ବ୍ରହ୍ମପୁର ଅଫିସ,୬ା୨: ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ଗୁଳିକରି ହତ୍ୟା ଘଟଣାରରେ କ୍ରାଇମବ୍ରାଞ୍ଚ ଟିମ୍ ତଦନ୍ତ କରି ଗୋପାଳଙ୍କ ଘରୁ ଫେରିଛି। କ୍ରାଇମବ୍ରାଞ୍ଚ ଡିଏସ୍ପି ଶିଶିର ମିଶ୍ରଙ୍କ ନେତୃତ୍ୱରେ ଆସିଥିବା ଟିମ୍ ବିଭିନ୍ନ ଦିଗ ଉପରେ ତଥ୍ୟ ଓ ପ୍ରମାଣ ସଂଗ୍ରହ କରି ଥିଲା। ସେପଟେ ପୋଲିସ ଏଏସ୍ଆଇ ଗୋପାଳକୃଷ୍ଣ ଦାସଙ୍କ ସ୍ତ୍ରୀ ଜୟନ୍ତୀ ଦାସ ପ୍ରତିକ୍ରିୟାରେ କହିଛନ୍ତି, ମୁଁ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିଛି। କାହିଁକି ଓ କିଭଳି ପରିସ୍ଥିତିରେ ଏତେ ବଡ଼ ଘଟଣା ଘଟିଲା ତାହାର ଠିକ୍ ତଦନ୍ତ ହେବା ଦରକାର। ନିରପେକ୍ଷ ତଦନ୍ତ କରି ସତ ସାମ୍ନାକୁ ଅଣାଯାଉ ବୋଲି ସେ କହିଛନ୍ତି। କ୍ରାଇମବ୍ରାଞ୍ଚ ଟିମ୍ ଘର ଯାଞ୍ଚ କରିବା ସହିତ ସ୍ବାମୀଙ୍କ ମାନସିକ ରୋଗର ଚିକିତ୍ସା ସମ୍ପର୍କିତ କାଗଜପତ୍ର ଓ ବ୍ୟାଙ୍କ ପାସ୍ବୁକ ଯାଞ୍ଚ କରିଥିଲେ। କ୍ରାଇମବ୍ରାଞ୍ଚ ଟିମ୍ ପ୍ରେସ୍କ୍ରିପ୍ସନ୍ ନେଇଥିବା ବେଳେ ବ୍ୟାଙ୍କ କାଗଜପତ୍ର ମଧ୍ୟ ନେଇଛନ୍ତି। ଘର ଚଳାଇବା ପାଇଁ ମୋର ବ୍ୟାଙ୍କ ଆକାଉଣ୍ଟକୁ ପ୍ରତିମାସରେ ସ୍ବାମୀ ୨୦/୨୫ହଜାର ଟଙ୍କା ଲେଖାଏ ପଠାଉଥିଲେ। ପଞ୍ଚଶୀଳମାର୍ଗ ସ୍ଥିତ ଘର ତିଆରି କରିବା ପାଇଁ ଗତ ୧୨/୧୩ବର୍ଷ ତଳେ ବ୍ୟାଙ୍କରୁ ଋଣ ନିଆଯାଇଥିଲା। ଏହା ବ୍ୟତୀତ ଅନ୍ୟ କୌଣସି ପ୍ରକାର ନେଣଦେଣ ହୋଇ ନାହିଁ ବୋଲି ଜୟନ୍ତୀ ଗଣମାଧ୍ୟମ ଆଗରେ କହିଛନ୍ତି।
