ଦୁବାଇ,୨୯।୧୦: ଚଳିତ ଟି୨୦ ବିଶ୍ୱକପ୍ରେ ଭାରତକୁ ହରାଇଥିବା ପାକିସ୍ତାନ ଶୁକ୍ରବାର ୫ ଉଇକେଟରେ ଆଫଗାନିସ୍ତାନକୁ ହରାଇ ଦେଇଛି। କିନ୍ତୁ ମ୍ୟାଚ୍ର ୧୮ତମ ଓଭର ପର୍ଯ୍ୟନ୍ତ ଆଫଗାନିସ୍ତାନ ମ୍ୟାଚ୍ରେ ଆଗୁଆ ଥିଲା। ୧୯ତମ ଓଭରରେ ମ୍ୟାଚ୍ରେ ସବୁ କିଛି ବଦଳି ରଖି ଦେଇଥିଲେ ଅସିଫ ଅଲି। ୧୪୮ ରନ୍ର ବିଜୟ ଲକ୍ଷ୍ୟ ପିଛା କରୁଥିବା ପାକିସ୍ତାନକୁ ଅନ୍ତିମ ଦୁଇ ଓଭରରେ ୨୪ ରନ୍ ଦରକାର ଥିଲା। ମାତ୍ର ୧୯ତମ ଓଭରରେ କାରିମ ଜନତଙ୍କୁ ୪ ଛକା ଲଗାଇଥିଲେ ଅସିଫ।
ଆରମ୍ଭରୁ ବିପର୍ଯ୍ୟୟର ସମ୍ମୁଖୀନ ହୋଇଥିବା ଆଫଗାନିସ୍ତାନ ୬ ଉଇକେଟ ହରାଇ ୧୪୭ ରନ୍ କରିଥିଲା। ୧୨.୫ ଓଭର ସୁଦ୍ଧା ଦଳ ୭୬ ରନ୍ରେ ୬ ଉଇକେଟ ହରାଇ ସାରିଥିଲା। ଏଭଳି ସଙ୍କଟଜନକ ସ୍ଥିତିରେ ଅଧିନାୟକ ମହମ୍ମଦ ନବି ଓ ଗୁଲବଦିନ ନାଏବଙ୍କ ୭ମ ଉଇକେଟ ପାଇଁ ଯୋଡ଼ି ଥିଲେ ୭୧ ରନ୍। ତାହା ପୁଣି ୪୩ ବଲରେ। ଜବାବରେ ପାକିସ୍ତାନ ୩ୟ ଓଭରରେ ହରାଇଥିଲା ମହମ୍ମଦ ରିଜଓ୍ବାନ(୮)ଙ୍କ ଉଇକେଟ। ଏହାପରେ ଫକର ଜାମନ(୩୦)ଙ୍କ ସହ ମିଶି ୬୩ ରନ୍ ଯୋଡ଼ିଥିଲେ ଅଧିନାୟକ ବାବର ଆଜାମ (୫୧)। ତା’ ପରେ ଆଫଗାନିସ୍ତାନ ସ୍ପିନରମାନେ କ୍ରମାଗତ ବ୍ୟବଧାନରେ ୩ ଉଇକେଟ ନେଇ ମ୍ୟାଚ୍ରେ ବିଜୟ ସମ୍ଭାବନା ସୃଷ୍ଟି କରିଥିଲେ। ମାତ୍ର ଅସିଫ ଅଲି ୧୯ତମ ଓଭରରେ ୪ ଛକା ଲଗାଇ ମ୍ୟାଚ୍ ଛଡ଼ାଇ ନେଇଥିଲେ।
