ଭୁବନେଶ୍ୱର,୯।୪(ଅନୁରାଧା ମହାରଣା): ଗତ ସପ୍ତାହରେ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଗଭର୍ନର ଶକ୍ତିକାନ୍ତ ଦାସ ୟୁପିଆଇ (ୟୁନିଫାଏଡ ପେମେଣ୍ଟ ଇଣ୍ଟରଫେସ) ସମ୍ବନ୍ଧରେ ଏକ ବଡ଼ ଘୋଷଣା କରିଥିଲେ। ତାଙ୍କ କହିବାନୁସାରେ, ଖୁବ ଶୀଘ୍ର ୟୁପିଆଇ ବ୍ୟବହାରକାରୀମାନେ ନିଜ ଫୋନରେ ୟୁପି ଆପ ଜରିଆରେ କ୍ୟାସ ଡିପୋଜିଟ ମେସିନ (ସିଡିଏମ)ରେ ନଗଦ ଜମା କରିପାରିବେ। ଏହାର ଅର୍ଥ ହେଉଛି ବ୍ୟାଙ୍କଗୁଡିକରେ ଥିବା କ୍ୟାଶ ଡିପୋଜିଟ କିଓସ୍କ ମେସିନରେ ଡେବିଟ କାର୍ଡର କୌଣସି ଆବଶ୍ୟକତା ରହିବ ନାହିଁ। ଗତ ବର୍ଷ ସେପ୍ଟେମ୍ବରରେ ୟୁପିଆଇ-ଏଟିଏମ୍ ଲଞ୍ଚ କରାଯାଇଥିଲା। ମାତ୍ର ଅନେକ ଲୋକ ଏହାର ବ୍ୟବହାର, ସୀମା ଏବଂ ଉପକାରିତା ବିଷୟରେ ଅବଗତ ନୁହଁନ୍ତି । ଏଥିରେ ଏଟିଏମ୍ ଡେବିଟ କାର୍ଡ ବିନା ବିଭିନ୍ନ ବ୍ୟାଙ୍କ ଆକାଉଣ୍ଟରୁ ୟୁପିଆଇ ମାଧ୍ୟମରେ ଟଙ୍କା ଉଠାଇପାରିବେ। ଏଥିରେ ଆପଣଙ୍କୁ କ୍ୟୁଆର୍ କୋଡ ସ୍କାନ କରି ଟଙ୍କା ଉଠାଇବାକୁ ପଡ଼ିବ। ୟୁପିଆଇ ମାଧ୍ୟମରେ ଏଟିଏମରୁ ୧୦,୦୦୦ ଟଙ୍କା ପର୍ଯ୍ୟନ୍ତ ଟଙ୍କା ଉଠାଇ ପାରିବେ। ତେବେ ଦୈନିକ ୟୁପିଆଇ କାରବାର ୧ ଲକ୍ଷ ଟଙ୍କା ରହିବ। ଟଙ୍କା ଉଠାଇବା ପାଇଁ ପ୍ରଥମେ ଯେକୌଣସି ଏଟିଏମରେ ‘ଏଟିଏମରେ ନଗଦ ଟଙ୍କା ଉଠାଇବା’ ବିକଳ୍ପ ଚୟନ କରିବାକୁ ପଡ଼ିବ। ଏହାପରେ ଗ୍ରାହକଙ୍କୁ ଟଙ୍କାର ପରିମାଣର ବିବରଣୀ ଦେବାକୁ ପଡ଼ିବ। ପରବର୍ତ୍ତୀ ପୃଷ୍ଠାରେ କ୍ୟୁଆର୍ କୋଡ୍ ଦେଖିବାକୁ ମିଳିବ। ଉପଭୋକ୍ତା ନିଜ ଫୋନରେ ଥିବା ଯେକୌଣସି ୟୁପିଆଇ ଆପରୁ ଏହି କୋଡ ସ୍କାନ କରି ୟୁପିଆଇ ପିନ୍ ଦେଇ ଟଙ୍କା ଉଠାଇବେ। ନ୍ୟାଶନାଲ ପେମେଣ୍ଟ କର୍ପୋରେଶନ ଅଫ ଇଣ୍ଡିଆ (ଏନପିସିଆଇ) ୟୁପିଆଇ ମାଧ୍ୟମରେ ଏଟିଏମରୁ ଟଙ୍କା ଉଠାଇବାରେ କୌଣସି ଶୁଳ୍କ ଆଦାୟ କରେ ନାହିଁ । ମାତ୍ର ବ୍ୟାଙ୍କ ପକ୍ଷରୁ ଧାର୍ଯ୍ୟ କରାଯାଇଥିବା ଦେୟ ଗ୍ରାହକଙ୍କୁ ଦେବାକୁ ପଡ଼ିବ।
