ଲଣ୍ଡନ,୨୦।୧୧(ଏପି): ଚଳିତ ଏଟିପି ଫାଇନାଲ୍ସରେ ରୁଷୀୟ ଟେନିସ ତାରକା ଡାନିଲ ମେଡ୍ଭେଡେଭ୍ ଉଚ୍ଚକୋଟୀର ପ୍ରଦର୍ଶନ କରିଛନ୍ତି। ଟୁର୍ନାମେଣ୍ଟରେ ଦ୍ୱିତୀୟ ଥର ପାଇଁ ଅଂଶଗ୍ରହଣ କରିଥିବା ମେଡ୍ଭେଡେଭ୍ ସେମିଫାଇନାଲରେ ପ୍ରବେଶ କରିଛନ୍ତି। ବର୍ଷ ଶେଷରେ ଆୟୋଜିତ ହେଉଥିବା ଏହି ଟୁର୍ନାମେଣ୍ଟରେ ଅଭିଜ୍ଞ ସର୍ବିୟାର ନୋଭାକ ଜୋକୋଭିଚ୍ଙ୍କୁ ହରାଇ ସେମି ଫାଇନାଲରେ ପ୍ରବେଶ କରିଛନ୍ତି। ୫ଥର ଚାମ୍ପିୟନ ଜୋକୋଭିଚ୍ଙ୍କୁ ମେଡଭେଡେଭ ବୁଧବାର ୬-୩, ୬-୩ ସେଟ୍ରେ ପରାସ୍ତ କରି ଗ୍ରୁପ୍ ପର୍ଯ୍ୟାୟରେ କ୍ରମାଗତ ଦ୍ୱିତୀୟ ବିଜୟ ହାସଲ କରି ଏହି ସଫଳତା ପାଇଛନ୍ତି।
ଗତବର୍ଷ ପଦାର୍ପଣରେ ମେଡ୍ଭେଡେଭ ଗ୍ରୁପ୍ ପର୍ଯ୍ୟାୟରେ ସବୁ ୩ଟି ଯାକ ମ୍ୟାଚ୍ରେ ପରାସ୍ତ ହୋଇଥିଲେ ମଧ୍ୟ ଏଥର ତ୍ରୁଟି ସୁଧାରି ଦୃଷ୍ଟାନ୍ତମୂଳକ ପ୍ରଦର୍ଶନ କରିଛନ୍ତି। ଜୋକୋଭିଚ୍ଙ୍କ ବିପକ୍ଷରେ ୪ଟି ମ୍ୟାଚ୍ ଖେଳି ମେଡ୍ଭେଡେଭ ୩ଟିରେ ବିଜୟ ହାସଲ କରିଛନ୍ତି। ତେବେ ବିଶ୍ୱର ୧ ନମ୍ବର ଖେଳାଳି ଜୋକୋଭିଚ୍ଙ୍କ ଲାଗି ଏବେବି ସୁଯୋଗ ରହିଛି। ଶୁକ୍ରବାର ଯଦି ସେ ୨୦୧୮ ଚାମ୍ପିୟନ ଆଲେକଜାଣ୍ଡର ଜେଭେରେଭଙ୍କୁ ପରାସ୍ତ କରିବେ ତା’ହେଲେ ସେ ଅଗ୍ରଗତି କରିବେ।
ଅନ୍ୟପଟେ ଜେଭେରେଭ ଜର୍ମାନୀ ଡିଏଗୋ ସ୍ବାର୍ଜମ୍ୟାନଙ୍କୁ ବୁଧବାର ୬-୩, ୪-୬, ୬-୩ ସେଟ୍ରେ ପରାସ୍ତ କରି ଆଶା ଉଜ୍ଜୀବିତ ରଖିଛନ୍ତି। ସେମିଫାଇନାଲ ଦୌଡ଼ରେ ବଜାୟ ରହିଥିବାରୁ ଜେଭେରେଭ ଖୁସି ଜାହିର କରିଛନ୍ତି। ଗୁରୁବାର ଅନ୍ୟଏକ ମ୍ୟାଚ୍ରେ ସ୍ପେନର ରାଫାଲ ନାଡାଲ ଓ ଷ୍ଟିଫାନୋସ ସିତିସ୍ପାସଙ୍କୁ ସେମିଫାଇନାଲରେ ସ୍ଥାନ ହାସଲ କରିବାକୁ ଭେଟିବେ। ନାଡାଲ ଅତ୍ୟନ୍ତ ସଫଳ ଖେଳାଳି ହୋଇଥିଲେ ମଧ୍ୟ କେବେବି ଏଟିପି ଫାଇନାଲ୍ସରେ ସଫଳ ହୋଇନାହାନ୍ତି।
