କୋରାପୁଟ,୧୫।୫(ସ୍ବ.ପ୍ର.): କୋରାପୁଟସ୍ଥିତ ଆଞ୍ଚଳିକ ଆର୍ଟ ଗ୍ୟାଲେରିରେ ୨୦୨ କୋବ୍ରା ବାଟାଲିୟନ ପକ୍ଷରୁ ‘ଭାଇବ୍ରାଣ୍ଟ ଟ୍ରାଇବ’ ଉପରେ ଆଧାରିତ ଏକ ଚିତ୍ରକଳା ପ୍ରଦର୍ଶନୀ ଉଦ୍ଯାପିତ ହୋଇଯାଇଛି। ୨୦୨ କୋବ୍ରା ବାଟାଲିୟନର କମାଣ୍ଡାଣ୍ଟ ବୃନୋ ଏ.ଙ୍କ ତତ୍ତ୍ୱାବଧାନରେ କାର୍ଯ୍ୟକ୍ରମ ହୋଇଥିଲା। ଏହି ଅବସରରେ ୨୪୧ ବସ୍ତରିଆ ବାଟାଲିୟନର କମାଣ୍ଡାଣ୍ଟ ପଦ୍ମ କୁମାର୍, ଚତୁର୍ଥ ସିଆର୍ପିଏଫ୍ ବାଟାଲିୟନର କମାଣ୍ଡାଣ୍ଟ ମନୋଜ ଯାଦବ ଅତିଥି ଭାବେ ଯୋଗ ଦେଇଥିଲେ। ଚତ୍ରକଳା ପ୍ରଦର୍ଶନୀରେ କୋରାପୁଟ, ମାଲକାନଗିରି ଓ ନବରଙ୍ଗପୁର ଜିଲା ସମେତ ରାଜ୍ୟ ତଥା ରାଜ୍ୟ ବାହାରୁ ୨୦ଜଣ ଚିତ୍ରଶିଳ୍ପୀ ଯୋଗଦେଇ ଚିତ୍ର ଆଙ୍କି ସେଗୁଡ଼ିକୁ ପ୍ରଦର୍ଶିତ କରିଥିଲେ। ପରେ ଚିତ୍ରକଳାଗୁଡ଼ିକୁ ନିଲାମ କରାଯାଇଥିଲା।
ଏହି ଅବସରରେ ଚିତ୍ରକରଙ୍କୁ ମାନପତ୍ର ପ୍ରଦାନ କରାଯାଇଥିଲା। କୋରାପୁଟ ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ରାଜେଶ ପଣ୍ଡିତ ମୁଖ୍ୟ ଅତିଥି ଭାବେ ଯୋଗଦେଇଥିବାବେଳେ ସମ୍ମାନିତ ଅତିଥିଭାବେ କୋବ୍ରା ବାଟାଲିୟନ କମାଣ୍ଡାଣ୍ଟ ବୃନୋ ଏ. ଯୋଗଦେଇ ଚିତ୍ରକରଙ୍କୁ ପ୍ରଶଂସା କରିବା ସହ ଉତ୍ସାହିତ କରିଥିଲେ। ଚିତ୍ରକଳା ନିଲାମରୁ ପ୍ରାପ୍ତ ଅର୍ଥରୁ ଅଧା ଭାଗ ଚିତ୍ରକରଙ୍କୁ ଦିଆଯିବ। ଏପରିକି ବଳକା ଅର୍ଥ ଶିଶୁମାନଙ୍କ ପାଇଁ କାର୍ଯ୍ୟ କରୁଥିବା ସଂସ୍ଥାକୁ ପ୍ରଦାନ କରାଯିବ ବୋଲି କମାଣ୍ଡାଣ୍ଟ ବୃନୋ ସୂଚନା ଦେଇଛନ୍ତି। କାଯ୍ୟକ୍ରମ ପରିଚାଳକ ଭାବେ ୨୦୨ର ସହକାରୀ କମାଣ୍ଡାଣ୍ଟ ପବନ କୁମାର ସିଂ, ସହକାରୀ କମାଣ୍ଡାଣ୍ଟ ଦକ୍ଷିଣା ମୂର୍ତ୍ତି ଯୋଗଦେଇଥିବା ବେଳେ କଳା ପରାମର୍ଶଦାତା ଏସ୍.ମାନସୀ ଉପସ୍ଥିତ ରହି ଚିତ୍ରକରଙ୍କୁ ଉତ୍ସାହିତ କରିଥିଲେ।
