ଦିଗପହଣ୍ଡି,୫।୯(ଅଶେଷ ନାଥ ମିଶ୍ର): ଜମିରେ ପାଣି ମଡ଼ାଇବା ବିବାଦକୁ କେନ୍ଦ୍ର କରି ଜଣଙ୍କୁ ଖଣ୍ଡାରେ ଆକ୍ରମଣ କରି ହତ୍ୟା ଉଦ୍ୟମ କରାଯାଇଥିବା ଅଭିଯୋଗ ହୋଇଛି। ଗଞ୍ଜାମ ଜିଲା ଦିଗପହଣ୍ଡି ବ୍ଲକ ପଦ୍ମନାଭପୁର ଗ୍ରାମରେ ଏହି ଅଭାବନୀୟ ଘଟଣା ଘଟିଛି। ଗ୍ରାମର ରାଜେନ୍ଦ୍ର ସେଠୀଙ୍କୁ ଆକ୍ରମଣ କରିବା ଅଭିଯୋଗରେ ଦିଗପହଣ୍ଡି ପୋଲିସ୍ ଶନିବାର ଅଭିଯୁକ୍ତ ବାଟୁଳା ସେଠୀ ଓରଫ ଶଙ୍କର ସେଠୀ (୨୧)ଙ୍କୁ ଗିରଫ କରି କୋର୍ଟ ଚାଲାଣ କରିଛି।
ମିଳିଥିବା ସୂଚନା ମୁତାବକ, ରାଜେନ୍ଦ୍ର ତାଙ୍କ ଧାନ ଚାଷ ଜମିରୁ ରମେଶ ସେଠୀଙ୍କ ଜମିକୁ ଶୁକ୍ରବାର ପୂର୍ବାହ୍ନ ପ୍ରାୟ ୧୧ଟାରେ ପାଣି ଛାଡ଼ି ନଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ରମେଶ ଘରକୁ ଫେରିବା ପରେ ରାତି ପ୍ରାୟ ୯:୩୦ରେ ପୁଅ ବାଟୁଳାଙ୍କୁ ଏ ସମ୍ପର୍କରେ ଜଣାଇଥିଲେ। ଏଥିରେ ଉତ୍ତେଜିତ ହୋଇ ବାଟୁଳା ଘରୁ ଏକ ଖଣ୍ଡା ଧରି ରାଜେନ୍ଦ୍ରଙ୍କୁ ଖୋଜିବାକୁ ବାହାରିଥିଲେ। ଗାଁର ବଡ଼ମଠରେ ରାଜେନ୍ଦ୍ର ବସି ଜନ୍ମାଷ୍ଟମୀ ପ୍ରସାଦ ଖାଉଥିବା ସମୟରେ ବାଟୁଳା ସେଠାରେ ପହଞ୍ଚି ଗାଳିଗୁଲଜ କରିବା ସହ ତାଙ୍କ ମୁଣ୍ଡକୁ ଲକ୍ଷ୍ୟ କରି ଖଣ୍ଡା ଚୋଟ ପକାଇଥିଲେ। ତେବେ ରାଜେନ୍ଦ୍ର ଘୁଞ୍ଚି ଯିବାରୁ ଅଳ୍ପକେ ବର୍ତ୍ତି ଯାଇଥିଲେ ଏବଂ ବାଟୁଳା ତଳେ ପଡ଼ିଯାଇଥିଲେ। ସ୍ଥାନୀୟ ଲୋକେ ଛଡ଼ାଛଡ଼ି କରିବା ପରେ ରାଜେନ୍ଦ୍ର ସେଠାରୁ ଚାଲିଯାଇଥିଲେ।
ଏହାର କିଛି ସମୟ ପରେ ବାଟୁଳା ପୁଣି ରାଜେନ୍ଦ୍ରଙ୍କ ଘର ପାଖକୁ ଯାଇ ପରିବାର ଲୋକଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଜୀବନରେ ମାରିଦେବାକୁ ଧମକ ଦେଇଥିଲେ। ଶନିବାର ସକାଳେ ରାଜେନ୍ଦ୍ର ଦିଗପହଣ୍ଡି ଥାନାରେ ଏତଲା ଦେବା ପରେ ଆଇଆଇସି କିଶୋର କୁମାର ସାମଲ ମାମଲା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏଏସଆଇ ଝୁନୁ ମାଝୀ ଅପରାହ୍ନ ପ୍ରାୟ ୧ଟାରେ ଅଭିଯୁକ୍ତ ବାଟୁଳାଙ୍କୁ ଗିରଫ କରିବା ସହ ଆକ୍ରମଣରେ ବ୍ୟବହୃତ ଖଣ୍ଡା ଜବତ କରିଥିଲେ।
ଥାନା ମାମଲା ନଂ. ୩୭୮/୨୬ (BNS ଦଫା ୩୨୯(୪)/୨୯୬/୧୦୯/୩୫୧(୨) ଓ ଆର୍ମସ ଆକ୍ଟର ଧାରା ୨୫(୧)(ଏ)/୨୭(୧)) ଅନୁଯାୟୀ ଅଭିଯୁକ୍ତଙ୍କ ଜାମିନ ଆବେଦନ ଖାରଜ ହେବାରୁ ତାଙ୍କୁ ଦିଗପହଣ୍ଡି ସବ୍-ଜେଲ୍ ହାଜତକୁ ପଠାଇ ଦିଆଯାଇଛି।