ବୃଦ୍ଧି ପାଇ ୭୯,୨୯୪.୯୧ ଟଙ୍କା ଥିଲା। ସେହିପରି ଫେବୃୟାରୀ ୧ରେ ମଧ୍ୟ ଏହାର ମୂଲ୍ୟ ୬୭୪୩.୨୫ (୮.୫%) ଟଙ୍କା ବଢ଼ି ୮୬.୦୩୮.୧୬ ଟଙ୍କାରେ ରହିଥିଲା। ଏହି ୨ ମାସ ମଧ୍ୟରେ ବିମାନ ଇନ୍ଧନ ମୋଟ ୧୬୪୯୭.୩୮ ଟଙ୍କା ବୃଦ୍ଧି ପାଇଥିବା ସୂଚନା ମିଳିଛି।
ଅପରପକ୍ଷେ ଗତ ୧୫ ସପ୍ତାହ ହେବ ଦେଶରେ ପେଟ୍ରୋଲ ଓ ଡିଜେଲ ଦରରେ କୌଣସି ପରିବର୍ତ୍ତନ ହୋଇନାହିଁ। ଶେଷଥର ପାଇଁ ୨୦୨୧ ନଭେମ୍ବର ୪ରେ ତୈଳ କମ୍ପାନୀଗୁଡିକ ଏହାର ଦର ସଂଶୋଧନ କରିଥିଲେ। ତା’ପରଠାରୁ ଏପର୍ଯ୍ୟନ୍ତ ଦେଶରେ ତୈଳ ଦର ସ୍ଥିର ରହିଛି। ଫେବୃୟାରୀ ୧୬ରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ବ୍ୟାରେଲ ପିଛା ୯୩.୧୮ ଡଲାରରେ କାରବାର ହେଉଛି।
