ଚେନ୍ନାଇ,୧୬।୪:ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଏମ୍. କରୁଣାନିଧି କେନ୍ଦ୍ର-ରାଜ୍ୟ ସମ୍ପର୍କର ଅନୁଧ୍ୟାନ ପାଇଁ ଏକ ଦଶନ୍ଧିରୁ ଊର୍ଦ୍ଧ୍ୱ ସମୟ ପୂର୍ବରୁ ପି.ଭି. ରାଜମାନ୍ନାର କମିଟି ଗଠନ କରିଥିଲେ। ଏବେ ରାଜ୍ୟ ବିଧାନସଭା ନିର୍ବାଚନ ପୂର୍ବରୁ ରାଜ୍ୟର ସ୍ବାୟତ୍ତତା ପାଇଁ ତାଙ୍କ ପୁଅ ତଥା ବର୍ତ୍ତମାନର ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ମଙ୍ଗଳବାର ଏକ ଉଚ୍ଚସ୍ତରୀୟ କମିଟି ଗଠନ ନେଇ ଘୋଷଣା କରିଛନ୍ତି।
ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି କୁରିଏନ୍ ଜୋସେଫ୍ଙ୍କ ଅଧ୍ୟକ୍ଷତାରେ ଗଠିତ କମିଟି କେନ୍ଦ୍ର ଏବଂ ରାଜ୍ୟଗୁଡ଼ିକ ମଧ୍ୟରେ ସମ୍ପର୍କକୁ ପ୍ରଭାବିତ କରୁଥିବା ସାମ୍ବିଧାନିକ ଏବଂ ଆଇନଗତ ବ୍ୟବସ୍ଥାଗୁଡ଼ିକର ଅଧ୍ୟୟନ କରିବ। କମିଟିରେ ଅବସରପ୍ରାପ୍ତ ଆଇଏଏସ୍ ଅଫିସର ଅଶୋକ ବର୍ଦ୍ଧନ ସେଟ୍ଟୀ ଏବଂ ରାଜ୍ୟ ଯୋଜନା ଆୟୋଗର ପୂର୍ବତନ ଉପାଧ୍ୟକ୍ଷ ପ୍ରଫେସର ଏମ୍. ନାଗନାଥନ୍ ସଦସ୍ୟ ରହିଛନ୍ତି। ରାଜ୍ୟ ତାଲିକାରୁ ସମବର୍ତ୍ତୀ ସୂଚୀକୁ ସ୍ଥାନାନ୍ତର ହୋଇଥିବା ବିଷୟଗୁଡ଼ିକୁ ଫେରାଇ ଆଣିବା ନିମନ୍ତେ ଉପାୟ ବତାଇବା ସହ ରାଜ୍ୟଗୁଡ଼ିକ କିପରି ଅଧିକ ସ୍ବାୟତ୍ତତା କ୍ଷମତା ସହିତ କାର୍ଯ୍ୟ କରିପାରିବେ, ସେନେଇ ସୁପାରିସ କରିବେ।
ରାଜ୍ୟଗୁଡ଼ିକର କ୍ଷମତା ବଢ଼ାଇବା ଉପରେ ଷ୍ଟାଲିନ୍ ଜୋର୍ ଦେଇଛନ୍ତି। କେନ୍ଦ୍ର ସରକାର କ୍ରମାଗତ ଭାବେ ରାଜ୍ୟର ଅଧିକାରକୁ ଛଡ଼ାଇନେବାରେ ଲାଗିଥିବା ସେ ଅଭିଯୋଗ କରିଛନ୍ତି। କରୁଣାନିଧିଙ୍କ ସରକାର ସମୟରେ ଐତିହାସିକ ରାଜ୍ୟ ସ୍ବାୟତ୍ତତା ସଂକଳ୍ପନାମା ବିଧାନସଭାରେ ଅଣାଯାଇଥିଲା। ରାଜ୍ୟ ବିଧାନସଭାର ରୁଲ୍-୧୧୦ ଅନୁଯାୟୀ ଷ୍ଟାଲିନ୍ ନୂଆ ଉଚ୍ଚସ୍ତରୀୟ କମିଟି ଗଠନ କରିଛନ୍ତି। ୨୦୨୬ ଜାନୁଆରୀ ସୁଦ୍ଧା କମିଟି ଅନ୍ତରୀଣ ରିପୋର୍ଟ ଦେବାକୁ ଥିବାବେଳେ ୨ ବର୍ଷରେ ଚୂଡ଼ାନ୍ତ ରିପୋର୍ଟ ପ୍ରଦାନ କରିବ। ଏହି ପଦକ୍ଷେପ କେବଳ ତାମିଲନାଡୁ ପାଇଁ ନୁହେଁ ବରଂ ବିବିଧତା ମଧ୍ୟରେ ଏକତା ସିଦ୍ଧାନ୍ତର ସୁରକ୍ଷା ନିମନ୍ତେ ସମସ୍ତ ରାଜ୍ୟ ପାଇଁ ଉଦ୍ଦିଷ୍ଟ ବୋଲି ଷ୍ଟାଲିନ୍ କହିଛନ୍ତି। ରାଜ୍ୟଗୁଡ଼ିକର ଅଧିକାର ଅବରୋଧ ହେଉଥିବାବେଳେ ସମ୍ବିଧାନର ବ୍ୟବସ୍ଥାଗୁଡ଼ିକର ସମୀକ୍ଷା କରାଯାଇ ସହଯୋଗମୂଳକ ସଂଘବାଦ, ଆଇନ ଏବଂ ନୀତି ଆଧାରିତ କେନ୍ଦ୍ର-ରାଜ୍ୟ ସମ୍ପର୍କ ସୁଦୃଢ଼ ହେବା ଆବଶ୍ୟକ। ସମ୍ବିଧାନ ଦ୍ୱାରା ଉଭୟ କେନ୍ଦ୍ର ଓ ରାଜ୍ୟ ଗଢ଼ାଯାଇଥିବାରୁ ନିଜସ୍ବ କ୍ଷେତ୍ରରେ କେହି କାହାର ଅଧସ୍ତନ ନୁହନ୍ତି ବୋଲି ବି.ଆର୍. ଆମ୍ବେଡ୍କର ସ୍ପଷ୍ଟ ଭାବେ କହିଥିଲେ। ଏହା ସତ୍ତ୍ୱେ କେନ୍ଦ୍ର ସରକାର କ୍ରମାଗତ ଭାବେ ରାଜ୍ୟଗୁଡ଼ିକର ଅଧିକାରକୁ ଅକ୍ତିଆର କରିଚାଲିଛନ୍ତି, ଯାହା
ସାମ୍ବିଧାନିକ ସନ୍ତୁଳନରେ ବ୍ୟାଘାତ ସୃଷ୍ଟି କରୁଥିବା ଷ୍ଟାଲିନ୍ କହିଥିଲେ। ତେବେ ବିଧାନସଭାରେ ଷ୍ଟାଲିନ୍ ଉଚ୍ଚସ୍ତରୀୟ କମିଟି ଗଠନ ସମ୍ପର୍କରେ ଘୋଷଣା କଲାବେଳେ ବିରୋଧୀ ଦଳ ଏଆଇଏଡିଏମ୍କେ ଉପସ୍ଥିତ ନ ଥିଲା। ବିରୋଧୀ ଦଳ ଉଠାଇଥିବା ପ୍ରସଙ୍ଗ ଉପରେ ଆଲୋଚନା ପାଇଁ ବାଚସ୍ପତି ଏମ୍. ଆପ୍ପାଭୁ ଅନୁମତି ନ ଦେବାରୁ ଏଆଇଏଡିଏମ୍କେ କକ୍ଷତ୍ୟାଗ କରିଥିଲା। ରାଜ୍ୟ ପାଇଁ ନିରଙ୍କୁଶ ସ୍ବାୟତ୍ତତା ଦେଶ ପକ୍ଷରେ ଭଲ ହେବ ନାହିଁ, ଏଥିରେ ଭାଜପା ଏକମତ ନୁହେଁ ବୋଲି କହି ଗୃହର ନେତା ନୈନାର ନାଗେନ୍ଥରନଙ୍କ ନେତୃତ୍ୱରେ କକ୍ଷତ୍ୟାଗ କରିଥିଲା। ମୁଖ୍ୟମନ୍ତ୍ରୀଙ୍କ ଘୋଷଣାକୁ ଡିଏମ୍କେ ଏବଂ ଏହାର ସହଯୋଗୀ ଦଳଗୁଡ଼ିକ ସମର୍ଥନ ଜଣାଇଥିଲେ।
ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ଜାତୀୟ ଶିକ୍ଷା ନୀତି ସମେତ ବିଭିନ୍ନ ନିଷ୍ପତ୍ତିକୁ ଷ୍ଟାଲିନ୍ ବିରୋଧ କରିଆସୁଛନ୍ତି। ତ୍ରିଭାଷୀ ନୀତି ବଳରେ କେନ୍ଦ୍ର ଅଣହିନ୍ଦୀଭାଷୀ ରାଜ୍ୟଗୁଡ଼ିକ ଉପରେ ହିନ୍ଦୀ ଭାଷାକୁ ଲଦିଦେବାକୁ ଉଦ୍ୟମ ଚଳାଇଥିବା କହି ଷ୍ଟାଲିନ୍ ଏହାର ତୀବ୍ର ବିରୋଧ କରିଥିବାବେଳେ ଅନ୍ୟ କେତେକ ଦଳ ମଧ୍ୟ ତାଙ୍କ ସହ ସ୍ବର ମିଳାଇଛନ୍ତି। ସେହିପରି ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ରହିଥିବା ଏନ୍ଇଇଟି ପରୀକ୍ଷା ବ୍ୟବସ୍ଥାକୁ ଷ୍ଟାଲିନ୍ ବିରୋଧ କରିବା ସହ ତାମିଲନାଡୁରେ ଏଭଳି ପରୀକ୍ଷା ନ କରାଇ ସିଧାସଳଖ ଦ୍ୱାଦଶ ଶ୍ରେଣୀ ପରୀକ୍ଷା ଫଳ ଆଧାରରେ ପିଲାଙ୍କୁ ନାମଲେଖା ସୁଯୋଗ ଦେବା ପାଇଁ ଦାବି କରିଆସୁଛନ୍ତି।
