ଦେବଗଡ଼,(ଶଶାଙ୍କ ଶେଖର ଝାଙ୍କର): ଜାଲ ଦସ୍ତାବିଜ ବଳରେ ଦେବଗଡ ପୌରାଞ୍ଚଳ ବାବୁସାହି(ୟୁନିଟ-୮)ର ଏକ ମୂଲ୍ୟବାନ ଜମି ବିକ୍ରୀ ଉଦ୍ୟମ ହେଉଥିବା ଜିଲା ଉପନିବନ୍ଧକଙ୍କ ଦ୍ୱାରା ଧରା ପଡିଛି । ଏନେଇ ଜିଲା ଉପ ନିବନ୍ଧକ ଦେବଗଡ ଥାନାରେ ଲିଖୀତ ଅଭିଯୋଗ କରିବାପରେ ପୁଲିସ ଦେବଗଡ ପୌରାଞ୍ଚଳ ତଳ ଭିତିରିଆସାହିର ଜଣେ ବିଧବା ମହିଳା ଓ ତାଙ୍କ ପୁଅ ବିରୁଦ୍ଧରେ ଏକ ମାମଲା ରୁଜୁକରି ଘଟଣାର ତଦନ୍ତ ଚଳାଇଛି । ମିଳିଥିବା ସୂଚନା ଅନୁଯାୟୀ ଦେବଗଡ ପୌରାଞ୍ଚଳ ତଳ ଭିତିରିଆ ସାହିର ସ୍ବର୍ଗତଃ ଅରୁଣ ପ୍ରଧାନଙ୍କ ବିଧବା ସ୍ତ୍ରୀ ସଞ୍ଜୁକ୍ତା ପ୍ରଧାନ ଓ ପୁଅ ଶାନ୍ତନୁ ପ୍ରଧାନ ଦେବଗଡ ପୌରାଞ୍ଚଳ ବାବୁସାହି(ୟୁନିଟ-୮)ରେ ଥିବା ୫୬ ଡେସିମିଲ ଜମି ବିକ୍ରୀକୁ ୮୮ ଲକ୍ଷରୁ ଉର୍ଦ୍ଧ୍ୱ ଟଙ୍କାରେ ଦେବଗଡ ପୌରାଞ୍ଚଳ ରଙ୍ଗିଆଗୁଡା ସାହିର ସୁଜାତା ହଂସ, ତଳ ଭିତିରିଆ ସାହିର ସଞ୍ଜୟ ଖାଁ, ମେହେଜାବିନ ବାନୋ ଓ ତିଲେଇବଣି ବ୍ଲକ ତଥା ଦେବଗଡ ଥାନାଞ୍ଚଳ କୁରେହିଁବାହାଳ ଗ୍ରାମର ଡୋଳାକାନ୍ତ ନାୟକଙ୍କୁ ବିକ୍ରୀପାଇଁ ଉଦ୍ୟମ କରିଥିଲେ । ଏଥିପାଇଁ ସଞ୍ଜୁକ୍ତା ଓ ତାଙ୍କ ପୁଅ ଶାନ୍ତନୁ ଜାଲ ଜିଲା ଉପନିବନ୍ଧକଙ୍କ କାର୍ଯ୍ୟାଳୟରେ ୪ଲକ୍ଷ ୪୪ ହଜାର ଟଙ୍କାର ଷ୍ଟାମ୍ପ ଡ୍ୟୁଟି ସହିତ ଅନ୍ୟାନ୍ୟ ଦସ୍ତାବିଜ ଦାଖଲ କରିଥିଲେ ଏବଂ ଜମି ବିିକ୍ରି ଓ ୧ ପଞ୍ଜୀକରଣ ନିମନ୍ତେ ପ୍ରକ୍ରିୟା ଆରମ୍ଭ ହୋଇଥିଲା । ତେବେ କାଗଜପତ୍ର ଯାଞ୍ଚ ସମୟରେ ଦାଖଲ ହୋଇଥିବା ଲିଗାଲ ହେୟାର ସାର୍ଟିଫିକେଟ ଜାଲ ହୋଇଥିବା ଜିଲା ଉପ ନିବନ୍ଧକଙ୍କ ସନ୍ଦେହ ହୋଇଥିଲା । ଫଳରେ ସେ ଦାଖଲ ହୋଇଥିବା ଲିଗାଲ ହେୟାର ସାର୍ଟିଫିକେଟର ବୈଦ୍ଧତା ନିମନ୍ତେ ଦେବଗଡ ତହସିଲଦାରଙ୍କ କାର୍ଯ୍ୟାଳୟ ସହ ଯୋଗାଯୋଗ କରିବାରୁ ଏହା ଜାଲ ବୋଲି ଜଣାପଡିଥିଲା । ଫଳରେ ଜିଲା ଉପନିବନ୍ଧକ ଏନେଇ ଦେବଗଡ ଥାନାରେ ଲିଖିତ ଅଭିଯୋଗ କରିଥିଲେ ।
