ଅହମଦାବାଦ/ନୂଆଦିଲ୍ଲୀ,୧୮ା୩: ଅହମଦାବାଦସ୍ଥିତ ଗୁଜରାଟ ବିଶ୍ୱବିଦ୍ୟାଳୟର ‘ଏ’ ବ୍ଲକ୍ ହଷ୍ଟେଲରେ ବିଦେଶୀ ଛାତ୍ରମାନେ ନମାଜ ପାଠ କରିବାରୁ ଶନିବାର ବିଳମ୍ବିତ ରାତିରେ ସ୍ଥାନୀୟ ଏକ ଗୋଷ୍ଠୀ ପକ୍ଷରୁ ସେମାନଙ୍କୁ ସଂଘବଦ୍ଧ ଆକ୍ରମଣ କରାଯାଇଛି। ଏଥିରେ ୫ ଛାତ୍ର ଆହତ ହୋଇଛନ୍ତି। ଆହତଙ୍କ ମଧ୍ୟରୁ ଶ୍ରୀଲଙ୍କା ଓ ତାଜିକିସ୍ତାନର ଜଣେ ଲେଖାଏ ଛାତ୍ରଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଗାମୁଛା ପିନ୍ଧି ‘ଜୟ ଶ୍ରୀରାମ’ ସ୍ଲୋଗାନ ଦେଇଥିବା ଜଣେ ଆକ୍ରମଣକାରୀଙ୍କୁ ଚିହ୍ନଟ କରାଯାଇଛି। କିନ୍ତୁ ଅହମଦାବାଦ ପୋଲିସ ଅଭିଯୁକ୍ତମାନଙ୍କୁ ଧରିବାରେ ସକ୍ଷମ ହୋଇପାରିନାହିଁ।
ସରକାରଙ୍କ ଦ୍ୱାରା ପରିଚାଳିତ ଗୁଜରାଟ ୟୁନିଭର୍ସିଟିରେ ଆଫଗାନିସ୍ତାନ, ତାଜିକିସ୍ତାନ, ଶ୍ରୀଲଙ୍କା ଓ ଅନ୍ୟ କେତେକ ରାଷ୍ଟ୍ରର ପ୍ରାୟ ୩୦୦ ଛାତ୍ରୀଛାତ୍ର ଅଧ୍ୟୟନ କରନ୍ତି। ‘ଏ’ ବ୍ଲକ୍ ହଷ୍ଟେଲରେ ପ୍ରାୟ ୭୫ ଛାତ୍ରୀଛାତ୍ର ରୁହନ୍ତି। ଶନିବାର ରାତି ପ୍ରାୟ ୧୦ଟା ୫୦ରେ ଉକ୍ତ ହଷ୍ଟେଲକୁ ୨ ଡଜନରୁ ଊର୍ଦ୍ଧ୍ୱ ବ୍ୟକ୍ତି ପ୍ରବେଶ କରିଥିଲେ। ଛାତ୍ରାବାସରେ ରହୁଥିବା ବିଦେଶୀ ଛାତ୍ରମାନେ ସେଠାରେ ନମାଜ ପାଠ କରୁଥିବାରୁ ସେମାନେ ଆପତ୍ତି ଉଠାଇଥିଲେ। ଅଣଛାତ୍ର ଗୋଷ୍ଠୀ ସେମାନଙ୍କୁ କୌଣସି ମସ୍ଜିଦକୁ ଯାଇ ନମାଜ ପାଠ କରିବାକୁ କହିଥିଲେ। ଏହାକୁ ନେଇ ଉଭୟ ପକ୍ଷଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଅଣଛାତ୍ର ଗୋଷ୍ଠୀ ଉତ୍ତ୍ୟକ୍ତ ହୋଇ ବିଦେଶୀ ଛାତ୍ରଙ୍କ ଉପରେ ଟେକାମାଡ଼ ସହ ସେମାନଙ୍କ ରୁମ୍ଗୁଡ଼ିକରେ ଭଙ୍ଗାରୁଜା କରିଥିଲେ। କଣ୍ଟ୍ରୋଲ ରୁମ୍କୁ ଫୋନ୍ କଲ୍ ଯିବା ପରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲା। ପୋଲିସ କମିଶନର ଜିଏସ୍ ମଲିକ୍ କହିଛନ୍ତି, ୨୦-୨୫ ଜଣଙ୍କ ବିରୋଧରେ ମାମଲା ରୁଜୁ ହୋଇଛି। ଘଟଣାର ତଦନ୍ତ ପାଇଁ ଏକ ୯ ଜଣିଆ ଟିମ୍ ଗଠନ କରାଯାଇଛି। ଗୃହମନ୍ତ୍ରୀ ହର୍ଷ ସାଙ୍ଘ୍ଭୀ ପୋଲିସ ଅଧିକାରୀମାନଙ୍କ ସହ ବୈଠକ କରି ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ସେମାନଙ୍କୁ ନିର୍ଦ୍ଦେଶ ଦେଇଛନ୍ତି। ବିଶ୍ୱବିଦ୍ୟାଳୟ କୁଳପତି ନୀରଜ ଗୁପ୍ତା କହିଛନ୍ତି, ହଷ୍ଟେଲରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ସରକାର ଓ ପୋଲିସ ଏହି ପ୍ରସଙ୍ଗକୁ ଗମ୍ଭୀରତା ସହ ନେଇଛନ୍ତି। ତଦନ୍ତ ଚାଲିଛି। ସେହିପରି ଗୁଜରାଟ ସରକାର ଆକ୍ରମଣକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବେ ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ରଣଧୀର ଜୈସଓ୍ବାଲ ନିଜ ଏକ୍ସ’ ହ୍ୟାଣ୍ଡେଲରେ ଉଲ୍ଲେଖ କରିଛନ୍ତି।
