ଯାଜପୁର ଅଫିସ,୪।୩: ଯାଜପୁର ଜିଲା ଧର୍ମଶାଳା ତହସିଲ ଅଧୀନ ଆରୁହା ପାହାଡ଼ରୁ କଳାପଥର ଲୁଟ୍, ଜାଲିଆତି ଅଭିଯୋଗ ମାମଲାରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ମନ୍ତ୍ରୀଙ୍କୁ ମତାମତ ରଖିବାକୁ ଲୋକାୟୁକ୍ତ ଅଧ୍ୟକ୍ଷ ନିର୍ଦ୍ଦେଶ ଦେଇଛନ୍ତି। ୮।୪।୨୦୨୨ରେ ମାମଲାର ପରବର୍ତ୍ତୀ ଶୁଣାଣି ସମୟରେ ମତାମତ ଦାଖଲ କରିବାକୁ ଲୋକାୟୁକ୍ତ ଗତ ୨୫ତାରିଖରେ ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଏହି ମାମଲାରେ ନିଜର ମତାମତ ରଖିବାକୁ ପୂର୍ବରୁ ରାଜସ୍ବ ମନ୍ତ୍ରୀ ବ୍ୟକ୍ତିଗତ ସଚିବଙ୍କ ଜରିଆରେ ପତ୍ର ସଂଖ୍ୟା. ୫୯/୧୪।୨।୨୦୨୨ରେ ଲୋକାୟୁକ୍ତଙ୍କୁ ଜଣାଇଥିଲେ। ଉକ୍ତ ପତ୍ରକୁ ଆଧାର କରି ମନ୍ତ୍ରୀଙ୍କୁ ଲୋକାୟୁକ୍ତ ନୋଟିସ୍ କରିଛନ୍ତି। ଏହାବାଦ୍ ପ୍ରାଥମିକ ତଦନ୍ତରେ ଢେଙ୍କାନାଳ ଭୂବିଜ୍ଞାନ, ଜୋନାଲ ସର୍ଭେ ଯୁଗ୍ମ ନିର୍ଦ୍ଦେଶକ ଅମୀୟ କୁମାର ରାଉତଙ୍କ ନାମ ଭୁଲ ଥିଲା ା ତାଙ୍କ ପ୍ରକୃତ ନାମ ଅନୂପ କୁମାର ରାଉତ ବୋଲି ଶୁଣାଣି ରିପୋର୍ଟରେ ଦର୍ଶାଯାଇଛି। ଇତିମଧ୍ୟରେ ସେ ଅବସର ନେଇସାରିଛନ୍ତି। ତାଙ୍କ ପ୍ରକୃତ ଠିକଣା ଭୁବନେଶ୍ୱର ଦୁର୍ଗାମାଧମ ନଗର, ପ୍ଲଟ ନମ୍ବର ୨୦, ଲେନ୍ ନମ୍ବର ୫। ତେଣୁ ତାଙ୍କୁ ମଧ୍ୟ ପରବର୍ତ୍ତୀ ଶୁଣାଣିରେ ଉପସ୍ଥିତ ରହିବାକୁ ତାଙ୍କ ବର୍ତ୍ତମାନ ଠିକଣାରେ ନୋଟିସ କରିବାକୁ ଲୋକାୟୁକ୍ତ ନିର୍ଦ୍ଦେଶ ଦେଇଛନ୍ତି। ଏହି ଶୁଣାଣିରେ ଆରୁହା ସର୍କଲର ପୂର୍ବତନ ଆର୍ଆଇ ବାସୁଦେବ ସାହୁ, ଲିଜ୍ଧାରୀ ତ୍ରିନାଥ ଜେନା, ପୂର୍ବତନ ଧର୍ମଶାଳା ତହସିଲଦାର ତଥା ବର୍ତ୍ତମାନର ଗଜପତି ଡେପୁଟି କଲେକ୍ଟର ପ୍ରଭାସ କୁମାର ବେହୁରା ପ୍ରମୁଖ ଉପସ୍ଥିତ ରହି ତାଙ୍କର ଜବାବ ରଖିଥିଲେ। ଲୋକାୟୁକ୍ତରେ ହୋଇଥିବା ଅଭିଯୋଗର ତଦନ୍ତ ରିପୋର୍ଟ ଅନୁସାରେ ଆରୁହା ପାହାଡ଼ରୁ ଲିଜ୍ଧାରୀ ଜେନାଙ୍କୁ ତହସିଲ ପ୍ରଶାସନ ପକ୍ଷରୁ ୩ଏକର ଅଞ୍ଚଳରୁ ପଥର ଉତ୍ତୋଳନ କରିବାକୁ ଅନୁମତି ଦିଆଯାଇଥିଲା। ହେଲେ ସେ ୬ ଏକର ୮୦ ଡିସିମାଲ ଅଞ୍ଚଳରୁ କଳାପଥର ଉତ୍ତୋଳନ କରି ଚାଲିଥିଲେ। ଏଭଳି ବେଆଇନ ଉତ୍ତୋଳନ ପାଇଁ ଲୋକାୟୁକ୍ତ ଗତ ନଭେମ୍ବର ୨୬ରେ ଯାଜପୁର ଜିଲାପାଳ, ଲିଜ୍ଧାରୀ ଜେନାଙ୍କ ସମେତ ଧର୍ମଶାଳାର ୪ ପୂର୍ବତନ ତହସିଲଦାର ଏବଂ ଆରୁହା ସର୍କଲ-୧ ର ପୂର୍ବତନ ୩ ଆର୍ଆଇଙ୍କୁ ୬ ସପ୍ତାହ ମଧ୍ୟରେ ଜବାବ ରଖିବାକୁ ନିର୍ଦ୍ଦେଶ ଦେଇଥିଲେ। ତଦନ୍ତ ରିପୋର୍ଟରେ ଆହୁରି ଦର୍ଶାଯାଇଥିଲା, ପୂର୍ବତନ ଆରୁହା ଆରଆଇ ବାସୁଦେବ ସାହୁ ଲିଜ୍ ଏରିଆ ୩ ଏକର ପରିବର୍ତ୍ତେ ୬ ଏକର ୮୦ ଡେସିମିଲ ସ୍କେଚ୍ ମ୍ୟାପ୍ ପ୍ରସ୍ତୁତ କରିଥିଲେ। ଏହାକୁ ଧର୍ମଶାଳାର ତତ୍କାଳୀନ ତହସିଲଦାର ପ୍ରଭାସ କୁମାର ବେହୁରା ସତ୍ୟ ପ୍ରମାଣିତ(ସାର୍ଟିଫାଏ) କରିବା ସହ ଭୂତତ୍ତ୍ବବିଦ୍ ଗୌତମ ସାହୁ ମାଇନିଂ ପ୍ଲାନ୍ ପ୍ରସ୍ତୁତ କରିବାକୁ ଅନୁରୋଧ କରିଥିଲେ। ଏହି ମାଇନିଂ ପ୍ଲାନ୍କୁ ଢେଙ୍କାନାଳସ୍ଥିତ ଜିଓଲୋଜି ଜୋନାଲ ଅଫିସର ତକତ୍ାଳୀନ ଯୁଗ୍ମ ନିର୍ଦ୍ଦେଶକ ଅନୂପ କୁମାର ରାଉତ ଅନୁମୋଦନ କରିଥିଲେ। ଭୁଲ ମାଇନିଂ ପ୍ଲାନ୍ ମଞ୍ଜୁରୀ କରିଥିବା ସମ୍ପର୍କରେ ଲୋକାୟୁକ୍ତ ନିର୍ଦ୍ଦେଶକ ରାଉତଙ୍କୁ ଜବାବଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
Posted inଆମ ଜିଲା ଖବର, ଯାଜପୁର, ରାଜ୍ୟ