ସଜନାଗଡ଼, ୨୮।୧(ଡି.ଏନ.ଏ.) ବାଲେଶ୍ୱରରୁ ମୟୂରଭଞ୍ଜ ଜିଲାକୁ ସଂଯୋଗ କରୁଥିବା ସେରଗଡ଼ ଭାୟା ନୀଳଗିରି ଉଦଳା ୧୯ନଂ. ରାଜ୍ୟ ରାଜପଥର ନୀଳଗିରି ନିକଟ ସଜନାଗଡ଼ ଦେଇଯାଇଥିବା ବଡ଼ପୋଲ ଉପରେ ପୂର୍ତ୍ତ ବିଭାଗ ପକ୍ଷରୁ ଘାଘରା ସେତୁ ନିର୍ମାଣ ଆରମ୍ଭ ହୋଇଛି। ୨ବର୍ଷ ପୂର୍ବରୁ ଏଠାରେ ପୋଲ ନିର୍ମାଣ ଲାଗି ଶିଳାନ୍ୟାସ କରାଯାଇଥିଲା। ପରେ ସମ୍ପୃକ୍ତ ଠିକାଦାର ଉକ୍ତ କାର୍ଯ୍ୟ କରୁ ନ ଥିବା ବେଳେ ପ୍ରଶାସନିକ ଅଧିକାରୀଙ୍କ ତାଗିଦ୍ ପରେ କିଛି ଦିନ ହେବ କାର୍ଯ୍ୟ ଆରମ୍ଭ ହୋଇଛି। ଗୁରୁବାର ପୂର୍ବାହ୍ନରେ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ରାମଚନ୍ଦ୍ର ସେଠୀ ସେତୁ ନିର୍ମାଣ ସ୍ଥାନରେ ପହଞ୍ଚତ୍ କାର୍ଯ୍ୟକୁ ଅନୁଧ୍ୟାନ କରିଥିଲେ। ସେଠାରେ ଉପସ୍ଥିତ ସହକାରୀ ଯନ୍ତ୍ରୀ ପ୍ରଫୁଲ୍ଲ କୁମାର ଦାସ, କନିଷ୍ଠଯନ୍ତ୍ରୀ ଲକ୍ଷ୍ମଣ ସିଂ ଓ ଠିକା ସଂସ୍ଥାର କର୍ମଚାରୀଙ୍କଠାରୁ ସମସ୍ୟା ବିଷୟରେ ବୁଝିଥିଲେ। ପରେ ପୋଲ ଉପରିଭାଗ ବିପଦସଂକୁଳ ଅବସ୍ଥା ମଧ୍ୟ ବୁଲି ଦେଖିଥିଲେ। ଫେବୃୟାରୀ ୧୦ତାରିଖ ସୁଦ୍ଧା କାମର ଅଗ୍ରଗତି ସହ ଫାଉଣ୍ଡେଶନ୍ ବେସ୍ ପିଲର ଉପରକୁ ଉଠିବା ଦରକାର ନ ହେଲେ କାର୍ଯ୍ୟାନୁଷ୍ଠାନ ଗ୍ରହଣ ହେବା ନେଇ ଚେତାବନୀ ଦେଇଥିଲେ।
ନୂତନ ପୋଲ ନିର୍ମାଣ କାର୍ଯ୍ୟ ପାଇଁ ପୁରୁଣା ପୋଲ ପାଶର୍ବରେ ଥିବା ମାଟି ଅଧିକ ତାଡ଼ି ଦିଆଯାଇଥିବାରୁ ପୋଲ ଉପରେ ଭାରିଯାନ ଚଳପ୍ରଚଳ ଫଳରେ ଏହାର ଅପରପାଶର୍ବର କିଛି ଅଂଶ ବାଡ଼ା ସହ ୨୦ଫୁଟ ତଳକୁ ଖସି ପଡ଼ିଥିଲା। ଏଥିପାଇଁ ଦୁଇଦିନ ରାସ୍ତା ବିଚ୍ଛିନ୍ନ ହୋଇଯାଇଥିବା ବେଳେ କେବଳ ମୋଟରସାଇକେଲ ଚାଲିଥିଲା। ପରେ ବାଲି ବସ୍ତା ଓ ମୋରମ ଦିଆଯାଇ ଗାଡି ଚଳପ୍ରଚଳ କରୁଛି। ଠିକାଦାର ଓ ବିଭାଗୀୟ ଅଧିକାରୀଙ୍କ ଦାୟିତ୍ୱହୀନତା ପାଇଁ ଏପରି ଅବସ୍ଥା ହୋଇଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଥିଲେ। ଲୋକଙ୍କ ସୁରକ୍ଷା ଦିଗରେ ପ୍ରଶାସନର ନୀରବତାକୁ ନେଇ ଅଞ୍ଚଳବାସୀ ତୀବ୍ର ବିରୋଧ କରିଥିଲେ।
