ବରଗଡ଼ ଅଫିସ୍,୨।୮: ଟୋକିଓ ଅଲିମ୍ପିକ୍ସରେ ପଶ୍ଚିମ ଓଡ଼ିଶା ଚିତ୍ରଶିଳ୍ପୀଙ୍କ କଳାକୃତୀ ସ୍ଥାନୀତ ହୋଇଛି । ସମ୍ବଲପୁର ଏବଂ ବରଗଡ଼ ଜିଲାର ୮ଜଣ ଚିତ୍ରଶିଳ୍ପୀ ଏହି ଗୌରବ ଅର୍ଜନ କରିଛନ୍ତି । ଇଣ୍ଡିଆନ କନ୍ଟେମ୍ପୋରାରି ଆସୋସିଏଶନ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଏହି କଳାକୃତୀକୁ ରିଲ୍ ଭିଡିିଓ ମାଧ୍ୟମରେ ଟୋକିଓ ଅଲିମ୍ପିକ୍ସରେ ପ୍ରଦର୍ଶନ କରାଯାଉଥିବା ସୂଚନା ମିଳିଛି ।
ଏଥିରେ ବରଗଡ଼ ସହରର ଚିତ୍ରଶିଳ୍ପୀ କୁଶ ଭୂୟାଁଙ୍କ କଳାକୃତୀ ରହିଛି । ତାଙ୍କ ମିଶନ ୨୧ କଳାକୃତୀ ପ୍ରଦର୍ଶିତ ହୋଇଛି । ସେହିପରି ସମ୍ବଲପୁରର ସଞ୍ଜୟ ସାହୁଙ୍କ ଡ୍ରିମ, ମନୋଜ ଚୌଧୁରୀଙ୍କ କିଙ୍ଗ୍ ଅଫ୍ ଦ ରିଙ୍ଗ୍, ମହେଶ ପାଣ୍ଡେଙ୍କ ଓପନିଂ ସେଲିବ୍ରେଶନ, ପ୍ରେମଚାନ୍ଦ ରାଉତଙ୍କ ଦି ହ୍ବାଇଟ୍ସ ଅଫ୍ ଗ୍ଲୋରି, ବନ୍ଦନା ମିଶ୍ରଙ୍କ ଜମ୍ପସ୍ ଅଫ୍ ପ୍ରାଇଡ୍, ସୁଜାତା ବେହେରାଙ୍କ ଡାଇଭିଂ ଫର ଗ୍ଲୋରି, ଅନୁରେଖା ଜେନାଙ୍କ ସ୍ପ୍ରିଣ୍ଟର ଆଦି କଳାକୃତୀ ସ୍ଥାନୀତ ହୋଇଛି । ଭାରତୀୟ ହକି ଦଳର ପୂର୍ବତନ ଅଧିନାୟକ ଦିଲିପ ତିର୍କୀ ଏହି ଶୋ’କୁ ଉଦଘାଟନ କରିଥିଲେ । ସଞ୍ଜିବ ବିଶ୍ୱାଳ ପ୍ରଦର୍ଶନୀର ସଂଯୋଜନା କରିଥିଲେ । ଜୁଲାଇ ୨୩ତାରିଖରୁ ଏହି ପ୍ରଦର୍ଶନୀ ଆରମ୍ଭ ହୋଇଥିବା ବେଳେ ଆସନ୍ତା ୮ତାରିଖ ପର୍ଯ୍ୟନ୍ତ ଚାଲିବାର କାର୍ଯ୍ୟକ୍ରମ ରହିଛି ।
