ଦିଗପହଣ୍ଡି,୮।୩(ଅଶେଷ ନାଥ ମିଶ୍ର): ଗଞ୍ଜାମ-ଗଜପତି ସୀମାନ୍ତ ତପ୍ତପାଣି ଘାଟିରେ ରବିବାର ମଧ୍ୟାହ୍ନ ପ୍ରାୟ ସାଢ଼େ ୧୨ ଟାରେ ଏକ ଯାତ୍ରୀବାହୀ ଅଟୋ ଦୁର୍ଘଟଣା । ଅଟୋ ଓଲଟି ପଡ଼ିବାରୁ ୭ ଜଣ ଗୁରୁତର ଆହାତ ହୋଇଛନ୍ତି । ଆହତମାନେ ହେଲେ ଗଞ୍ଜାମ ଜିଲା ଧରାକୋଟ ବ୍ଲକ ସାବା ପଞ୍ଚାୟତ ଅର୍ଜୁନ ପଲ୍ଲୀ ଗାଁ ର ରୀନା ଦଳାଇ(୨୦),ହରିଶ୍ଚନ୍ଦ୍ର ଦଳାଇ(୫୦),କୁନି ଦଳାଇ(୪୭),ଜେମା ଦଳାଇ(୪୫),କୁନି ନାୟକ(୪୦),ରାହୁଲ ନାୟକ(୧୦) ଏବଂ ମାଣିକପୁର ଗ୍ରାମର ବଳରାମ ଛାଟୋଇ(୫୨)। ଆହତମାନଙ୍କୁ ପାଟପୁର ଥାନା ପୋଡ଼ାମାରି ଫାଣ୍ଡି ପୋଲିସ କର୍ମଚାରୀ ବୃନ୍ଦ ଉଦ୍ଧାର କରି ଆମ୍ବୁଲାନ୍ସ ଯୋଗେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।
ପ୍ରାଥମିକ ଚିକିତ୍ସା ପରେ ସେମାନଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ସାନଖେମୁଣ୍ଡି ବ୍ଲକ ଟି.ଗୋବିନ୍ଦପୁର ପଞ୍ଚାୟତ ବେଲଗଡ ଗାଁକୁ ଅଟୋ ଯୋଗେ ଭୋଜି ଖାଇବାକୁ ଯାଉଥିବା ବେଳେ ଅଟୋଟି ଯାନ୍ତ୍ରିକ ତ୍ରୁଟି କାରଣରୁ ଘାଟି ଉଠି ପାରିନଥିଲା। ପରବର୍ତ୍ତୀ ସମୟରେ ବ୍ରେକଫେଲ୍ କାରଣରୁ ଚାଳକଙ୍କ ସମସ୍ତ ଉଦ୍ୟମ ସତ୍ତ୍ବେ ଅଟୋଟି ପ୍ରାୟ ୫ ମିନଟ ଧରି ଘାଟି ରାସ୍ତାର ତଳକୁ ତଳକୁ ଗଡ଼ି ଗଡ଼ି ଯାଇ ଦୁର୍ଘଟଣା ହୋଇଥିବା ଜଣାପଡିଛି । ପୋଲିସ ଟିମ୍ ଦୁର୍ଘଟଣାଗସ୍ତ ଅଟୋକୁ ଜବତ କରିଛନ୍ତି ।
