ବ୍ରହ୍ମପୁର ଅଫିସ,୧୭ା୧୨: ଜଣେ ଯୁବକଙ୍କୁ ହତ୍ୟା ଉଦ୍ୟମ ଘଟଣାରେ ବଡବଜାର ଥାନା ପୋଲିସ ୨ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ପ୍ରହଲ୍ଲାଦ ନଗର ୪ର୍ଥ ଲାଇନର ସମୀର ଜେନା ଓ ପୁରୁଣା ବ୍ରହ୍ମପୁର ନିକଟସ୍ଥ ଆଇନାବନ୍ଧ ସାହିର ଜିତେନ୍ଦ୍ର ଗୌଡ଼ ଓରଫ ଜିତୁ। ଉଭୟଙ୍କ ନାମରେ ଏକାଧିକ ମାମଲା ରହିିଛି। ପ୍ରେମ ବ୍ୟାପାରକୁ କେନ୍ଦ୍ରକରି କାଳୁଚରଣ ମହାପାତ୍ରଙ୍କୁ ଉପରୋକ୍ତ ଅଭିଯୁକ୍ତ ମାନେ ଖଣ୍ଡା ଓ କାତିରେ ମରଣାନ୍ତକ ଆକ୍ରମଣ କରିଥିଲେ। ପୋଲିସ ଅଭିଯୁକ୍ତମାନଙ୍କ ଠାରୁ ଘଟଣା ବେଳେ ବ୍ୟବହୃତ ଦୁଇଟି ଖଣ୍ଡା ଓ ଏକ ବାଇକ (ନଂ ଓଡ଼ି-୦୭-ବି -୬୫୦୭) ଜବତ କରିଛି। ମାମଲା ନଂ. ୩୪୫/୨୨ରେ ଅଭିଯୁକ୍ତଦ୍ୱୟଙ୍କୁ ପୋଲିସ କୋର୍ଟ ଚାଲାଣ କରିଛି। ପରେ କୋର୍ଟ ନିର୍ଦ୍ଦେଶରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ପ୍ରକାଶ ଯେ, ଜଣେ ଯୁବତୀଙ୍କୁ କାଳୁଚରଣ ଓ ସମୀର ଭଲ ପାଉଥିଲେ। ଏହାକୁ କେନ୍ଦ୍ରକରି ଉଭୟଙ୍କ ମଧ୍ୟରେ ତିକ୍ତତା ଲାଗି ରହିଥିଲା। ଗତ ୧୩ ତାରିଖ ରାତ୍ର କାଳୁଚରଣ ମହାପାତ୍ରଙ୍କୁ ମୃଦଙ୍ଗିଆ ହାଇସ୍କୁଲ ନିକଟରେ ଏକାକୀ ଦେଖି ସମୀର ଜେନା ଓ ତାଙ୍କ ସହଯୋଗୀ ମାନେ ସେଠାରେ ତାଙ୍କ ସହ ଝଗଡା କରିଥିଲେ। ପରେ କାଳୁଚରଣଙ୍କୁ ସମୀର ଓ ତାଙ୍କ ସହଯୋଗୀ ମନେ ଖଣ୍ଡାରେ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଖବର ପାଇ ଆହତ କାଳୁଙ୍କ ଭାଇ ଦୀପକ କୁମାର ମହାପାତ୍ର ଘଟଣା ସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରି ଏମକେସିଜି ମେଡିକାଲରେ ଭର୍ତ୍ତି କରିଥିଲେ। ପରେ ସେ ଏନେଇ ଥାନାରେ ଅଭିଯୋଗ କରିଥିଲେ।
