ଭୁବନେଶ୍ବର,୨୬ା୯(ବ୍ୟୁରୋ): ଭୁବନେଶ୍ୱର କ୍ଲବ୍ ସଭାପତି ନିର୍ବାଚନ ଫଳାଫଳ ରବିବାର ପ୍ରକାଶ ପାଇଛି। ପୂର୍ବତନ ମୁଖ୍ୟ ଶାସନ ସଚିବ ତଥା ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ ଅସୀତ୍ ତ୍ରିପାଠୀ ପୁଣିଥରେ କ୍ଲବର ସଭାପତି ଭାବେ ନିର୍ବାଚିତ ହୋଇଛନ୍ତି। ଅସୀତ ଏବଂ ପୂର୍ବତନ ଗ୍ରାମ୍ୟ ଉନ୍ନୟନ କମିଶନର ସତ୍ୟପ୍ରକାଶ ନନ୍ଦଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହୋଇଥିଲା। ନିର୍ବାଚନରେ ମୋଟ୍ ୧୯୫୦ ସଦସ୍ୟଙ୍କ ମଧ୍ୟରୁ ୧୦୫୪ ସଦସ୍ୟ ମତଦାନ କରିଥିଲେ। ଅସୀତ ୮୫୮ ଖଣ୍ଡ (୮୧.୫%) ଭୋଟ୍ ପାଇଥିବାବେଳେ ପ୍ରତିପକ୍ଷ ସତ୍ୟପ୍ରକାଶ ନନ୍ଦଙ୍କୁ ୬୬୯ ଖଣ୍ଡ ଭୋଟ୍ରେ ହରାଇଛନ୍ତି। ସତ୍ୟପ୍ରକାଶଙ୍କୁ ୧୮୯ ଖଣ୍ଡ ଭୋଟ୍ ମିଳିଛି। ମତଦାନ ଲାଗି କ୍ଲବ୍ ପରିସରରେ ୫ଟି ବୁଥ୍ ହୋଇଥିଲା। ଅସୀତଙ୍କ ଟିମ୍ରେ ଉପସଭାପତି ପଦ ଲାଗି ମହେନ୍ଦ୍ର ଗୁପ୍ତା, ସମ୍ପାଦକ ପାଇଁ ଦିଲ୍ଲୀପ ରାଉତରାୟ ଏବଂ ଯୁଗ୍ମ ସଚିବ ପଦ ପାଇଁ ଅଶୋକ କୁମାର ମିଶ୍ର ଏବଂ ସତ୍ୟପ୍ରକାଶ ନନ୍ଦଙ୍କ ଟିମ୍ରେ ତାପସ ରାୟ ଉପସଭାପତି, ମାନସ ରଞ୍ଜନ ଦାସ ସମ୍ପାଦକ, ଜ୍ୟୋତିର୍ମୟ ମହାନ୍ତି ଯୁଗ୍ମ ସଚିବ ପଦ ପାଇଁ ପ୍ରତିଦ୍ୱନ୍ଦ୍ୱିତା କରିଥିଲେ। ଏଥିରେ ମହେନ୍ଦ୍ର ଗୁପ୍ତା ୬୬୨ ଖଣ୍ଡ ଭୋଟ ପାଇ ଉପସଭାପତି ଭାବେ ନିର୍ବାଚିତ ହୋଇଛନ୍ତି। ସେହିପରି ୭୨୩ ଖଣ୍ଡ ଭୋଟ୍ ପାଇ ଦିଲ୍ଲୀପ ରାଉତରାୟ ସମ୍ପାଦକ ହୋଇଥିବା ବେଳେ ଅଶୋକ ମିଶ୍ର ୭୫୯ ଖଣ୍ଡ ଭୋଟ ପାଇ ଯୁଗ୍ମ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି। ଭୁବନେଶ୍ୱର କ୍ଲବ ନିର୍ବାଚନ ଫଳାଫଳ ପ୍ରକାଶ ପାଇବା ପରେ କ୍ଲବ ପରିସରରେ ବାଜା ଓ ବାଣ ଫୁଟାଇ ଅସୀତଙ୍କ ସମର୍ଥକ ଖୁସି ପାଳନ କରିଛନ୍ତି। ଏହି ଅବସରରେ ଅସୀତ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, କିଛିଦିନ ମଧ୍ୟରେ କ୍ଲବରେ ଯେଉଁ କାମ ହୋଇଛି ତାହାକୁ କ୍ଲବ ସଦସ୍ୟମାନେ ସମର୍ଥନ କରିଛନ୍ତି। ଏହି କ୍ଲବକୁ ଏବେ ସାମାଜିକ, ସାଂସ୍କୃତିକ ଏବଂ ଅଭିଜ୍ଞ ପ୍ଲାଟଫର୍ମ କରିବାକୁ ଚେଷ୍ଟା କରିବୁ। ଏନେଇ ଦୂରଦୃଷ୍ଟି ଆମ ସମସ୍ତଙ୍କ ରହିଛି। ସମ୍ପାଦକ ଦିଲ୍ଲୀପ ରାଉତରାୟ କହିଛନ୍ତି, ଭୁବନେଶ୍ୱର କ୍ଲବକୁ ଏପରି ନୂତନ ସୋପାନରେ ନେଇ ପହଞ୍ଚାଇବୁ ଯେପରି ଭାରତ ବର୍ଷରେ ତା’ର ଖ୍ୟାତି ରହିବ। ଭୁବନେଶ୍ୱର କ୍ଲବରେ କ’ଣ ହୁଏ ସେନେଇ ଅନେକ ସମୟରେ ଆମେ ଲୋକଙ୍କୁ ଜଣାଇଥାଉ। ଚେଷ୍ଟା କରିବୁ କ୍ଲବର କାର୍ଯ୍ୟକ୍ରମ ଯେପରି ଆଗାମୀ ଦିନରେ ଆହୁରି ପ୍ରଚାର ପ୍ରସାରିତ ହୋଇପାରିବ। ପ୍ରକାଶ ଯେ, ୨୦୨୧ କ୍ଲବ୍ ନିର୍ବାଚନରେ ପୂର୍ବତନ ମୁଖ୍ୟ ଶାସନ ସଚିବ ବିଜୟ କୁମାର ପଟ୍ଟନାୟକଙ୍କୁ ହରାଇ ଅସୀତ ସଭାପତି ହୋଇଥିଲେ।
