ଦିଗପହଣ୍ଡି,୧୨ା୫(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଗଡ଼ସାମନ୍ତରାପୁର ଗ୍ରାମର ମାମି ଗୌଡ଼ଙ୍କୁ ତାଙ୍କ ସ୍ବାମୀ, ଶାଶୁ ଓ ଶ୍ୱଶୁର ଯୌତୁକ ପାଇଁ ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି। ମାମିଙ୍କ ଏତଲା ଅନୁଯାୟୀ, କେ.ନୂଆଗାଁ ଥାନା ଆଇଆଇସି ମୃତ୍ୟୁଞ୍ଜୟ ସ୍ବାଇଁ ଥାନାରେ କେସ୍ ନଂ.୧୧୬/୨୨ରେ ମୋକଦ୍ଦମା ରୁଜୁ କରି ତଦନ୍ତ ଚଳାଇଥିବା କହିଛନ୍ତି। ମାମିଙ୍କ ସ୍ବାମୀ ଚେରୁ ଗୌଡ଼ ଏବଂ ଶାଶୁ ,ଶ୍ୱଶୁର ଗିରଫ ଭୟରେ ଗାଁରୁ ଫେରାର ଥିବା ଜଣାପଡ଼ିଛି। ଅଭିଯୁକ୍ତ ଚେରୁ ଏବଂ ଶାଶୁ,ଶ୍ୱଶୁର ବୁଧବାର ସକାଳେ ମାମିଙ୍କୁ ଯୌତୁକ ପାଇଁ ଉଭୟ ଶାରୀରିକ ଓ ମାନସିକ ନିର୍ଯାତନା ଦେଇଥିଲେ। ପ୍ରତିବାଦ କରିବାରୁ ସେମାନେ ସଂଘବଦ୍ଧ ଭାବେ ତାଙ୍କୁ ନିସ୍ତୁକ ମାଡ଼ ମାରି ଲହୁଲୁହାଣ କରି ପକାଇଥିଲେ। ନିକଟସ୍ଥ ଶଙ୍କରଖାଳି ଗାଁରେ ରହୁଥିବା ବାପଘର ଲୋକେ କିଛି ଗ୍ରାମବାସୀଙ୍କ ସହାୟତାରେ ମାମିଙ୍କୁ ଉଦ୍ଧାର କରି ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ତାଙ୍କୁ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ସେଠାରୁ ଚିକିତ୍ସା ହୋଇ ଫେରିବା ପରେ ମାମି ସମ୍ପର୍କୀୟମାନଙ୍କ ସହାୟତାରେ ଥାନାରେ ପହଞ୍ଚି ଏତଲା ଦେଇଥିବା ତଦନ୍ତକାରୀ ପୋଲିସ ଅଧିକାରୀ ଏସ୍ଆଇ ସୁଜାତା କଆଁର କହିଛନ୍ତି।
ପ୍ରକାଶ ଯେ, ଗତ ପ୍ରାୟ ୬ ମାସ ପୂର୍ବେ ଚେରୁ ନିଶାସକ୍ତ ଅବସ୍ଥାରେ ତାଙ୍କ ମାମିଙ୍କୁ ମାଡ଼ ମାରି ଜେଲ ଯାଇଥିଲେ। ସେଠାରୁ ଜାମିନରେ ଫେରିବା ପରେ ପୁଣି ଥରେ ମାମିଙ୍କୁ ମାଡ଼ ମାରୁଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଥିବା ଆଇଆଇସି କହିଛନ୍ତି।
