ଓ୍ବାଶିଂଟନ, ୩।୧୦:ଭାରତ ଉପରେ ଚାଇନାର ଆକ୍ରମଣାତ୍ମକ ମନୋଭାବ ଏବଂ ସୀମାନ୍ତରେ ବିସ୍ତାରବାଦୀ ନୀତିକୁ ନେଇ କ୍ଷୁବ୍ଧ ହୋଇଛି ଆମେରିକା। ଦୀର୍ଘ ୬ ଦଶନ୍ଧି ଧରି ଲଦାଖ, ଅରୁଣାଚଳ ପ୍ରଦେଶ ଉପରେ ଚାଇନା କୁଦୃଷ୍ଟି ପକାଇଥିବାବେଳେ ବେଜିଂକୁ କଡ଼ା ଭାଷାରେ ଅକ୍ଷେପ କରିଛି ଆମେରିକା ଗୃହ ବିଭାଗ। ଏକ ବିବୃତ୍ତିରେ କୁହାଯାଇଛି, ଗତ ୬୦ ବର୍ଷ ଧରି ଅରୁଣାଚଳ ପ୍ରଦେଶ ଭାରତରେ ଅଭିନ୍ନ ଅଙ୍ଗ ହୋଇରହିଛି ଏବଂ ଅନ୍ତର୍ଜାତୀୟ ସୀମା ନିୟମରେ କୌଣସି ପରିବର୍ତ୍ତନ ହେବନାହିଁ।
ଆମେରିକା କଂଗ୍ରେସ ପକ୍ଷରୁ ଜାରି କରାଯାଇଥିବା ଏକ ବିବୃତ୍ତିରେ କୁହାଯାଇଛି, ବାସ୍ତବ ନିୟନ୍ତ୍ରଣ ରେଖା (ଏଲ୍ଏସି)ରେ ଚାଇନାର ଏକତରଫା ନିଷ୍ପତ୍ତି ଗ୍ରହଣଯୋଗ୍ୟ ନୁହେଁ। ସୀମାନ୍ତରେ ଅବାଧ ପ୍ରବେଶ, ସାମରିକ କାର୍ଯ୍ୟାନୁଷ୍ଠାନ, କୌଣସି ଅଞ୍ଚଳକୁ ନିଜର ବୋଲି ଦାବି କରିବାକୁ ଗ୍ରହଣ କରାଯିବନାହିଁ। ଭାରତ ଏବଂ ଚାଇନା ଆପୋସ ଆଲୋଚନା ମାଧ୍ୟମରେ ସୀମାବିବାଦର ସମାଧାନ କରିବା ଆବଶ୍ୟକ।
ସେହିପରି ଚାଇନା ବିରୋଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସଜବାଜ ହେଉଛି କଂଗ୍ରେସ। ଚାଇନା ମାନବାଧିକାର କ୍ଷୁଣ୍ଣ କରୁଛି। ବେଜିଂ ସୈନ୍ୟ କ୍ଷମତା ବଢ଼ାଉଥିବାବେଳେ ଏହା ଅନ୍ୟ ଦେଶର ଜାତୀୟ ସଂହତି ପ୍ରତି ବିପଦ ସୃଷ୍ଟି କରିଛି ବୋଲି କଂଗ୍ରେସ ପକ୍ଷରୁ ଏକ ରିପୋର୍ଟ ଜାରି କରାଯାଇଛି। ଏଥିରେ ଚାଇନାର ମାନବାଧିକାର ଉଲ୍ଲଂଘନ, କରୋନା ମହାମାରୀ ନିୟନ୍ତ୍ରଣରେ ତ୍ରୁଟି, ଜାତୀୟ ସୁରକ୍ଷା ଭଳି ୪୦୦ରୁ ଊର୍ଦ୍ଧ୍ୱ ଅଭିଯୋଗ କରାଯାଇଛି। ରିପୋର୍ଟରେ ଏହା ମଧ୍ୟ ଉଲ୍ଲେଖ କରାଯାଇଛି, ସୀମାନ୍ତରେ ଭାରତର ଭୂଖଣ୍ଡକୁ ଚାଇନା କବ୍ଜା କରିବାକୁ ଅପଚେଷ୍ଟା ଚଳାଇଛି। ୫-ଜି ନେଟ୍ଓ୍ବାର୍କ ଯୋଗୁ ବିଶ୍ୱ ଶୃଙ୍ଖଳା ପ୍ରଭାବିତ ହେଉଛି। ଏସବୁ ପ୍ରସଙ୍ଗର ସମାଧାନ ଲାଗି ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନ୍ସନ ‘ଡି-୧୦’ ଉପରେ ଗୁରୁତ୍ୱ ଦେଇଛନ୍ତି। ଏଥିରେ ଜି-୭ ରାଷ୍ଟ୍ର ସମେତ ଦକ୍ଷିଣକୋରିଆ, ଭାରତ ଏବଂ ଅଷ୍ଟ୍ରେଲିଆକୁ ସାମିଲ କରିବାକୁ ସେ ପରାମର୍ଶ ଦେଇଛନ୍ତି। ସେହିପରି କମ୍ୟୁନିଷ୍ଟ ପାର୍ଟି ଅଫ୍ ଚାଇନା (ସିପିସି)ର ବିସ୍ତାରବାଦ ନୀତିର ଜବାବ ଦେବାକୁ ଯୋଜନାବଦ୍ଧ କାର୍ଯ୍ୟଶୈଳୀ ଆପଣାଇବ ା ଉପରେ ଆମେରିକା ଓ ବ୍ରିଟେନ ଯୋଜନାବଦ୍ଧ ଭାବେ ବିଚାର କରୁଛନ୍ତି।
ସେହିପରି ରିପୋର୍ଟରେ ଏହା ମଧ୍ୟ ଅଭିଯୋଗ କରାଯାଇଛି, ବର୍ଷକ ମଧ୍ୟରେ ସିପିସି ଅନ୍ତର୍ଜାତୀୟ ସନ୍ଧି ଭଙ୍ଗକରିଛି। ହଂକଂରେ ନାଗରିକଙ୍କୁ ସ୍ବାଧୀନ ଭାବେ ବଞ୍ଚତ୍ବାକୁ ଦେଉନାହିଁ। ଉଇବୁର, ତିବ୍ଦତୀୟଙ୍କ ଭଳି ଅଳ୍ପସଂଖ୍ୟକଙ୍କ ଉପରେ ଦମନନୀତି ଚଳାଇଛି। ପଡ଼ୋଶୀ ରାଷ୍ଟ୍ରକୁ ଯୁଦ୍ଧ ପାଇଁ ଉସୁକାଉଛି। ଦକ୍ଷିଣ ଚାଇନା ସାଗରରେ ହୁକୁମାତି କରିବାକୁ ଅପଚେଷ୍ଟା କରୁଥିବା ଏଥିରେ ଦର୍ଶାଯାଇଛି।
