ବଲାଙ୍ଗୀର ଅଫିସ,୧୭ା୧: ଗଣତନ୍ତ୍ରର ସଶକ୍ତିକରଣ, ତୃଣମୂଳସ୍ତରରୁ ଲୋକଙ୍କ ଭାଗିଦାରୀ ଏବଂ ବିକାଶମୂଳକ କାର୍ଯ୍ୟରେ ଜନସାଧାରଣଙ୍କ ସହଭାଗିତାକୁ ସୁଦୃଢ଼ କରୁଥିବା ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି। ଏହି ସମୟରେ ଗୋଟିଏ ପଞ୍ଚାୟତର ସରପଞ୍ଚ ପଦକୁ ନିଲାମ ପ୍ରକ୍ରିୟାରେ ଚୂଡାନ୍ତ କରାଯାଇଥିବା ଚର୍ଚ୍ଚାର ବିଷୟ ହୋଇଛି। ଏଭଳି ଏକ ଘଟଣା ଘଟିଛି ବଲାଙ୍ଗୀର ଜିଲା ପୁଇଁତଳା ବ୍ଲକ ବିଲେଇସର୍ଡା ପଞ୍ଚାୟତରେ। ସେଠାକାର ଏକ ମନ୍ଦିର ପୂଜା କମିଟି ବୈଠକ କରି ସରପଞ୍ଚ ପଦକୁ ନିର୍ବାଚନ ପ୍ରତିଦ୍ୱନ୍ଦ୍ୱିତାରୁ ଦୂରରେ ରଖିବା ପାଇଁ ନିଲାମ ଡାକ ଜରିଆରେ ଚୂଡାନ୍ତ କରିଥିବା କୁହାଯାଉଛି। ଉକ୍ତ ନିଲାମ ପ୍ରକ୍ରିୟାରେ ଜଣେ ଆଶାୟୀ ପ୍ରାର୍ଥୀ ୪୪ ଲକ୍ଷ ୧୦ ହଜାର ଟଙ୍କାରେ ସରପଞ୍ଚ ପଦ ହାସଲ କରିଥିବା ସୂଚନା ମିଳିଛି।
ମିଳିଥିବା ସୂଚନା ମୁତାବକ, ସରପଞ୍ଚ ପଦବୀକୁ ନେଇ ମନ୍ଦିର କମିଟି କିଛିଦିନ ତଳେ ଗାଁରେ ଏକ ବୈଠକ ଡକାଇଥିଲେ। ବୈଠକରେ ବିଲେଇସର୍ଡା, ବନ୍ଦନାକଟା ଓ କସୁରୁପାଲି ଗ୍ରାମର ଶତାଧିକ ଲୋକ କୁଆଡେ ଯୋଗ ଦେଇଥିଲେ। ପଞ୍ଚାୟତ ଭୋଟ୍ରେ ସରପଞ୍ଚ ହେବାକୁ ଆଶାୟୀ ଥିବା ବ୍ୟକ୍ତଙ୍କୁ ଡକାଯାଇଥିଲା। ୩ ଜଣ ସରପଞ୍ଚ ଆଶାୟୀ ଉକ୍ତ ବୈଠକରେ ଯୋଗ ଦେଇଥିଲେ। କମିଟିର କେତେକ ସଦସ୍ୟ କହିଥିଲେ ଯେ, ସରପଞ୍ଚ ପଦବୀକୁ ନିର୍ବାଚନ ପ୍ରତିଦ୍ୱନ୍ଦ୍ୱିତାରୁ ଦୂରେଇ ରଖିବାକୁ ନିଷ୍ପତ୍ତି ହୋଇଛି। ଯିଏ କମିଟିକୁ ଅଧିକ ଟଙ୍କା ସହାୟତା ଦେବେ ତାକୁ ସରପଞ୍ଚ ଭାବେ ବୈଠକରେ ଘୋଷଣା କରାଯିବ। କମିଟି ନିଷ୍ପତ୍ତି ଅନୁସାରେ ଅନ୍ୟ କୌଣସି ବ୍ୟକ୍ତି ଆଉ ପ୍ରତିଦ୍ୱନ୍ଦ୍ୱିତା କରିବେ ନାହିଁ। ଏହି ସର୍ତ୍ତ ଅନୁସାରେ ଆଶାୟୀ ୩ ଜଣ ମଧ୍ୟରୁ ଜଣେ ପ୍ରାର୍ଥୀ ୨୧ଲକ୍ଷ ଟଙ୍କା କମିଟିକୁ ଦେବାକୁ ପ୍ରଥମେ ଘୋଷଣା କରିଥିଲେ। ଏହାକୁ ଅନ୍ୟ ଜଣେ ଆଶାୟୀ ପ୍ରାର୍ଥୀ ବେଆଇନ ଘୋଷଣା କରିଥିଲେ। ନିର୍ବାଚନରେ ନିଲାମ ଡାକ ଠିକ୍ ନୁହେଁ ବୋଲି କହିଥିଲେ। ତେବେ ଉକ୍ତ ବୈଠକରେ ଉପସ୍ଥିତ ଲୋକେ ଏହା କମିଟି ନିଷ୍ପତ୍ତି ମାନିବାକୁ ପଡିବ ବୋଲି ବୁଝାଶୁଝା କରିଥିଲେ। ପରେ ବିଦ୍ରୋହୀ ଆଶାୟୀ ପ୍ରାର୍ଥୀ ଜଣକ ୪୪ ଲକ୍ଷ ଡାକ ଛାଡିଥିଲେ। ଏହା ପରେ ତୃତୀୟ ଆଶୟୀ ପ୍ରାର୍ଥୀ ୪୪ ଲକ୍ଷ ୧୦ହଜାର ଟଙ୍କା ଡାକ ଛାଡିବା ପରେ ସମସ୍ତେ ତାଳି ମାରି ସର୍ବାଧିକ ଟଙ୍କା ଘୋଷଣା କରିଥିବା ତୃତୀୟ ଆଶାୟୀ ପ୍ରାର୍ଥୀଙ୍କୁ ଭାବି ସରପଞ୍ଚ ବୋଲି ଘୋଷଣା କରିଥିଲେ। ଏହି ବୈଠକ ଗତ ୧୫ ତାରିଖରେ ବିଲେଇସର୍ଡା ଗାଁରେ ବସିଥିବା କୁହାଯାଉଛି। ସରପଞ୍ଚ ପଦବୀ ୪୪ ଲକ୍ଷ ୧୦ ହଜାର ଟଙ୍କାରେ ନିଲାମ ହୋଇଥିବା ଖବର ପ୍ରଚାରିତ ହେବା ପରେ ସୋମବାର ସରପଞ୍ଚ ଘୋଷିତ ପ୍ରାର୍ଥୀ ଏକ ଗଣମାଧ୍ୟମରେ ମତ ରଖି ୪୪ ଲକ୍ଷ ନୁହେଁ ୪୪ ହଜାର ଟଙ୍କା ଦେବାକୁ ପୂଜା କମିଟି ପକ୍ଷରୁ କୁହାଯାଇଥିଲା ଓ ସେ ରାଜି ହୋଇଥିବା ଜଣାଇଛନ୍ତି। ହେଲେ ଘଟଣାର ତଦନ୍ତ କରିବାକୁ ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି।
