ବରଗଡ଼,୧୧।୧୦(ପ୍ରେମାନନ୍ଦ ଖମାରୀ)- ସରପଞ୍ଚ ପଦ ପାଇଁ ପଞ୍ଚାୟତ ନିର୍ବାଚନ ସମୟରେ ପ୍ରାର୍ଥୀମାନେ ଲକ୍ଷାଧିକ ଟଙ୍କା ଖର୍ଚ୍ଚ କରୁଛନ୍ତି । ଏହାସତ୍ତ୍ୱେ ନିର୍ବାଚନୀ ମଇଦାନରେ କିଏ ଜିତୁଛନ୍ତି ତ ଆଉ କେହି ହାରୁଛନ୍ତି। ତେବେ ବରଗଡ଼ ବ୍ଲକ ବରାହଗୋଡା ପଞ୍ଚାୟତରେ ଅଟୋ ଚାଳକରୁ ସରପଞ୍ଚ ହୋଇଥିବା ଶରତ କୁମ୍ଭାର କିଛି ଦୁର୍ବୃତ୍ତଙ୍କ ଧମକ ପରେ ଭୟଭୀତ ହୋଇ ସରପଞ୍ଚ ପଦ ଛାଡିବା ଏବଂ ଅଟୋ ଚଲାଇବାକୁ ମନସ୍ଥ କରିବା ଚର୍ଚ୍ଚାର ବିଷୟ ହୋଇଛି । ଏ ନେଇ ସେ ବରଗଡ଼ ଉପ ଜିଲାପାଳଙ୍କୁ ମଧ୍ୟ ନିଜ ଇସ୍ତଫା ପତ୍ର ପ୍ରଦାନ କରିଛନ୍ତି।
ଇସ୍ତଫା ପତ୍ରରେ ସେ ଉଲ୍ଲେଖ କରିଛନ୍ତି, ସେ ଅଟୋ ଚଳାଇ ପରିବାର ଗୁଜୁରାଣ ମେଣ୍ଟାଇ ଆସୁଛନ୍ତି। ତେବେ ଗତ ପଞ୍ଚାୟତ ନିର୍ବାଚନ ସମୟରେ ତାଙ୍କ ପଡାବାସୀ କହିବାରୁ ସେ ୱାର୍ଡ ମେମ୍ବର ପଦବୀରେ ମନୋନୀତ ହୋଇଥିଲେ। ପରେ ତାଙ୍କୁ ନାଏବ ସରପଞ୍ଚ ମନୋନୀତ କରାଯାଇଥିଲା । ତେବେ ଦୁର୍ଭାଗ୍ୟବଶତଃ ପଞ୍ଚାୟତର ସରପଞ୍ଚଙ୍କ ଦେହାନ୍ତ ହୋଇଥିଲା। ଏହାପରେ ଶରତ କୁମ୍ଭାର ସରପଞ୍ଚ ଦାୟିତ୍ୱରେ ରହିଥିଲେ। ତେବେ ଆରମ୍ଭରୁ ସବୁ ଠିକଠାକ ଚାଲିଥିଲା। ମାତ୍ର ଗତ କିଛି ମାସ ହେଲା, କିଛି ଦୁର୍ବୃତ୍ତ ଦାଦାଗିରି କରି ଦସ୍ତଖତ ମାଗୁଛନ୍ତି ଏବଂ ଜୀବନରେ ମାରି ଦେବାକୁ ଧମକ ଦେଉଛନ୍ତି। ଫଳରେ ତାଙ୍କ ଓ ପରିବାର ଜୀବନ ପ୍ରତି ବିପଦ ରହିଛି। ଏହି ଦୃଷ୍ଟିରୁ ସେ ସରପଞ୍ଚ ପଦବୀରୁ ଇସ୍ତଫା ଦେଉଛନ୍ତି ବୋଲି ଉପ ଜିଲାପାଳଙ୍କୁ ଲେଖି ଜଣାଇଛନ୍ତି।
ଅନ୍ୟପଟେ ସେ ସରପଞ୍ଚ ପଦବୀରେ ଥିଲେ ମଧ୍ୟ ତାହା ଉପରେ ଆଉ ବଡ଼ ଲୋକ ଅଛନ୍ତି ଏବଂ ଚାପ ପକାଉଥିବା ସେ କହିଛନ୍ତି। ଏହି ଦୃଷ୍ଟିରୁ ସରପଞ୍ଚ ପଦବୀ ପାଇଁ ତାଙ୍କ ଯୋଗ୍ୟତା ନାହିଁ, ସେ ଅଟୋ ଚଳାଇ ପରିବାର ଗୁଜୁରାଣ ମେଣ୍ଟାଇବେ ବୋଲି କହିବା ସହିତ ରାଜନୀତି ପ୍ରତି ତାଙ୍କ ବିତସ୍ପୃହତା ପ୍ରକାଶ କରିଛନ୍ତି। ତେବେ କେଉଁମାନେ ତାଙ୍କ ଭଳି ଜଣେ ଜନ ପ୍ରତିନିଧିଙ୍କୁ କେଉଁ ସ୍ବାର୍ଥରେ କେଉଁମାନେ ଧମକ ଦେଇଥିଲେ ଏବଂ ଦାଦାଗିରି କରି ଦସ୍ତଖତ ପାଇଁ ଚାପ ପ୍ରୟୋଗ କରୁଥିଲେ, ତାହା ମଧ୍ୟ ତଦନ୍ତ ସାପେକ୍ଷ ହେବା ସହିତ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବା ଦରକାର ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି।
