ଗଞ୍ଜାମ,୧୨।୩(ବିଦ୍ୟାଧର ସାହୁ): ଗଞ୍ଜାମ କଳାକାର ମଞ୍ଚ ତଥା ଗଞ୍ଜାମ କଳା ସାଂସ୍କୃତିକ ମଞ୍ଚ ପକ୍ଷରୁ ପ୍ରସିଦ୍ଧ ପର୍ଯ୍ୟଟନସ୍ଥଳୀ ଟାମ୍ପରା ହ୍ରଦ କୂଳରେ ଏକ ଭବ୍ୟ ବନ୍ଧୁମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କଳାକାରମାନଙ୍କ ମଧ୍ୟରେ ସମନ୍ବୟ ରକ୍ଷା କରିବା ସହ ସାଂସ୍କୃତିକ ବିକାଶ ଲକ୍ଷ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ଅଞ୍ଚଳର ବହୁ ନାମୀଦାମୀ କଳାକାର ଓ କର୍ମକର୍ତ୍ତା ଯୋଗ ଦେଇଥିଲେ।
ମଞ୍ଚର ସଭାପତି ଶବର କୁମାର ତରାଇଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମରେ ବିଶେଷ କରି ଗତ ଜାନୁଆରୀ ୨୬ (ସାଧାରଣତନ୍ତ୍ର ଦିବସ) ଅବସରରେ ପରିବେଷିତ ଦୁଇଟି ସାମାଜିକ ନାଟକର ସଫଳତାକୁ ନେଇ ଚର୍ଚ୍ଚା ହୋଇଥିଲା। ଏହି ଅବସରରେ ନାଟକର ଦୁଇ ନିର୍ଦ୍ଦେଶକ ଡଃ. ଗୌରୀ ଶଙ୍କର ଶତପଥୀ ଓ ପ୍ରଦୀପ କୁମାର ପଣ୍ଡାଙ୍କୁ ସେମାନଙ୍କ ଉଲ୍ଲେଖନୀୟ ଅବଦାନ ପାଇଁ ମଞ୍ଚ ପକ୍ଷରୁ ସମ୍ମାନିତ କରାଯାଇଥିଲା।
କାର୍ଯ୍ୟକ୍ରମରେ କଳାକାରମାନେ ନିଜର ପୂର୍ବ ସ୍ମୃତି ମନେ ପକାଇବା ସହ ଆଗାମୀ ଦିନରେ ନାଟକ ପରିବେଷଣକୁ କିଭଳି ଅଧିକ ମାର୍ଜିତ ଓ ଉଚ୍ଚକୋଟୀର କରାଯାଇପାରିବ, ସେ ନେଇ ଗୁରୁତ୍ୱପୂର୍ଣ୍ଣ ଆଲୋଚନା କରିଥିଲେ। ଏହି ବନ୍ଧୁମିଳନ ଉତ୍ସବରେଉପଦେଷ୍ଟା ସୁଧିର କୁମାର ପାଢ଼ୀ, ଉମାକାନ୍ତ ବେହେରା,ସମ୍ପାଦକ ଅକ୍ଷୟ ସ୍ୱାଇଁ,ନିରଞ୍ଜନ ପରିଡା, ମନୋଜ ପ୍ରଧାନ, ପପୁ ପଣ୍ଡା, ବଳରାମ ମାଳି, ରାକେଶ କୁମାର ନାୟକ, ଉପସ୍ଥାପକ ସୁଧିର ସାହୁ, ମିଥୁନ ବାରିକି, ଅସ୍ମିତ ପଣ୍ଡା, ମନୋରଞ୍ଜନ ଜେନା, କାର୍ତ୍ତିକ ତରେଇ, ରାକେଶ କୁମାର ନାୟକ, ବିଭୁ ପଲଇ ପ୍ରମୁଖ ମଞ୍ଚ କର୍ମକର୍ତ୍ତା ଓ କଳାକାର ଉପସ୍ଥିତ ରହିଥିଲେ। କାର୍ଯ୍ୟକ୍ରମ ଶେଷରେ ସମସ୍ତ କଳାକାର ଏକାଠି ହୋଇ ସାଂସ୍କୃତିକ ଆସର ଜମାଇବା ସହ ଆଗାମୀ ବର୍ଷ ପାଇଁ ନୂତନ ସଙ୍କଳ୍ପ ନେଇଥିଲେ।
