ଭୁବନେଶ୍ୱର,୯।୪(ଅନୁରାଧା ମହାରଣା): ଏଣିକି ଦେଶର ରେଳ ଷ୍ଟେଶନଗୁଡ଼ିକରେ ଅଟା ଏବଂ ଚାଉଳ ମିଳିବ। ଏକ ପାଇଲଟ ପ୍ରୋଜେକ୍ଟ ଅଧୀନରେ ଭାରତୀୟ ରେଳପଥ ଷ୍ଟେଶନରେ ଥିବା ଲୋକଙ୍କୁ ଅଟା ଏବଂ ଚାଉଳ ବିକ୍ରୟ କରିବାକୁ ନିଷ୍ପତ୍ତି ନେଇଛି। ଷ୍ଟେଶନରେ ଯାତ୍ରୀମାନଙ୍କୁ ଅଟା ଏବଂ ଚାଉଳ ଯୋଗାଇବା ପାଇଁ ଭାରତୀୟ ରେଳ ଖାଉଟି ବ୍ୟାପାର, ଖାଦ୍ୟ ଏବଂ ଜନସାଧାରଣ ବଣ୍ଟନ ମନ୍ତ୍ରଣାଳୟ ସହିତ ହାତ ମିଳାଇଛି। ଭାରତୀୟ ରେଳପଥର ଏହି ପଦକ୍ଷେପ ଦ୍ୱାରା ଝାଡ଼ଖଣ୍ଡ, ବିହାର ଏବଂ ପଶ୍ଚିମବଙ୍ଗ ଯାଉଥିବା ଲୋକମାନେ ଷ୍ଟେଶନରୁ ଶସ୍ତା ଅଟା ଏବଂ ଚାଉଳ କିଣି ପାରିବେ। ଏହି ପାଇଲଟ ପ୍ରୋଜେକ୍ଟ ବର୍ତ୍ତମାନ ୩ ମାସ ପାଇଁ ଆରମ୍ଭ କରାଯାଇଛି। ଏହି ଯୋଜନା ଯଦି ସଫଳ ହୁଏ ତେବେ ଏହା ସବୁଦିନ ପାଇଁ କାର୍ଯ୍ୟକାରୀ ହେବ । ଏ ସମ୍ପର୍କରେ ରେଳ ବୋର୍ଡର କାର୍ଯ୍ୟନିର୍ବାହୀ ନିର୍ଦ୍ଦେଶକ ନୀରଜ ଶର୍ମା ସମସ୍ତ ଆଞ୍ଚଳିକ ପରିଚାଳକଙ୍କୁ ଏକ ଚିଠି ଲେଖିଛନ୍ତି। ଚିଠି ମାଧ୍ୟମରେ ସେ ଅଟା ଏବଂ ଚାଉଳ ବିକ୍ରୟ ପାଇଁ ନିର୍ଦ୍ଦେଶାବଳୀ ଦେଇଛନ୍ତି। ବ୍ୟବସ୍ଥାକୁ କାର୍ଯ୍ୟନିର୍ବାହୀ ନିର୍ଦ୍ଦେଶକ ଏବଂ ମୁଖ୍ୟ ବାଣିଜ୍ୟ ପରିଚାଳକ ତଦାରଖ କରିବେ। ବିକ୍ରୟ କରିବାର ଦାୟିତ୍ୱ କିଛି ଏଜେନ୍ସି ଉପରେ ନ୍ୟସ୍ତ ହେବ। ପ୍ରତ୍ୟେକ ଷ୍ଟେଶନରେ ମୋବାଇଲ ଭ୍ୟାନରୁ ମଇଦା ଏବଂ ଚାଉଳ ବିକ୍ରିକୁ ଅନୁମତି ଦିଆଯିବ । ଏହି ସେବା ସାରେ ମାତ୍ର ୨ ଘଣ୍ଟା ପାଇଁ ଯୋଗାଇ ଦିଆଯିବ । ଏହା ପରେ ମୋବାଇଲ ଭ୍ୟାନ ଷ୍ଟେଶନ ପରିସର ଛାଡ଼ିବ । ଅଟା ପାଇଁ ସରକାର ୨୭.୫୦ ଟଙ୍କା ଏବଂ ଚାଉଳ ପାଇଁ ୨୯ ଟଙ୍କା ଧାର୍ଯ୍ୟ କରାଯାଇଛି।
