ଭୁବନେଶ୍ୱର, ୧୯।୪(କ୍ରୀଡ଼ା ପ୍ରତିନିଧି)- ଏସୀୟ ଭାରୋତ୍ତୋଳନ ଚାମ୍ପିୟନଶିପ୍ରୁ ରବିବାର ଖୁସି ଖବର ଆଣିଛନ୍ତି ଓଡ଼ିଶାର ଝିଲ୍ଲୀ ଦଳବେହେରା। ଉଜବେକିସ୍ତାନର ତାସକେଣ୍ଟରେ ଚାଲିଥିବା ଏସୀୟ ଚାମ୍ପିୟନଶିପ୍ର ୪୫ କେଜି କାଟେଗୋରିରେ ସେ ସ୍ବର୍ଣ୍ଣ ପଦକ ହାସଲ କରିଛନ୍ତି। ଜୁନିୟର ବିଶ୍ୱ ଭାରୋତ୍ତୋଳନ ଚାମ୍ପିୟନଶିପ୍ରେ ପୂର୍ବରୁ ବ୍ରୋଞ୍ଜ ପଦକ ହାସଲ କରିଥିବା ଓଡ଼ିଆ ଝିଅ ଝିଲ୍ଲୀ ତାସକେଣ୍ଟରେ ସ୍ନାଚ୍ରେ ୬୯ କେଜି, କ୍ଲିନ୍ ଆଣ୍ଡ ଜର୍କରେ ୮୮ କେଜି ଏହିପରି ମୋଟ ୧୫୭ କେଜି ଭାର ଉଠାଇ ଓଡ଼ିଶାକୁ ଗର୍ବିତ କରିଛନ୍ତି। ଏହା ଏକ ଅଲିମ୍ପିକ୍ କ୍ୱାଲିଫାଇଂ ଇଭେଣ୍ଟ ହୋଇଥିଲେ ହେଁ ଝିଲ୍ଲୀଙ୍କ ଓଜନ ବିଭାଗ ୪୫ କେଜି ଏହାର ଅନ୍ତର୍ଭୁକ୍ତ ନୁହେଁ। ତେଣୁ ଏହି ପ୍ରତିଯୋଗିତାରୁ ଝିଲ୍ଲୀଙ୍କ ଅଲିମ୍ପିକ୍ସ ଯୋଗ୍ୟତା ସମ୍ଭବ ହୋଇନାହିଁ। ଫିଲିପାଇନ୍ସର ମାରି ଫ୍ଲୋର ଡିଆଜ ୧୩୫(୬୦+୭୫) କେଜି ଭାରୋତ୍ତୋଳନ କରି ରୌପ୍ୟ ପଦକ ହାସଲ କରିଛନ୍ତି। ମୀରାବାଇ ଚାନୁଙ୍କ ପରେ ଦ୍ୱିତୀୟ ଭାରତୀୟ ଭାବେ ଝିଲ୍ଲୀ ଚଳିତ ଏସୀୟ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ପାଇଛନ୍ତି।
ଭୁବନେଶ୍ୱର କ୍ରୀଡ଼ା ଛାତ୍ରାବାସର ଝିଲ୍ଲୀ ପି. ଧର୍ମାରାଓଙ୍କଠାରୁ ପ୍ରଶିକ୍ଷଣପ୍ରାପ୍ତ। ପୂର୍ବରୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଅନେକ ପ୍ରତିଯୋଗିତାରେ ସଫଳତା ଅର୍ଜନ କରି ସେ ରାଜ୍ୟର ଗୌରବ ବଢ଼ାଇଛନ୍ତି। ୨୦୧୯ ଡିସେମ୍ବରରେ ନେପାଳର ପୋଖରାରେ ଅନୁଷ୍ଠିତ ୧୩ତମ ଦକ୍ଷିଣ ଏସୀୟ କ୍ରୀଡ଼ାରେ ସେ ୪୫ କେଜି କାଟେଗୋରିରେ ସ୍ବର୍ଣ୍ଣ ପଦକ ପାଇଥିଲେ। ସେହିବର୍ଷ ଥାଇଲାଣ୍ଡର ପଟ୍ଟାୟାଠାରେ ଆୟୋଜିତ ବିଶ୍ୱ ଭାରୋତ୍ତୋଳନ ଚାମ୍ପିୟନଶିପ୍ରେ ସେ ଅଂଶଗ୍ରହଣ କରିଥିଲେ। ତେବେ ଚାଇନାର ନିଙ୍ଗବୋଠାରେ ଅନୁଷ୍ଠିତ ଏସୀୟ ଭାରୋତ୍ତୋଳନରେ ସେ ରୌପ୍ୟ ପଦକ ହାସଲ କରିଥିଲେ। ଏଥର ଏହି ରୌପ୍ୟକୁ ସ୍ବର୍ଣ୍ଣରେ ପରିଣତ କରିବାରେ ସକ୍ଷମ ହୋଇଛନ୍ତି ଝିଲ୍ଲୀ। ୨୦୧୮ରେ ଉଜବେକିସ୍ତାନର ତାସକେଣ୍ଟଠାରେ ଆୟୋଜିତ ବିଶ୍ୱ ଜୁନିୟର ଭାରୋତ୍ତୋଳନର ୪୮ କେଜିରେ ବ୍ରୋଞ୍ଜ, ସେହିବର୍ଷ ଉର୍ଗାଞ୍ଚରେ ଆୟୋଜିତ ୨୫ତମ ଏସିଆନ ଜୁନିୟର ଭାରୋତ୍ତୋଳନରେ ରୌପ୍ୟ, ୨୦୧୭ରେ ଅଷ୍ଟ୍ରେଲିଆର ଗୋଲ୍ଡକୋଷ୍ଟରେ ଅନୁଷ୍ଠିତ ରାଜ୍ୟଗୋଷ୍ଠୀ ଭାରୋତ୍ତୋଳନ ଚାମ୍ପିୟନଶିପ୍ର ୪୮ କେଜି ବିଭାଗରେ ୨ ସ୍ବର୍ଣ୍ଣ, ୨୦୧୬ରେ ମାଲେସିଆର ପେନାଙ୍ଗରେ ଆୟୋଜିତ ରାଜ୍ୟଗୋଷ୍ଠୀ ଭାରୋତ୍ତୋଳନରେ ରୌପ୍ୟ ପ୍ରଭୃତି ତାଙ୍କ ସଫଳତାର ଆଉ ଗୋଟିଏ ଲେଖାଏ ଇସ୍ତାହାର।
