ନୂଆଦିଲ୍ଲୀ,୧୮ ।୧୨: ଝିଅଙ୍କ ବିବାହ ବୟସ ୧୮ରୁ ବୃଦ୍ଧି କରି ୨୧ କରିବା ନିଷ୍ପତ୍ତିକୁ କେନ୍ଦ୍ର ମନ୍ତ୍ରୀମଣ୍ଡଳର ମଞ୍ଜୁରୀ ମିଳିସାରିଛି । ଏବେ ଏହାକୁ ନେଇ ପ୍ରଶ୍ନ ଉଠାଇଛନ୍ତି ଏଆଇଏମ୍ଆଇଏମ୍ ନେତା ଅସଦୁଦ୍ଦିନ ଓୱାଇଇସି । ସେ କହିଛନ୍ତି ଯଦି ୧୮ ବର୍ଷ ବୟସରେ ଜଣେ ପୁଅ ବା ଝିଅ ସାବାଳକ ହୋଇ ଯାଉଛନ୍ତି ଓ ସେମାନଙ୍କୁ ଏମ୍ପି , ବିଧାୟକ ବାଛିବାକୁ ସ୍ୱାଧିନତା ମିଳିଯାଉଛି ତେବେ ସେମାନେ ନିଜର ଜୀବନ ସାଥି କାର୍ହିକି ବାଛି ପାରିବେ ନାହିଁ । ସେ ଆହୁରି ମଧ୍ୟ କହିଛନ୍ତି ୧୮ ବର୍ଷରେ ଜଣେ ବାଳକ ବା ବାଳିକା କଣ୍ଟ୍ରାକ୍ଟ ସାଇନ୍ କରିପାରିବେ, ବ୍ୟବସାୟ ଆରମ୍ଭ କରିପାରିବେ, ପ୍ରଧାନମନ୍ତ୍ରୀ ବାଛି ପାରିବେ, ଏମ୍ପି ବିଧାୟକ ବାଛି ପାରିବେ ହେଲେ ଜୀବନ ସାଥି ନୁହେଁ । ଏମାନେ ଲିଭ ଇନ୍ ରିଲେସନଶିପରେ ରହିପାରିବେ ହେଲେ ନିଜର ଜୀବନ ସାଥି ବାଛି ପାରିବେ ନାହିଁ । ଏହା ବଡ ହାସ୍ୟାସ୍ପଦ କଥା ।
ତେବେ ବାଲ୍ୟ ବିବାହ ରୋକିବାକୁ ଏମିତି କରାଯାଇଥିବା କୁହଯାଉଥିବା ବେଳେ ଓୱାଇଇସି କହିଛନ୍ତି ଦେଶରେ ପ୍ରତି ୪ ଜଣରେ ଜଣେ କନ୍ୟା ବାଲ୍ୟ ବିବାହ କରୁଛନ୍ତି । ହେଲେ କେବଳ ୭୮୫ ଆପରାଧିକ ମାମାଲା ଦାୟର କରାଯାଉଛି । ତେଣୁ ଆଇନ ମାଧ୍ୟମରେ ବାଲ୍ୟ ବିବାହକୁ ରୋକାଯାଇ ପାରିବ ନାହିଁ, କେବଳ ଶିକ୍ଷା ଓ ଆର୍ଥିକ ପ୍ରଗତି ପାଇଁ ଆଜି ଦେଶରେ ବାଲ୍ୟ ବିବାହ ସଂଖ୍ୟା କମ୍ ହୋଇଥିବା ସେ କହିଛନ୍ତି । ଓୱାଇସିଙ୍କ ମତରେ ୧.୨ କୋଟି ଶିଶୁଙ୍କର ୧୦ ବର୍ଷ ବୟସ ପୂର୍ବରୁ ବିବାହ କରି ଦିଆଯାଇଛି । ଏଥିରେ ୮୪ ପ୍ରତିଶତ ହିନ୍ଦୁ ପରିବାର ଥିବା ବେଳେ ୧୧ ପ୍ରତିଶତ ମୁସଲମାନ ପରିବାର ରହିଛନ୍ତି । ତେଣୁ ବାଲ୍ୟ ବିବାହ ରୋକିବା ପାଇଁ ଆଇନ ନୁହେଁ ଶିକ୍ଷା ଓ ମାନବ ବିକାଶ ଜରୁରୀ ।
