ଲକ୍ଷ୍ନୌ,୧୩।୪: ଉମେଶ ପାଲ ହତ୍ୟାକାଣ୍ଡର ଅଭିଯୁକ୍ତ ମାଫିଆ ଅତିକ ଅହମଦଙ୍କ ପୁଅ ଅସଦ ଅହମଦ ଉତ୍ତର ପ୍ରଦେଶ ଏସଟିଏଫ ଏନକାଉଣ୍ଟରରେ ନିହତ ହୋଇଛନ୍ତି। ଉତ୍ତର ପ୍ରଦେଶର ଝାନ୍ସିରେ ଏସଟିଏଫ ତାଙ୍କୁ ଏନକାଉଣ୍ଟର କରିଛନ୍ତି। ଏହି ଏନକାଉଣ୍ଟରରେ ସୁଟର ଗୁଲାମ ମହମ୍ମଦ ବି ନିହତ ହୋଇଛନ୍ତି। ପୁଅ ଅସଦ ଏନକାଉଣ୍ଟରେ ନିହତ ହେବା ପରେ ଏହି ଖବର ଶୁଣି କୋର୍ଟ ରୁମରେ ହିଁ ଅତିକଙ୍କ ସ୍ବାସ୍ଥ୍ୟ ବିଗିଡି ଯାଇଥିଲା। ସେ ପ୍ରଥମେ ଖୁବ୍ କାନ୍ଦିଥିଲେ ଓ ପରେ ମୁଣ୍ଡ ବୁଲାଇ ତଳେ ପଡିଯାଇଥିଲେ।
ଏହାପରେ ଅତିକ ଅହମଦ ନୌନି ଜେଲ ଯିବା ସମୟରେ କହିଥିଲେ, ଏସବୁ ମୋ ପାଇଁ ହେଲା। ସେ ଅସଦଙ୍କ ନିକଟକୁ ଯିବାକୁ ଚାହୁଁଛନ୍ତି, ଏହାର ବ୍ୟବସ୍ଥା କରାଯାଉ। ଏହି ପ୍ରସଙ୍ଗକୁ ନେଇ ଉତ୍ତର ପ୍ରଦେଶରେ ରାଜନୀତି ବି ଆରମ୍ଭ ହୋଇଗଲାଣି। ଶାସକ ଏହାକୁ ତାଙ୍କର ବଡ ସଫଳତା ଭାବେ ପ୍ରଚାର କରୁଛନ୍ତି। ଏପଟେ କିନ୍ତୁ ଅସଦ ଓ ଗୁଲାମଙ୍କ ଏନକାଉଣ୍ଟରକୁ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ମିଥ୍ୟା ଏନକାଉଣ୍ଟର ବୋଲି କହିଛନ୍ତି। ଏହାସହ ସେ ଏନକାଉଣ୍ଟରର ଯାଞ୍ଚ ଦାବି କରିଛନ୍ତି।
