ମୁମ୍ବାଇ,୯।୬: ମହାରାଷ୍ଟ୍ରରେ ଔରଙ୍ଗଜେବଙ୍କୁ ନେଇ ଦୁଇଟି ଜିଲାରେ ଉତ୍ତେଜନା ଦେଖାଦେଇଛି। ପ୍ରଥମ ଘଟଣା କୋହ୍ଲାପୁରରେ ଘଟିଥିଲା ଯେଉଁଠାରେ ମଙ୍ଗଳବାର କିଛି ଯୁବକ ସୋସିଆଲ ମିଡିଆରେ ଔରଙ୍ଗଜେବଙ୍କ ସମର୍ଥନରେ ପୋଷ୍ଟ କରିଥିଲେ। ବୁଧବାର ଏହାକୁ ବିରୋଧ କରାଯାଇ ପ୍ରତିବାଦ ବେଳେ ବିକ୍ଷୋଭକାରୀମାନେ ପୋଲିସ ସହିତ ସଂଘର୍ଷ କରିଥିଲେ। ଏହାପୂର୍ବରୁ ମଙ୍ଗଳବାର ଅହମ୍ମଦନଗରରେ ପଥର ଫିଙ୍ଗିବା ଘଟଣା ସାମ୍ନାକୁ ଆସିଛି। ଔରଙ୍ଗଜେବଙ୍କ ସମର୍ଥନରେ ଏକ ରାଲି ବିରୋଧରେ ଏଠାରେ ଏକ ପ୍ରଦର୍ଶନ ଆୟୋଜନ କରାଯାଇଥିଲା। ଏହାକୁ ନେଇ ଉଦ୍ଧବ ଠାକରେ ଦଳର ଏମ୍ପି ସଞ୍ଜୟ ରାଉତ ଭାଜପାକୁ କଟାକ୍ଷ କରିଛନ୍ତି। ସେ କହିଛନ୍ତି ବଜରଙ୍ଗ ବାଲୀ କର୍ନାଟକରେ ଭାଜପାକୁ ସାହାଯ୍ୟ କରିନାହାଁନ୍ତି। ତେଣୁ ଏବେ ମହାରାଷ୍ଟ୍ରରେ ଔରଙ୍ଗଜେବ ଉପରେ ଭାଜପା ଭରସା କରୁଛି।
ଏଥିସହିତ ସେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ, ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ମଧ୍ୟ ଟାର୍ଗେଟ କରିଛନ୍ତି। ଖବରଦାତାଙ୍କ ସହ ଗୁରୁବାର ଆଲୋଚନା ବେଳେ ସଞ୍ଜୟ କହିଛନ୍ତି, କୋହ୍ଲାପୁରର ସ୍ଥିତି ନିୟନ୍ତ୍ରଣରେ ରହିଛି। ମୋତେ ମିଳିଥିବା ସୂଚନା ଅନୁଯାୟୀ କୋହ୍ଲାପୁର ଲୋକେ ଏହି ସଂଘର୍ଷରେ ଜଡିତ ନୁହଁନ୍ତି। ପରିସ୍ଥିତିକୁ ଖରାପ କରିବା ପାଇଁ ବାହାରୁ ଲୋକଙ୍କୁ ଅଣାଯାଇଥିଲା। ଶିନ୍ଦେ ସରକାର କ୍ଷମତାକୁ ଆସିବା ପରଠାରୁ ଏପରି କାହିଁକି ବାରମ୍ବାର ଘଟୁଛି?
ଯଦି ତୁମେ ହିନ୍ଦୁତ୍ୱ ବିଷୟରେ କହୁଛ, ତେବେ ତୁମର ହିନ୍ଦୁତ୍ୱ ଏତେ ଦୁର୍ବଳ ଯେ, ଯଦି କୌଣସି ସହରରେ କାହାର ଫଟୋ ଏକ କାର୍ଯ୍ୟକ୍ରମରେ ବ୍ୟବହୃତ ହୁଏ, ତେବେ ତୁମର ହିନ୍ଦୁତ୍ୱ ବିପଦରେ ପଡ଼ିଯାଉଛି। ମହାରାଷ୍ଟ୍ରରେ ଔରଙ୍ଗଜେବଙ୍କୁ ସମାଧି ଦିଆଯିବାର ଚାରି ଶହ ବର୍ଷ ବିତିଯାଇଛି। ତଥାପି ତୁମେ ନିର୍ବାଚନରେ ଜିତିବା ପାଇଁ ତାଙ୍କର ସାହାରା ନେଉଛି। ଏହାର କାରଣ ହେଉଛି ବଜରଙ୍ଗ ବାଲି କର୍ନାଟକରେ ସାହାଯ୍ୟ କରି ନ ଥିଲେ। ସେଥିପାଇଁ ତୁମେ ଆମ ରାଜ୍ୟରେ ଔରଙ୍ଗଜେବଙ୍କ ସହାୟତା ଆବଶ୍ୟକ କରୁଛ। ଭାଜପା ମହାରାଷ୍ଟ୍ରରେ କି ପ୍ରକାର ରାଜନୀତି କରିବାକୁ ଯାଉଛି। ଏହି ଗୈରିକ ଦଳର ଆଖପାଖ ଲୋକେ ଦଙ୍ଗାକାରୀ। ସର୍ବପ୍ରଥମେ ସେମାନଙ୍କୁ ନିୟନ୍ତ୍ରଣ କରୁ। ଯଦି ପ୍ରକୃତରେ ଭାଜପା ରାଜ୍ୟବାସୀଙ୍କ ପାଇଁ କିଛି କରିବାକୁ ଚାହୁଁଛି, ତେବେ ଏହି ଦଙ୍ଗା ବନ୍ଦ କରୁ। ଶିନ୍ଦେ ସରକାର ସଚେତନ ହୁଅନ୍ତୁ ବୋଲି ସଞ୍ଜୟ କହିଛନ୍ତି।
