କୋଲକାତା, ୩।୨ -ଭେଟେରାନ ପେସର ଆଶୋକ ଦିଣ୍ଡା ମଙ୍ଗଳବାର କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ଏଥିସହ ଦେଢ ଦଶନ୍ଧିର ଲମ୍ବା କ୍ରିକେଟ କ୍ୟାରିୟରରେ ପୂର୍ଣ୍ଣଛେଦ ପଡ଼ିଛି। ଏହି ୩୬ ବର୍ଷୀୟ କ୍ରିକେଟର ଭାରତ ତରଫରୁ ୧୩ ଅନ୍ତର୍ଜାତୀୟ ଦିନିକିଆ ଓ ୯ ଅନ୍ତର୍ଜାତୀୟ ଟି୨୦ ଖେଳିଥିଲେ।
୨୦୧୯-୨୦ରେ ଗୋଟିଏ ରଣଜୀ ଟ୍ରଫି ମ୍ୟାଚ ଖେଳିବା ପରେ କୌଣସି କାରଣରୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଥିଲେ। ଏଥିରେ ଅସନ୍ତୋଷ ପ୍ରକାଶ କରି ସେ ସିଜନ ପ୍ରାରମ୍ଭରୁ ଗୋଆ ପଳାଇଥିଲେ। ଗୋଆ ଦଳ ତରଫରୁ ସେ ସୟେଦ ମୁସ୍ତାକ ଅଲି ଟ୍ରଫିର ତିନୋଟି ମ୍ୟାଚ ଖେଳିଥିଲେ। କ୍ରିକେଟ ପାଇଁ ଶରୀର ତାଙ୍କୁ ଅନୁମତି ଦେଉ ନ ଥିବା ହୃଦୟଙ୍ଗମ ହେବାରୁ ସେ ଏହି ନିଷ୍ପତ୍ତି ନେଇଛନ୍ତି। ସେ ତାଙ୍କ ନିଷ୍ପତ୍ତି ସମ୍ପର୍କରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ ଗୋଆ କ୍ରିକେଟ ଆସୋସିଏଶନକୁ ଇ-ମେଲ ଜରିଆରେ ଜଣାଇ ଦେଇଛନ୍ତି। ଦିଣ୍ଡା ୨୦୦୫-୦୬ ସିଜନରେ ପୁଣେଠାରେ ମହାରାଷ୍ଟ୍ର ବିପକ୍ଷରେ ତାଙ୍କ ପ୍ରଥମ ଶ୍ରେଣୀ ପଦାର୍ପଣ କରିଥିଲେ।
ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ସେ ଦିଲ୍ଲୀ ଡେୟାର ଡେଭିଲ୍ସ, କୋଲକାତା ନାଇଟ ରାଇଡର୍ସ, ପୁଣେ ଓ୍ବାରିୟର୍ସ, ରାଇଜିଂ ପୁଣେ ସୁପରଜିଆଣ୍ଟ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ତରଫରୁ ଖେଳିଛନ୍ତି। ଦିଣ୍ଡା ୭୮ ଆଇପିଏଲ୍ ମ୍ୟାଚରେ ୬୮ ଉଇକେଟ ଅକ୍ତିଆର କରିଛନ୍ତି। ତାଙ୍କ ଷ୍ଟ୍ରାଇକ୍ ରେଟ୍ ୨୨.୨୦ ରହିଥିବାବେଳେ ଇକୋନୋମି ରେଟ୍ ୮.୨୨ ରହିଛି। ତାଙ୍କ ଶ୍ରେଷ୍ଠ ବୋଲିଂ ଫିଗର ୪/୧୮ ରହିଥିଲା। ୧୧୬ ପ୍ରଥମ ଶ୍ରେଣୀ ମ୍ୟାଚ୍ ଖେଳିଥିବା ଦିଣ୍ଡାଙ୍କ ନାମରେ ରହିଛି ୪୨୦ ଉଇକେଟ। ପୂର୍ବତନ ବାମହାତୀ ସ୍ପିନର ଉତ୍ପଳ ଚାଟାର୍ଜୀଙ୍କ ପରେ ସେ ବେଙ୍ଗଲ ପାଇଁ ଦ୍ୱିତୀୟ ସର୍ବାଧିକ ଉଇକେଟ ହାସଲ କରିଥିଲେ।
